ກະຊວງ ສສກ ເຜີຍແຜ່ໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະ III

ໃນວັນທີ 16 ມິຖຸນາ 2022 ທີ່ນະຄອນຫລວງວຽງຈັນ, ກະຊວງສຶກສາທິການ ແລະກິລາ ຈັດກອງປະຊຸມເຜີຍແຜ່ນໍາສະເໜີສະພາບລວມຂອງການຈັດຕັ້ງປະຕິບັດ ໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະ III ກໍຄືໂຄງການຮຽນຮູ້ ແລະ ຄວາມເທົ່າທຽມ, ນໍາສະເໜີກ່ຽວກັບການຄຸ້ມຄອງດ້ານສິ່ງແວດລ້ອມ ແລະ ສັງຄົມ, ຄາດຄະເນຜົນໄດ້ຮັບ, ຄວາມຄືບໜ້າ ແລະ ສິ່ງທ້າທາຍ ລວມທັງແຜນໃນຕໍ່ໜ້າຂອງການຈັດຕັ້ງປະຕິບັດອົງປະກອບຍ່ອຍພາຍໃຕ້ອົງປະກອບທີ 1 ຂອງໂຄງ ການ ກໍຄື ກຸ່ມພັດທະນາເດັກໃນຊຸມຊົນ, ວຽກງານການປຸກສ້າງຫ້ອງຮຽນກຸ່ມພັດທະນາເດັກ ໃນຊຸມຊົນ ແລະການສອນຄວບອາຍຸໂດຍສະເພາະການພັດທະນາເນື້ອໃນ ແລະ ກິດຈະກໍາການຮຽນ-ການສອນຜ່ານການຫລິ້ນສໍາລັບເດັກອາຍຸ 3-4 ປີ, ແຜນງານການກຽມຄວາມພ້ອມດ້ານການອ່ານສໍາລັບເດັກອາຍຸ 5 ປີ ແລະ ການກັ່ນກອງຄວາມບົກຜ່ອງດ້ານໜ້າທີ່ການຂອງເດັກ.

ໂອກາດນີ້ ທ່ານ ພຸດ ສິມມາລາວົງ ລັດຖະມົນຕີ ກະຊວງ ສສກ ໄດ້ກ່າວວ່າ: ອົງປະກອບຍ່ອຍພາຍໃຕ້ອົງປະກອບທີ 2 ແລະ 3 ຂອງໂຄງການກໍຄືການກະກຽມ ແລະ ສະໜັບສະໜູນການສິດສອນຂອງຄູ ແລະ ການປັບປຸງການຄຸ້ມຄອງຄູ ໂດຍສະເພາະ ການຄຸ້ມຄອງບໍລິຫານທີ່ເນັ້ນໂຮງຮຽນເປັນຫລັກ, ການຄຸ້ມຄອງບໍລິຫານເງິນບໍລິຫານສະຖານການສຶກສາ ແລະການຄຸ້ມຄອງຜົນໄດ້ຮັບ ເພື່ອນໍາໄປສູ່ຄຸນນະພາບການຮຽນ-ການສອນ. ທັງນີ້ເຮັດໃຫ້ຜູ້ເຂົ້າຮ່ວມໄດ້ເຂົ້າໃຈຢ່າງເລິກເຊິ່ງ ແລະ ໄດ້ປະກອບສ່ວນແລກປ່ຽນຄໍາຄິດຄໍາເຫັນຢ່າງມີເນື້ອໃນຄົບຖ້ວນສົມບູນ ແລະກົງໄປກົງມາ. ເຖິງຢ່າງໃດກໍດີເພື່ອເຮັດໃຫ້ບັນດາເນື້ອໃນທີ່ໄດ້ນໍາມາສົນທະນາປຶກສາຫາລືໃນກອງປະຊຸມຄັ້ງນີ້, ໄດ້ຖືກຈັດຕັ້ງປະຕິບັດຢ່າງມີຄວາມສອດຄ່ອງ ແລະ ກົມກຽວ ໂດຍສະເພາະໂຄງການກອງທຶນຮ່ວມມື ສາກົນດ້ານການສຶກສາໄລຍະ III ໃຫ້ສຸມໃສ່ວຽກງານດ້ານຕ່າງໆທີ່ເປັນເປັນບູລິມະສິດ,ຈັດລຽງບັນດາກິດຈະກໍາຕ່າງໆທີ່ເປັນບູລິມະສິດໃຫ້ມີຄວາມສອດຄ່ອງກັບການຈັດຕັ້ງປະຕິບັດໂຄງການຕົວຈິງ,ທັງຮັບປະກັນໃຫໂຄງການສາມາດບັນລຸໄດ້ຕາມແຜນການທີ່ວາງໄວ້,ພ້ອມທັງສືບຕໍ່ເຜີຍແຜ່ໂຄງການຢູ່ຂັ້ນແຂວງ,ຂັ້ນເມືອງເພື່ອຮັບປະກັນໃຫ້ຄະນະຮັບຜິດຊອບແຕ່ລະຂັ້ນໄດ້ມີຄວາມຮັບຮູ້ ແລະເຂົ້າໃຈຕໍ່ການຈັດຕັ້ງປະຕິບັດໂຄງການຢ່າງເລິກເຊິ່ງ.

ທ່ານ ລັດຖະມົນຕີ ສສກ ຍັງໄດ້ເນັ້ນໜັກໃຫ້ພ້ອມກັນຖອດຖອນບົດຮຽນ ແລະປະສົບການຈາກການຈັດຕັ້ງປະຕິບັດບັນດາກິດຈະກໍາຕ່າງໆ ຂອງແຕ່ລະອົງປະກອບຂອງໂຄງການດ້ວຍຮູບການເສີມຂະຫຍາຍຜົນສໍາເລັດຕົວຈິງ ແລະປັບປຸງຄືນກົນໄກທີ່ເຫັນວ່າຍັງບໍ່ທັນສອດຄ່ອງເພື່ອເຮັດໃຫ້ບັນດາກິດຈະກໍາຕ່າງໆທີ່ຂຶ້ນແຜນໄວ້ນັ້ນ ໃຫ້ໄດ້ຮັບການຈັດຕັ້ງປະຕິບັດມີປະສິດທິພາບ, ປະສິດທິຜົນ ແລະບັນລຸຕາມເປົ້າໝາຍຂອງໂຄງການທີ່ກໍານົດໄວ້ທຸກປະການ.

แชร์