ເຈົ້າແຂວງ ສະຫວັນນະເຂດ ຊີ້ແນະບາງດ້ານວຽກງານທີ່ຕິດພັນກັບຂະແໜງແຮງງານ ແລະສະຫວັດດີການສັງຄົມ

ໃນວັນທີ 16 ມິຖຸນາ 2022 ຢູ່ທີ່ຫ້ອງຮັບແຂກຂອງຫ້ອງວ່າການປົກຄອງແຂວງສະຫວັນນະເຂດ ທ່ານ ນາງ ໃບຄໍາຂັດທິຍະ ກຳມະການສູນກາງພັກ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມໄດ້ເຂົ້າພົບທ່ານເຈົ້າແຂວງສະຫວັນນະເຂດພ້ອມທັງສະເໜີຈຸດປະສົງໃນໂອກາດທີ່ທ່ານລົງມາເຄື່ອນໄຫວເຮັດວຽກຢູ່ແຂວງສະຫວັນນະເຂດຊຶ່ງໃນໂອກາດນີ້,ທ່ານເຈົ້າແຂວງໄດ້ໂອ້ລົມ ແລະໃຫ້ທິດຊີ້ນໍາວ່າ: ໃຫ້ມີການສ້າງລະບົບກົນໄກທີ່ມີຄວາມເປັນເອກະພາບໃນການໄປອອກແຮງງານຢູ່ປະເທດໄກ້ຄຽງ ໂດຍສະເພາະແມ່ນປະເທດໄທຊຶ່ງກ່ອນໜ້ານີ້ການນຳຂອງແຂວງສະຫວັນນະເຂດ ສປປ ລາວ ກໍ່ໄດ້ປຶກສາຫາລືກັບຄະນະນຳຂອງແຂວງມຸກດາຫານ ລາຊະອານາຈັກໄທ, ທາງເບື້ອງປະເທດໄທຈະຈັດໃຫ້ມີລະບົບທີ່ອຳນວຍຄວາມສະດວກໃຫ້ແກ່ແຮງງານລາວທີ່ໄປເຮັດວຽກຢູ່ໄທ, ໃຫ້ມີປຶ້ມຕິດຕາມແຮງງານລາວທີ່ໄປເຮັດວຽກຢູ່ໄທ ໂດຍມີກຳນົດ 30 ວັນ, ທັງນີ້ກໍ່ເພື່ອເປັນການຄຸ້ມຄອງແຮງງານໃຫ້ມີຄວາມປອດໄພຈາກການຄ້າມະນຸດ, ມີລະບຽບໃນການເຮັດວຽກ ແລະ ຖືກຕ້ອງຕາມກົດໝາຍ, ນອກນັ້ນທ່ານເຈົ້າແຂວງຍັງໄດ້ແນະນຳວິທີຈັດງານໃຫ້ແຮງງານລາວໂດຍຜ່ານບໍລິສັດຈັດຫາງານ, ການຍົກລະດັບສີມືແຮງງານ ແລະການເຂັ້ມງວດ ເພື່ອສະກັດກັ້ນການໄປອອກແຮງງານຢ່າງຜິດກົດໝາຍ, ການຍົກເລີກເອກະສານໄທແລນປລັສ ເພື່ອຫຼຸດຜ່ອນຄ່າໃຊ້ຈ່າຍຂອງແຮງງານລາວທີ່ຈະເຂົ້າໄປເຮັດວຽກຢູ່ປະເທດໄທ, ນອກນັ້ນທ່ານເຈົ້າແຂວງຍັງໄດ້ເວົ້າເຖິງວຽກງານການເກັບກູ້ລະເບີດ, ການແກ້ໄຂບັນຫາຄ່າຄອງຊີບຂອງບັນດາພະນັກງານກຳມະກອນໃນເຂດເສດຖະກິດພິເສດສະຫວັນນະເຂດ ແລະ ບັນຫາອື່ນໆ.

ຈາກນັ້ນ, ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມກໍ່ໄດ້ກ່າວສະແດງຄວາມຂອບໃຈທີ່ທ່ານເຈົ້າແຂວງສະຫວັນນະເຂດໄດ້ໃຫ້ການແນະນໍາໃນບາງດ້ານໃຫ້ແກ່ຂະແໜງແຮງງານ ແລະສະຫວັດດີການສັງຄົມໃນຄັ້ງນີ້ດ້ວຍ.

แชร์