ອຸດົມໄຊ ປຶກສາຫາລືສະພາບການສະໜອງສະບຽງອາຫານ ແລະ ແກ້ໄຂບັນຫາສິນຄ້າແພງ

ກອງປະຊຸມປຶກສາຫາລືສະພາບການສະໜອງສະບຽງອາຫານ ແລະ ແກ້ໄຂບັນຫາສິນຄ້າແພງ ໃນແຂວງອຸດົມໄຊ ໄດ້ໄຂຂຶ້ນໃນວັນທີ 16 ມິຖຸນາ 2022 ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງ ໂດຍການເປັນປະທານຂອງທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ມີຫົວຫນ້າພະແນກການທີ່ກ່ຽວຂ້ອງຂັ້ນແຂວງ, ຂັ້ນເມືອງ ແລະ ຜູ້ປະກອບການພາຍໃນແຂວງອຸດົມໄຊເຂົ້າຮ່ວມ.

ກອງປະຊຸມຄັ້ງນີ້ ໄດ້ຮັບຟັງການຜ່ານບົດລາຍງານຫຍໍ້ສະພາບການຄຸ້ມຄອງລາຄາສິນຄ້າແພງ ເປັນຕົ້ນແມ່ນເຂົ້າ ແລະ ຊີ້ນ, ໃນໄລຍະ ເດືອນ ເມສາ ຫາ ເດືອນ ມິຖຸນາ ປີ 2022, ຜ່ານການເຄື່ອນໄຫວ ຂອງຂະແໜງການທີ່ກ່ຽວຂ້ອງເຫັນວ່າໃນໄລຍະ 3 ເດືອນ ນີ້ ສິນຄ້າຫຼາຍປະເພດແມ່ນໄດ້ມີລາຄາແພງຫຼາຍ ເຊິ່ງມັນໄດ້ສົ່ງຜົນກະທົບຕໍ່ການດໍາລົງຊີວິດຂອງປະຊາຊົນພາຍໃນແຂວງຢ່າງກ້ວາງຂວາງ ເຖິງແມ່ນວ່າຂະແໜງການທີ່ກ່ຽວຂ້ອງໄດ້ອອກແຈ້ງການຫຼາຍສະບັບໃນການຄຸ້ມຄອງລາຄາສິນຄ້າໃນທ້ອງຕະຫຼາດ ລົງຕິດຕາມກວດກາເປັນປົກກະຕິ ແຕ່ກໍຍັງມີແນວການເໜັງຕີງຂອງລາຄາສິນຄ້າ, ສາເຫດທີ່ພາໃຫ້ລາຄາສິນຄ້າແພງ ໂດຍສະເພາະແມ່ນປະເພດເຂົ້າກິນ, ແລະ ຊີ້ນໝູ. ປັດຈຸບັນ ເຂົ້າເປືອກໜຽວ ລາຄາ 3.000 ກີບ/ກິໂລ, ເຂົ້າເປືອກຈ້າວ ລາຄາ 5.000 ກີບ/ກິໂລ ເຂົ້າສານໜຽວ ປະເພດ 1 ລາຄາ 10.000 ກີບ/ກິໂລ, ເຂົ້າຈ້າວລາວປະເພດ 1 ລາຄາ 11.000/ກິໂລ ທຽບໃສ່ ປີ 2021 ເຂົ້າເປືອກໜຽວ ລາຄາ 3.000 ກີບ/ກິໂລ, ເຂົ້າເປືອກຈ້າວ ລາຄາ 3.500 ກີບ/ກິໂລ, ເຂົ້າສານໜຽວ ປະເພດ 1 ລາຄາ 9.000 ກີບ/ກິໂລ ເຂົ້າສານຈ້າວ ປະເພດ 1 ລາຄາ 10.000 ກີບ/ກີໂລ, ຄວາມຕ້ອງການບໍລິໂພກຫຼາຍ ການຜະລິດໜ້ອຍ ບໍ່ສາມາດດຸ່ນດ່ຽງ, ຄວາມຕ້ອງການທົ່ວແຂວງໄດ້ ສະແດງອອກໃນປີ 2021 ຄວາມຕ້ອງການເຂົ້າກິນໝົດປີ 102,913 ໂຕນ/ປີ, ຄາດຄະເນຜົນຜະລິດ ໝົດປີ 68,758 ໂຕນ/ປີ, ບໍ່ພໍກິນ 34,155 ໂຕນ/ປີ. ຍັງມີການເກັບຊື້ ສົ່ງອອກໄປຕ່າງແຂວງ ເຮັດໃຫ້ການສະໜອງພາຍໃນບໍ່ພຽງພໍ ຈໍາເປັນຕ້ອງໄດ້ນໍາເຂົ້າ ຈາກຕ່າງແຂວງ ແລະ ຕ່າງປະເທດ. ສໍາລັບຊີ້ນໝູ  ຈຳນວນໝູ່ປະຈຸບັນມີທັງໝົດ 5,232 ໂຕ, ຄາດວ່າຈະສາມາດຮັບປະກັນການສະໜອງຄວາມຕ້ອງການໄດ້ພຽງ 1 ເດືອນ. ຍ້ອນຂອດຕົ້ນທຶນການຜະລິດ ຫົວອາຫານ, ຢາກັນພະຍາດ ລ້ວນແຕ່ເປັນສິນຄ້ານຳເຂົ້າ ລາຄາຂື້ນຕາມອັດຕາແລກປ່ຽນ, ອັດຕາແລກປ່ຽນຕາມເລດທະນາຄານ ປັດຈຸບັນ 1 ໂດລາ ເທົ່າກັບ 15.000 ກີບ ທຽບໃສ່ ປີ 2021, 1 ໂດລາ ເທົ່າກັບ 8.000 ກີບ, 1 ບາດ ເທົ່າກັບ 500 ກີບ ທຽບໃສ່ປີ2021, 1 ບາດ ເທົ່າກັບ 250 ກີບ, 1 ຢວນ ເທົ່າກັບ 2.200 ກີບ ທຽບໃສ່ປີ2021, 1 ຢວນ ເທົ່າກັບ 1.300 ກີບ, ການຊຸກຍູ້ສະໜອງພາຍໃນຂອງພາກສ່ວນທີ່ກ່ຽວຂ້ອງຍັງເຮັດບໍ່ໄດ້ດີເທົ່າທີ່ຄວນ ຍັງມີການ ສົ່ງອອກໄປຕ່າງແຂວງເປັນສ່ວນຫຼາຍ ເຮັດໃຫ້ການສະໜອງພາຍໃນບໍ່ພຽງພໍ, ຂອດເຕົາຂ້າສັດ ແລະ ແມ່ຂຽງ ບໍ່ປະຕິບັດຕາມໂຄງສ້າງລາຄາທີ່ລັດກຳນົດໄວ້ ສວຍໂອ້ກາດຂື້ນລາຄາຂາຍຍ່ອຍຕາມລຳຟັງໃຈ, ພ້ອມນີ້ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງ ຍັງໄດ້ມີຄຳເຫັນແລກປ່ຽນໃນຫຼາຍບັນຫາ ໂດຍສະເພາະແມ່ນ ການຄຸ້ມຄອງ, ການເກັບຊື້ເຂົ້າກິນພາຍໃນແຂວງ ເປັນໄປໄດ້ບໍ່ອະນຸຍາດໃຫ້ສົ່ງອອກໄປຕ່າງແຂວງ ຕ່າງປະເທດເພື່ອຮັກສາສົມດຸນການສະໜອງພາຍໃນໃຫ້ພຽງພໍ, ຄິດໄລ່ຕົ້ນທືນການຜະລິດ ຂອດການລ້ຽງ , ການປູກ ຂອງຂະແໜງການທີ່ຮັບຜິດຊອບເປັນເຈົ້າການໃນການຄິດໄລ່ໂຄງປະກອບລາຄາຕົ້ນທຶນທີ່ຊັດເຈນ,  ຄົ້ນຄ້ວາໃຫ້ລະອຽດໃນການຈະປັບຂື້ນ ຫຼື ລຸດລົງຂອງສິນຄ້າ ເພື່ອບໍ່ໃຫ້ມີການກະທົບທັງສອງຝ່າຍ.

 

แชร์