ກະຊວງສາທາ ສ້າງຂະບວນການບໍລິຈາກເລືອດ ຕ້ອນວັນວັນແພດລາວ

ໃນວັນທີ 16 ມິຖຸນານີ້, 3 ອົງການຈັດຕັ້ງມະຫາຊົນ ກະຊວງ ສາທາລະນະສຸກ ໄດ້ຈັດຂະບວນການບໍລິຈາກເລືອດເພື່ອຂໍ່ານັບຮັບຕ້ອນວັນແພດລາວ 18 ມິຖຸນາ ແລະ ວັນສ້າງຕັ້ງແມ່ຍິງລາວ ວັນທີ 20 ກໍລະກົດ ທີ່ຈະມາເຖິງນີ້ຢ່າງເປັນຂະບວນຟົດຟື້ນເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ ແລະ ກອງປະຊຸມໃຫຍ່ຄັ້ງທີ IX ຂອງອົງຄະນະພັກກະຊວງ ສາທາລະນະສຸກ ໃຫ້ປະກົດຜົນເປັນຈິງ. ໃຫ້ກຽດເປັນປະທານຂອງທ່ານ ປອ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ,ມີທ່ານ ຮສ ດຣ ສິງ ເມໂນລາດ ຮອງປະທານອົງການກາແດງແຫ່ງຊາດລາວ, ມີບັນດາຄະນະພັກກະຊວງສາທາລະນະສຸກ, ເລຂາ, ຮອງເລຂາກຳມະການໜ່ວຍພັກ ແລະ 3 ອົງການ ຈັດຕັ້ງອ້ອມຂ້າງກະຊວງສາທາລະນະສຸກເຂົ້າຮ່ວມ.

ໃນໂອກາດດັ່ງກ່າວ ທ່ານ ປອ ດຣ ບຸນແຝງ ພູມມະໄລສິດ ກ່າວວ່າ: ຂະບວນການດັ່ງກ່າວ ແມ່ນມີຄວາມໝາຍຄວາມສຳຄັນຢ່າງຍິ່ງຂອງວຽກງານອົງການ 3 ຈັດຕັ້ງມະຫາຊົນ ເນື່ອງຈາກສະພາບການລະບາດຂອງລະຍາດໂຄວິດ-19 ໃນໄລຍະຜ່ານມາ ແລະ ປັດຈຸບັນກໍຍັງສືບຕໍ່ລະບາດຢູ່ໃນທົ່ວໂລກກໍຄື ສປປ ລາວ ຂອງພວກເຮົາຊຶ່ງໄດ້ສົ່ງຜົນກະທົບຢ່າງຫລວງຫລາຍຕໍ່ການປຸກລະດົມການບໍລິຈາກເລືອດ ແລະ ສະໜອງເລືອດທີ່ປອດໄພຢູ່ໃນປະເທດເຮົາ. ສະຖາບັນເລືອດແຫ່ງຊາດ ແລະ ສູນເລືອດແຂວງໃນຂອບເຂດທົ່ວປະເທດມີຄວາມຫຍຸ້ງຍາກໃນການເຄື່ອນໄຫວອອກໄປຮັບບໍລິຈາກເລືອດຕາມສະຖານທີ່ຕ່າງໆທີ່ມີແຜນກຳນົດໄວ້, ແຕ່ຄວາມຕ້ອງການຂອງເລືອດເຂົ້າໃນການປິ່ນປົວຄົນເຈັບຢູ່ໂຮງໝໍໃນຂອບເຂດທົ່ວປະເທດແມ່ນບໍ່ໄດ້ລົດລະໃນແຕ່ລະວັນ ແລະນັບມື້ສູງຂື້ນ. ດັ່ງນັ້ນ,ພວກເຮົາຈຳເປັນຕ້ອງໄດ້ສືບຕໍ່ປຸກລະດົມຂົນຂວາຍບໍລິຈາກເລືອດຢ່າງເປັນປະຈຳ ແລະຕໍ່ເນື່ອງ, ດ້ວຍຫລາຍຮູບແບບ ແຕ່ກໍຕ້ອງປະຕິບັດຕາມຄຳສັ່ງແນະນຳຂອງລັດຖະບານກໍຄືຄະນະສະເພາະກິດໃນການຄວບຄຸມປ້ອງກັນ ແລະແກ້ໄຂການລະບາດຂອງພະຍາດໂຄວິດ-19 ທີ່ໄດ້ກໍານົດອອກໃນແຕ່ລະໄລຍະຢ່າງເຄັ່ງຄັດ.

ໃນໄລຍະຜ່ານມາ ກະຊວງສາທາລະນະສຸກ ແລະອົງການຈັດຕັ້ງຂັ້ນຕ່າງໆ ທີ່ກ່ຽວຂ້ອງໄດ້ເປັນເຈົ້າການ ແລະເປັນແບບຢ່າງໃນການປຸກລະດົມ, ຈັດກິດຈະກຳແບບເປີດກວ້າງຮັບບໍລິຈາກເລືອດເພື່ອສະເຫລີມສະຫລອງວັນສຳຄັນຕ່າງໆຂອງພັກ ແລະຂອງຊາດຢ່າງຕໍ່ເນື່ອງເຊິ່ງໄດ້ມີຄຳຂວັນໃນການປຸກລະດົມຄື: “ບໍລິຈາກເລືອດແມ່ນຮັກຊາດ ແລະພັດທະນາ, ເລືອດໜຶ່ງຢົດເພື່ອອະນາຄົດຂອງຊາດ, ສິນໄຊແຫ່ງຍຸກຮ່ວມໃຈບໍລິຈາກເລືອດ”. ສະເພາະຄຳຂວັນ ປະຈຳປີ 2022 ແມ່ນ: “ບໍລິຈາກເລືອດແມ່ນພະລັງແຫ່ງຄວາມສາມັກຄີ, ມາຮ່ວມກັນບໍລິຈາກເລືອດເພື່ອຊ່ວຍຊີວິດ” ເຊິ່ງໄດ້ເຮັດໃຫ້ມີຂະບວນການຟົດຟື້ນ ແລະມີການປະກອບສ່ວນຂອງອົງການຈັດຕັ້ງມະຫາຊົນ: ຊາວໜຸ່ມ, ແມ່ຍິງ, ກຳມະບານໃນຂົງເຂດຕ່າງໆໃນຂອບເຂດທົ່ວປະເທດ.

แชร์