ລັດຖະບານ ຄົ້ນຄວ້າກຳນົດມາດຕະການທົດລອງດຳເນີນທຸລະກິດຊັບສິນ ດີຈີຕອນ ຢູ່ ລາວ

ພາຍຫຼັງລັດຖະບານ ໄດ້ມອບໃຫ້ກະຊວງເຕັກໂນໂລຊີ ແລະການສື່ສານສົມທົບກັບກະຊວງການເງິນ, ທະນາຄານແຫ່ງ ສປປ ລາວ, ກະຊວງພະລັງງານ ແລະບໍ່ແຮ່, ກະຊວງແຜນການ ແລະການລົງທຶນ, ລັດວິສາຫະກິດໄຟຟ້າລາວ, ຄົ້ນຄວ້າຮ່າງລະບຽບການຄຸ້ມຄອງ ແລະ ກຳນົດມາດຕະການຕ່າງໆ ໃນການເຮັດທົດລອງດຳເນີນທຸລະກິດຊັບສິນ ດີຈີຕອນ ຢູ່ ສປປ ລາວ. ປັດ ຈຸບັນ ກະຊວງເຕັກໂນໂລຊີ ແລະການສື່ສານໄດ້ອອກຂໍ້ຕົກລົງວ່າດ້ວຍການເຮັດທົດລອງທຸລະກຳຊັບສິນດີຈີຕອນເພື່ອນຳໃຊ້ເປັນນິຕິກຳຫລັກໃນການຄຸ້ມຄອງວຽກງານດັ່ງກ່າວເຊິ່ງທຸລະກຳຊັບສິນດີຈິຕອນທີ່ອະນຸຍາດເຮັດທົດລອງ ຢູ່ ສປປ ລາວ ມີ 2 ປະເພດ ຄື: ການຂຸດຄົ້ນເງິນຄຣິບໂຕ ແລະ ການຊື້-ຂາຍເງິນຄຣິບໂຕ ເຊິ່ງລັດຖະບານລາວຈະໄດ້ລາຍຮັບຈາກການດຳເນີນທຸລະກິດດັ່ງກ່າວ, ຈາກ 3 ຊ່ອງທາງຄື: ຄ່າລິຂະສິດການອອກໃບອະນຸຍາດດຳເນີນທຸລະກິດ, ຈາກອາກອນມອບເໝົາ ແລະຈາກຄ່ານຳໃຊ້ໄຟຟ້າຕົວຈິງ.

ທ່ານ ສັນຕິສຸກ ສິມມະລາວົງ ຮອງລັດຖະມົນຕີກະຊວງເຕັກໂນໂລຊີ ແລະການສື່ສານ(ກຕສ) ໄດ້ຊີ້ແຈງຕໍ່ຄຳຊັກຖາມຂອງ ສສຊ ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 16 ມິຖຸນາ 2022, ນີ້ວ່າ: ການຂຸດຄົ້ນເງິນຄຣິບໂຕ ແມ່ນມີກົນໄກຄຸ້ມຄອງຢ່າງຊັດເຈນໂດຍມອບໃຫ້ກະຊວງເຕັກໂນໂລຊີ ແລະ ການສື່ສານເປັນຜູ້ພິຈາລະນາອອກອະນຸຍາດດຳເນີນທຸລະກິດ-ທຸລະກຳຊັບສິນດີຈີຕອນ ແລະເຊັນສັນຍາກັບຜູ້ລົງທຶນໃນໄລຍະເຮັດທົດລອງ;ມາຮອດປັດຈຸບັນການອະນຸຍາດເຮັດທົດລອງທຸລະກຳການຂຸດຄົ້ນເງິນຄຣິບໂຕ ໃນເບື້ອງຕົ້ນອະນຸຍາດໃຫ້ເຊັນ 11 ສັນຍາແລ້ວ ເຊິ່ງໄດ້ສໍາເລັດການຈ່າຍຄ່າລິຂະສິດໃຫ້ແກ່ລັດຖະບານແລ້ວ 10 ສັນຍາ ຈຳນວນເງິນ 5 ລ້ານໂດລາ ແລະ ໄດ້ສໍາເລັດຈ່າຍພັນທະອາກອນແບບມອບເໝົາງວດ 1 ປີ 2022 ແລ້ວຈຳນວນ 6,5 ລ້ານໂດລາ, ສ່ວນບໍລິສັດອື່ນໆ ຍັງຢູ່ໃນຂັ້ນຕອນກໍ່ສ້າງພື້ນຖານໂຄງລ່າງສຳລັບການຂຸດຄົ້ນ, ຄາດຄະເນວ່າບໍລິສັດຕ່າງໆເຫລົ່ານີ້ຈະສາມາດຈ່າຍພັນທະອາກອນໃຫ້ລັດຖະບານເປັນຈຳນວນເງິນ 111 ລ້ານໂດລາຕໍ່ປີ.

ສຳລັບທຸລະກຳຊັບສິນ ດີຈີຕອນ ຫລືການຊື້-ຂາຍເງິນຄຣິບໂຕ ນັ້ນແມ່ນທະນາຄານ ແຫ່ງ ສປປ ລາວ (ທຫລ) ເປັນຜູ້ຮັບຜິດຊອບໂດຍກົງໃນການຄຸ້ມຄອງ ແລະພິຈາລະນາອະນຸມັດໃນການດຳເນີນທຸລະກຳໃນການຊື້-ຂາຍເງິນຄຣິບໂຕ ເຊິ່ງໃນໄລຍະທົດລອງນີ້ແມ່ນອະນຸຍາດໃຫ້ມີສູນຊື້-ຂາຍເງິນຄຣິບໂຕບໍ່ເກີນ 2 ແຫ່ງ ໂດຍ ທຫລ ໄດ້ອອກຂໍ້ຕົກລົງວ່າດ້ວຍການຊື້-ຂາຍເງິນຄຣິບໂຕ ເປັນນິຕິກຳຫລັກໃນການຄຸ້ມຄອງ. ມາຮອດປັດຈຸບັນການທົດລອງຊື້-ຂາຍເງິນຄຣິບໂຕໄດ້ຮັບອະນຸຍາດແລ້ວ 2 ສູນ ແຕ່ຍັງບໍ່ທັນໄດ້ຊຳລະຄ່າລິຂະສິດແກ່ລັດຖະບານເທື່ອເພາະຍັງຢູ່ໃນຂັ້ນຕອນກະກຽມຄວາມພ້ອມເພື່ອໃຫ້ ທຫລ ລົງກວດກາຕົວຈິງແລ້ວຈຶ່ງອອກໃບອະນຸມັດ.

แชร์