ທາບທາມຄຳເຫັນ ແລະເຜີຍແຜ່ນິຕິກໍາຂະແໜງການການຕ່າງປະເທດຢູ່ແຂວງພາກໃຕ້

ກະຊວງການຕ່າງປະເທດ ໄດ້ຈັດກອງປະຊຸມທາບທາມຄຳເຫັນ ແລະ ເຜີຍແຜ່ນິຕິກໍຂະແໜງການການຕ່າງປະເທດໃຫ້ບັນດາ 4 ແຂວງພາກໃຕ້ (ສາລະວັນ, ເຊກອງ, ອັດຕະປື ແລະ ຈຳປາສັກ) ໃນວັນທີ 16 ມິຖຸນາ 2022 ຢູ່ຫ້ອງວ່າການແຂວງຈຳປາສັກ ໂດຍການເປັນປະທານຂອງ ທ່ານ ບຸນເຫຼືອ ພັນດານຸວົງ ຮອງລັດຖະມົນຕີກະຊວງການຕ່າງປະເທດ, ມີບັນດາທ່ານຮອງເຈົ້າແຂວງ, ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ບຸນເຫຼືອ ພັນດານຸວົງ ໄດ້ກ່າວວ່າ: ກອງປະຊຸມທາບທາມຄໍາເຫັນ ແລະເຜີຍແຜ່ນິຕິກໍຂະແໜງການການຕ່າງປະເທດໃນຄັ້ງນີ້ເພື່ອເປີດໂອກາດໃຫ້ຂະແໜງການທີ່ກ່ຽວຂ້ອງໂດຍສະເພາະແມ່ນບັນດາແຂວງພາກໃຕ້ໄດ້ປະກອບຄຳຄິດຄຳເຫັນໃສ່ຮ່າງນິຕິກຳ 2 ສະບັບຄື: ຮ່າງກົດໝາຍວ່າດ້ວຍໜັງສືຜ່ານແດນ ແລະຮ່າງດຳລັດ ວ່າດ້ວຍການເຄື່ອນໄຫວຂອງສຳນັກງານຜູ້ຕາງໜ້າເພື່ອຮັບໃຊ້ການພັດທະນາເສດຖະກິດແຫ່ງຊາດແນໃສ່ເຮັດໃຫ້ເນື້ອໃນຂອງນິຕິກຳມີຄວາມຮັດກຸມ, ລະອຽດ, ຈະແຈ້ງ ແລະຄົບຖ້ວນສົມບູນຂຶ້ນກວ່າເກົ່າ, ສອດຄ່ອງກັບສະພາບຕົວຈິງ ແລະສາມາດຈັດຕັ້ງປະຕິບັດໄດ້, ການສ້າງຮ່າງນິຕິກຳທັງສອງສະບັບນີ້ຈະເປັນບາດກ້າວໜຶ່ງທີ່ສຳຄັນ ໃນການພັດທະນາລະບົບນິຕິກຳຂອງຂະແໜງການຕ່າງປະເທດ ແນໃສ່ເພີ່ມທະວີການຄຸ້ມຄອງວຽກງານການຕ່າງປະເທດ ດ້ວຍກົດໝາຍຢ່າງໜັກແໜ້ນເທື່ອລະກ້າວ, ທັງເປັນການຜັນຂະຫຍາຍແນວທາງນະໂຍບາຍການຕ່າງປະເທດຂອງ ພັກ-ລັດ ຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກວ່າດ້ວຍການຍົກສູງປະສິດຕິພາບໃນການຄຸ້ມຄອງລັດ, ຄຸ້ມຄອງ ສັງຄົມດ້ວຍກົດໝາຍ, ມະຕິຂອງກອງປະຊຸມອົງຄະນະພັກກະຊວງການຕ່າງປະເທດ ຄັ້ງທີ IV ກໍຄື ຜົນສຳເລັດ ແລະທິດທາງຂອງກອງປະຊຸມວຽກງານການຕ່າງປະເທດ ຄັ້ງທີ 14 ໂດຍສະເພາະການຫັນຂະແໜງການຕ່າງປະເທດ ໄປສູ່ການຄຸ້ມຄອງດ້ວຍກົດໝາຍ.

ຈາກນັ້ນ,ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການເຜີຍແຜ່ຂໍ້ຕົກລົງຂອງລັດຖະມົນຕີກະຊວງການຕ່າງປະເທດວ່າດ້ວຍການຈັດຕັ້ງ ແລະການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫລວງ (ສະບັບປັບປຸງ) ປີ 2022 ເພື່ອໃຫ້ບັນດາແຂວງສາມາດກໍາໄດ້ເນື້ອໃນ, ເປັນເອກະພາບໃນການຈັດຕັ້ງປະຕິບັດ ແລະ ຜັນຂະຫຍາຍເປັນນິຕິກຳສະເພາະຂອງແຂວງເພື່ອນຳໃຊ້ເປັນບ່ອນອີງໃຫ້ແກ່ວຽກງານດັ່ງກ່າວຕື່ມອີກ.
ຂ່າວ: ທັດຊະນະ

แชร์