ການຂະຫຍາຍໂທລະຄົມ ໄປເຂດຫ່າງໄກສອກຫຼີກ ເພີ່ມລາຍຮັບແກ່ລັດ

ໃນວາລະກຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ສັນຕິສຸກ ສິມມະລາວົງ ຮອງລັດຖະມົນຕີກະຊວງເຕັກໂນໂລຊີ ແລະການສື່ສານໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ ສສຊ ໃນວັນທີ 16 ມິຖຸນາ 2022 ນີ້ວ່າ: ການຂະຫຍາຍພື້ນຖານໂຄງລາງໂທລະຄົມມະນາຄົມໄປເຂດຫ່າງໄກສອກຫລີກເຮັດໃຫ້ການເກັບລາຍຮັບຂອງລັດຖະບານດ້ວຍລະບົບອີເລັກໂຕຣນິກ ຫັນເປັນທັນສະໄໝມີປະສິດທິພາບ ແລະປະສິດທິຜົນດີຂຶ້ນ.

ການພັດທະນາວຽກງານໂທລະຄົມມະນາຄົມມາຮອດປັດຈຸບັນສາມາດຂະຫຍາຍເຄືອຂ່າຍສັນຍານໂທລະສັບມືຖື 2G ຄວມຄຸມໄດ້ 96%, 3G ຄວບຄຸມໄດ້ 83%, 4G ຄວບຄຸມໄດ້ 75% ຂອງບັນດາບ້ານໃນທົ່ວປະເທດ. ສ່ວນ 5G ແມ່ນໄດ້ເລີ່ມທົດລອງນຳໃຊ້ເຊິ່ງທັງໝົດແມ່ນໄດ້ສ້າງຄວາມພ້ອມໃນດ້ານລະບົບເຄື່ອງມືທີ່ທັນສະໄໝປະກອບສ່ວນເຂົ້າໃນການເກັບລາຍຮັບຂອງລັດຖະບານ. ສຳລັບຄາດໝາຍສູ້ຊົນຮອດປີ 2025 ລັດຖະບານ ກໍຄືກະຊວງເຕັກໂນໂລຊີ ແລະການສື່ສານ ຈະສູ້ຊົນສ້າງພະນັກງານ ໄອຊີທີໃຫ້ໄດ້ 1% ຂອງແຮງງານທັງໝົດ 0,3%, ຈະເລັ່ງສົ່ງເສີມຍົກລະດັບຄວາມຮູ້ໃຫ້ພະນັກງານລັດຖະກອນໃນຂອບເຂດທົ່ວປະເທດໃຫ້ສາມາດນຳໃຊ້ລະບົບບໍລິຫານລັດ ແບບດີຈີຕອນ, ສົ່ງເສີມໃຫ້ໄວໜຸ່ມ ລວມເຖິງຜູ້ສູງອາຍຸ ສາມາດນຳໃຊ້ດີຈີຕອນເທົ່າທຽມກັນ; ນອກຈາກນີ້ຍັງຈະສູ້ຊົນຂະຫຍາຍເຄື່ອຂ່າຍຮັບ-ສົ່ງ ສັນຍານມືຖື 3G ໃຫ້ໄດ້ 100%, 4G ໃຫ້ໄດ້ 90% ແລະ 5G ໃຫ້ໄດ້ 50%.

ທ່ານ ສັນຕິສຸກ ສິມມະລາວົງ ໃຫ້ຮູ້ອີກວ່າ: ລັດຖະບານໄດ້ຖືເອົາບັນຫາພັດທະນາບຸກຄະລາກອນເປັນວຽກທີ່ສຳຄັນໂດຍສະເພາະການພັດທະນາຊັບພະຍາກອນມະນຸດ ທີ່ມີຄຸນນະພາບສູງເປັນໜຶ່ງໃນປັດໄຈສຳຄັນ ແລະປັດໄຈຕັດສິນຜົນສຳເລັດຂອງການຈັດຕັ້ງປະຕິບັດແຜນພັດທະນາດັ່ງກ່າວ. ໃນໄລຍະຜ່ານມາການພັດທະນາຊັບພະຍາກອນມະນຸດດ້ານດີຈີຕອນແມ່ນໄດ້ອາໄສສະຖາບັນການສຶກສາ ທັງພາກລັດ, ເອກະຊົນ ແລະ ຍົກລະດັບຢູ່ຕ່າງປະເທດໃນແຕ່ລະປີກໍສາມາດສ້າງບຸກຄະລາກອນອອກມາຮັບໃຊ້ສັງຄົມ ແຕ່ແຮງງານດ້ານໄອຊີທີໃນປັດຈຸບັນກວມເອົາພຽງແຕ່ 0,3% ຂອງແຮງງານທົ່ວປະເທດເຖິງຢ່າງໃດກໍຕາມແຮງງານດັ່ງກ່າວຍັງມີຄວາມຈຳກັດທັງປະລິມານ ແລະຄຸນນະພາບມີພຽງຈຳນວນໜຶ່ງເທົ່ານັ້ນທີ່ສາມາດແຂ່ງຂັນກັບສາກົນໄດ້ເຮັດໃຫ້ການພັດທະນາດີຈີຕອນໄດ້ອາໄສຊ່ຽວຊານຈາກຕ່າງປະເທດເປັນຫລັກ.

แชร์