3 ປະເທດຮ່ວມມືການຂົນສົ່ງສິນຄ້າຜ່ານທາງລົດໄຟ ລາວ-ຈີນ

ໃນວັນທີ 15 ມິຖຸນາ ທີ່ຜ່ານມາ, ຢູ່ໂຮງແຮມແລນມາກໄດ້ຈັດພິທີເຊັນສັນຍາຮ່ວມມືການຂົນສົ່ງຜ່ານເສັ້ນທາງລົດໄຟ ຈີນ-ລາວ-ໄທ ລະຫວ່າງທ່ານ ກວັນວານ ປະທານບໍລິສັດ ຮາຍຫານ International logistics ຈໍາກັດ, ທ່ານນາງ ຖານັນດາ ອຳພັນທີຣະນົນ ປະທານ ບໍລິສັດ Soldrich Express ຈໍາກັດ, ທ່ານາງ ລັດສະໝີ ສິດທິຍົມ ປະທານ ບໍລິສັດ ແສງໄຊຈະເລີນຊັບ ການຄ້າຂາເຂົ້າ-ຂາອອກ ຈໍາກັດ ແລະ ທ່ານນາງ ສຸລິນ ຊະນະໄຊ ປະທານບໍລິສັດ ເອສເອັກ ການຄ້າສາກົນຂາອອກ-ຂາເຂົ້າ ຈໍາກັດຜູ້ດຽວ. ມີບັນດາພາກສ່ວນທີ່ກ່ຽວຂ້ອງ ແລະແຂກທີ່ຖືກເຊີນເຂົ້າຮ່ວມ.

ສຳລັບການເຊັນສັນຍາຮ່ວມມື (MOU) ໃນຄັ້ງນີ້ ໂດຍໄດ້ນຳໃຊ້ເສັ້ນທາງລົດໄຟ ລາວ-ຈີນ ທີ່ເປັນປະໂຫຍດໃນການພັດທະນາໃຫ້ມີຄວາມຍືນຍົງ ໂດຍສະເພາະທາງລົດໄຟທີ່ເປັນເຄື່ອງມືອັນສຳຄັນໃນການຄົມມະນາຄົມຂົນສົ່ງ ເພື່ອຫຼຸດຜ່ອນຕົ້ນທຶນ, ເຮັດໃຫ້ການຂົນສົ່ງມີປະສິດທິພາບສູງ, ພ້ອມທັງຫລຸດຜ່ອນຄວາມສ່ຽງທີ່ຈະເກີດອຸບັດຕິເຫດຂອງສິນຄ້າ ແລະເປັນການຫຍໍ້ໄລຍະເວລາລົງຈາກການຂົນສົ່ງທາງເຮືອ ແລະທາງລົດ. ນອກຈາກນີ້, ຍັງເປັນທ່າແຮງໃນການສົ່ງເສີມການພົວພັນຮ່ວມມືດ້ານການຄ້າ ແລະ ການແລກປ່ຽນສິນຄ້າຂອງ 3 ປະເທດ ເຊິ່ງຈະເປັນເສດຖະກິດຂະໜາດໃຫຍ່ ແລະເປັນຕະຫລາດທີ່ໃຫຍ່ທັງເປັນບ່ອນຮອງຮັບຜະລິດຕະພັນຂອງທັງ 3 ປະເທດ ມາຢູ່ຮ່ວມກັນ. ພ້ອມດຽວກັນນີ້, ຄ່າຂົນສົ່ງທີ່ຕໍ່າມີໄລຍະເວລາຂົນສົ່ງໄວຂຶ້ນເປັນປັດໄຈທີ່ສຳຄັນໃຫ້ແກ່ຂະແໜງກະສິກຳ, ອຸດສາຫະກຳທີ່ມີຕົ້ນທຶນການຜະລິດຕໍ່າ ເປັນທ່າແຮງໄດ້ປຽບໃນການນຳເຂົ້າ-ສົ່ງອອກສິນຄ້າຜ່ານແດນເຊິ່ງຈະເຮັດໃຫ້ຂະແໜງການດັ່ງກ່າວມີບາດກ້າວເຕີບໂຕຢ່າງວ່ອງໄວ.

ຄຽງຄູ່ກັບສັນຍາການພົວພັນຮ່ວມມື ເສດຖະກິດຮອບດ້ານໃນພາກພື້ນ ຍັງຈະເປັນການປະຕິບັດນະໂຍບາຍຕ່າງໆ ທີ່ເປັນປະໂຫຍດຕໍ່ການພັດທະນາເສດຖະກິດ ແລະຈະເຮັດໃຫ້ການຄ້າ, ສິນຄ້າທີ່ສາມາດຈັບຕ້ອງໄດ້ ແລະການຄ້າມີຄວາມສະດວກສະບາຍກວ່າເກົ່າ, ຕ່ອງໂສ້ການຜະລິດ ແລະການສະໜອງສິນຄ້າຈະມີການເຊື່ອມໂຍງເຂົ້າກັນຫລາຍກ່ອນເກົ່າ, ພ້ອມດຽວກັນກໍຈະເຮັດໃຫ້ການລົງທຶນພາຍໃນມີຄວາມຄຶກຄັກຫລາກຫລາຍຂື້ນກວ່າເກົ່າ. ນອກຈາກນີ້, ເສັ້ນທາງລົດໄຟລາວ-ຈີນ ໄດ້ເປັນຂົ່ວຕໍ່ໃນການເຊື່ອມຕໍ່ກັບຂະບວນລົດໄຟ ຈີນ-ເອີຣົບ ຢູ່ທິດເໜືອ ແລະເປັນຂົວຕໍ່ກັບບັນດາປະເທດອາຊຽນຢູ່ທິດໃຕ້ທີ່ກຳລັງໄດ້ຮັບການຈັດຕັ້ງປະຕິບັດເທື່ອລະກ້າວເຊິ່ງເປັນການຍົກສູງທ່າແຮງດ້ານທີ່ຕັ້ງຂອງ 3 ປະເທດຢ່າງບໍ່ຢຸດຢັ້ງໂດຍຫັ້ນເອົາທ່າແຮງນີ້ເຂົ້າໃນການພັດທະນາການຄົມມະນາຄົມທາງບົກຂອງການໄປມາຫາສູ່ກັນ ແລະ ການຂົນສົ່ງສິນຄ້າລະຫວ່າງ ຈີນ-ອາຊຽນ ໃຫ້ນັບມື້ນັບເຕີບໃຫຍ່ຂະຫຍາຍຕົວເປັນກ້າວໆ.

แชร์