ລັດຖະບານ ວາງຫຼາຍມາດຕະການຄຸ້ມຄອງການເໜັງຕີງຂອງລາຄາສິນຄ້າ

ລັດຖະບານ ກໍຄື ກະຊວງອຸດສາຫະກໍາ ແລະການຄ້າ ໄດ້ກໍານົດຫລາຍນິຕິກໍາ ແລະວາງມາດຕະການຕ່າງໆອອກມາເປັນແຕ່ລະໄລຍະເຮັດໃຫ້ສະພາບລາຄາສິນຄ້າໃນທ້ອງຕະຫຼາດ ຢູ່ຂອບເຂດທົ່ວປະເທດບໍ່ໃຫ້ມີການເໜັງຕີງແຮງເພື່ອຫຼຸດຜ່ອນຜົນກະທົບຕໍ່ຊີວິດການເປັນຢູ່ຂອງປະຊາຊົນໂດຍຈະນຳໃຊ້ກອງທຶນຄັງແຮເຂົ້າເພື່ອແຊກແຊງລາຄາເຂົ້າສານ ຫຼືຂາຍໃນລາຄາແຊກແຊງໃນເວລາທີ່ລາຄາເຂົ້າສານມີການເໜັງຕີງຂຶ້ນສູງເກີນເພດານທີ່ລັດກໍານົດໃຫ້; ພ້ອມທັງຕິດຕາມ, ກວດກາລາຄາສິນຄ້າ ຕາມທ້ອງຕະຫລາດເປັນປະຈຳວັນເພື່ອຮັບປະກັນການເໜັງຕີງຂອງລາຄາໃຫ້ໄປຕາມກົນໄກຕະຫລາດ ແລະປ້ອງກັນການສວຍໂອກາດທຸກຮູບແບບ.

ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກຳ ແລະການຄ້າ ໄດ້ຊີ້ແຈງໃນກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 16 ມິຖຸນາ 2022 ນີ້ວ່າ: ສໍາລັບ ມາດຕະການຄຸ້ມຄອງ, ກວດກາ ແລະແກ້ໄຂສະພາບການເໜັງຕີງລາຄາສິນຄ້າໃນປະຈຸບັນ, ລັດຖະບານໄດ້ກຳນົດໂຄງປະກອບລາຄາຂາຍຍົກ-ຂາຍຍ່ອຍ; ດັດສົມການສະໜອງ ແລະຄວາມຕ້ອງການ ຫລືແຜນດຸ່ນດ່ຽງເພື່ອໃຫ້ການສະໜອງພຽງພໍກັບຄວາມຕ້ອງການຂອງສັງຄົມ, ທັງປ້ອງກັນບັນຫາສິນຄ້າຂາດແຄນ ແລະສວຍໂອກາດກັກຕຸນ ແລະຂຶ້ນລາຄາ; ນຳໃຊ້ເຄື່ອງມືດ້ານນິຕິກຳເປັນຕົ້ນແມ່ນນໍາໃຊ້ມາດຕະການພາຍໃຕ້ ດຳລັດ 474/ນຍ, ລົງວັນທີ 18 ພະຈິກ 2010 ເຊິ່ງເປັນເຄື່ອງມືທາງດ້ານນິຕິກຳທີ່ສຳຄັນໃນການຄຸ້ມຄອງລາຄາສິນຄ້າ.

ສໍາລັບມາດຕະການ ແລະວິທີແກ້ໄຂໃນຕໍ່ໜ້າກະຊວງອຸດສາຫະກໍາ ແລະການຄ້າສະເໜີໃຫ້ຂະແໜງການທີກ່ຽວຂ້ອງໂດຍສະເພາະຂະແໜງກະສິກຳ ແລະປ່າໄມ້ຕ້ອງເປັນເຈົ້າການໃນການກຳນົດຕົ້ນທຶນ ແລະຄຸ້ມຄອງລາຄາການຜະລິດໂດຍສະເພາະຕົ້ນທຶນການຜະລິດທີ່ຕິດພັນກັບການປູກ ແລະການລ້ຽງສັດ; ທຸກຂະແໜງການທີ່ຢູ່ໃນຄະນະ 71/ນຍ ຕ້ອງເປັນເຈົ້າການໃນການຄຸ້ມຄອງລາຄາສິນຄ້າ ແລະຄ່າບໍລິການທີ່ນອນຢູ່ໃນບັນຊີຄວບຄຸມລາຄາ(ບັນຊີ ກ) ແລະ ຊີ້ນໍາສາຍຕັ້ງຂອງຕົນເປັນປົກກະຕິ; ກຳນົດໂຄງປະກອບລາຄາຂາຍຍົກ-ຂາຍຍ່ອຍ ລາຍການສິນຄ້າທີ່ນອນໃນບັນຊີຄວບຄຸມລາຄາ(ບັນຊີ ກ) ເຊິ່ງຜ່ານມາ ກະຊວງອຸດສາຫະກຳ ແລະການຄ້າ ໄດ້ມີການກຳນົດສິນຄ້າປະເພດນໍ້າມັນເຊື້ອໄຟ ແລະອາຍແກ໊ສ, ສ່ວນພະແນກອຸດສາຫະກຳ ແລະການຄ້າແຂວງ, ນະຄອນຫລວງ ແມ່ນໄດ້ກໍານົດໂຄງປະກອບລາຄາສິນຄ້າປະເພດເຂົ້າກິນ, ໝູ ແລະປານິນ. ພ້ອມນັ້ນ, ຈະໄດ້ສືບຕໍ່ຄົ້ນຄວ້າກຳນົດໂຄງປະກອບລາຄາໄຂ່ໄກ່ ແລະສິນຄ້າອື່ນທີ່ເຫັນວ່າມີຜົນກະທົບຕໍ່ການດຳລົງຊີວິດຂອງພໍ່ແມ່ປະຊາຊົນ.

ກະຊວງອຸດສາຫະກຳ ແລະການຄ້າໃນນາມກອງເລຂາຂອງຄະນະ 71/ນຍ ຈະໄດ້ສືບຕໍ່ຊຸກຍູ້ຂະແໜງການກ່ຽວຂ້ອງທີ່ຢູ່ໃນຄະນະໃຫ້ສືບຕໍ່ຄົ້ນຄວ້າການກຳນົດໂຄງປະກອບລາຄາສິນຄ້າລາຍການສິນຄ້າບັນຊີ(ກ) ໃນຂະແໜງການຂອງຕົນເນື່ອງຈາກຫລາຍຂະແໜງການມີລາຍການສິນຄ້າຄວບຄຸມລາຄາແລ້ວ, ແຕ່ຍັງບໍ່ສາມາດກຳນົດໂຄງປະກອບລາຄາໄດ້. ພ້ອມນັ້ນ, ຍັງຈະຕິດຕາມ, ກວດກາລາຄາສິນຄ້າຕາມທ້ອງຕະຫລາດ ແລະຫ້າງຮ້ານທົ່ວໄປໃນຍາມບຸນປະເພນີ ຫລືວັນສຳຄັນຕ່າງໆ ແລະໃນກໍລະນີມີວິກິດການຢ່າງໃກ້ຊິດ.

แชร์