ອົງການກາແດງແຂວງສາລະວັນ ສະຫຼອງວັນຜູ້ບໍລິຈາກເລືອດໂລກ ຄົບຮອບ 18 ປີ.

ໃນວັນທີ 14 ມິຖຸນາ 2022 ອົງການກາແດງແຂວງສາລະວັນ ຈັດພິທີສະເຫຼີມສະຫຼອງວັນຜູ້ບໍລິຈາກເລືອດໂລກ ຄົບຮອບ 18 ປີ (14 ມີຖຸນາ 2004-14 ມີຖຸນາ 2022), ທີ່ສະໂມສອນແຂວງ, ໂດຍການເຂົ້າຮ່ວມຂອງ ທ່ານ ພູທົງ ຄຳມະນີວົງ ຄະນະປະຈຳພັກແຂວງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານເສດຖະກິດ, ມີພຣະອາຈານ ສຸລິຍາ ທຽມສະຫວັນ ເຈົ້າອະທິການວັດບ້ານໂພນແພງ, ທ່ານ ນາງ ດຣ ກົງສິດ ອຸ່ນຈິດ ຫົວໜ້າອົງການກາແດງແຂວງ, ມີຫົວໜ້າຫ້ອງການ-ຮອງຫົວໜ້າຫ້ອງການອ້ອມຂ້າງແຂວງ, ພະນັກງານ-ລັດຖະກອນ, ທະຫານ-ຕຳຫຼວດ ພ້ອມດ້ວຍນັກສຶກສາສູນຝຶກອົບຮົມໂຮງຮຽນສ້າງແພດແຂວງເຂົ້າຮ່ວມ.

ຊຶ່ງໃນພິທີ, ທ່ານ ດຣ ນາງ ກົງສິດ ອຸ່ນຈິດ ໄດ້ຫວນຄືນຄວາມເປັນມາຂອງວັນຜູ້ບໍລິຈາກເລືອດໂລກໃຫ້ຮູ້ວ່າ: ໃນວັນທີ 14 ມິຖຸນາ ຂອງທຸກໆປີ ແມ່ນເປັນວັນແຫ່ງການສະເຫຼີມສະຫຼອງວັນຜູ້ບໍລິຈາກເລືອດໂລກ (World Blood Donor Day-WBDD) ໃນປະເທດຕ່າງໆຢູ່ທົ່ວໂລກ, ເພື່ອເປັນການຂອບໃຈຕໍ່ຜູ້ບໍລິຈາກເລືອດຢູ່ທົ່ວໂລກ ທີ່ເຂົາເຈົ້າໄດ້ມອບຂອງຂວັນທີ່ມີຄ່າຕໍ່ຊີວິດຄືການບໍລິຈາກເລືອດ ດ້ວຍຄວາມສະໝັກໃຈບໍ່ຮຽກຮ້ອງສິ່ງຕອບແທນ ເພື່ອຊ່ວຍຄົນເຈັບ ແລະ ສ້າງຈິດສໍານຶກໃນເລື່ອງຄວາມຈໍາເປັນຂອງການບໍລິຈາກເລືອດເປັນປະຈໍາ ທີ່ສະໝໍ່າສະເໝີ, ເລືອດ ແລະຜະລິດຕະພັນເລືອດ ທີ່ໄດ້ຮັບບໍລິຈາກໃນແຕ່ລະປີຢູ່ທົ່ວໂລກສາມາດຊ່ວຍຊີວິດຄົນເຈັບໄດ້ນັບລ້ານ. ໃນເດືອນພຶດສະພາ ປີ 2005 ໄດ້ຈັດກອງປະຊຸມອົງການອະນາໄມໂລກຄັ້ງທີ 58 ໄດ້ມີການລົງນາມຂໍ້ຕົກລົງໃນການສະໜັບສະໜູນການບໍລິຈາກເລືອດດ້ວຍຄວາມສະໝັກໃຈ ແລະໄດ້ກໍານົດເອົາກິດຈະກໍາວັນຜູ້ບໍລິຈາກເລືອດໂລກເປັນປະຈໍາທຸກປີ, ໂດຍໄດ້ກໍານົດເອົາວັນທີ່ 14 ມິຖຸນາ ຊຶ່ງເປັນວັນຄ້າຍວັນເກີດ ຂອງທ່ານ ຄານ ແລນສະແທນເນີ (Karl Landsteiner) ນັກຊີວະວິທະຍາ ຊາວໂອຕະຣິດ ທີ່ໄດ້ເປັນຜູ້ຄົນພົບ ໝວດເລືອດ ABO ຜູ້ທໍາອິດເປັນວັນຜູ້ບໍລິຈາກເລືອດໂລກ. ຊຶ່ງໃນໄລຍະ1 ຜ່ານມາ ອົງການກາແດງແຂວງສາລະວັນ ໄດ້ສ້າງຂະບວນການໃນການເຄື່ອນໄຫວການໂຄສະນາປຸກລະດົມການບໍລິຈາກເລືອດໃນວັນສຳຄັນຕ່າງໆຂອງພັກຂອງຊາດ ເປັນຕົ້ນ: ຂະບວນການຮັບບໍລິຈາກເລືອດໃນວັນສ້າງຕັ້ງຊາວໜຸ່ມ, ວັນສ້າງຕັ້ງແມ່ຍິງລາວ, ວັນສ້າງຕັ້ງກໍາມະບານ ແລະວັນກາແດງ ແລະ ຊີກວົງເດືອນແດງສາກົນມີການເຂົ້າຮ່ວມຢ່າງເປັນຂະບວນການຟົດຟື້ນ. ຊຶ່ງ 1 ປີຜ່ານມາບໍລິຈາກເລືອດໄດ້ທັງໝົດ 1.350 ຖົງ ເທົ່າກັບ 84% ຂອງແຜນສູ້ຊົນ 1.600 ຖົງ.

ຈາກນັ້ນໃນພິທີກໍ່ໄດ້ມີກິດຈະກຳການບໍລິຈາກເລືອດແບບສະໝັກໃຈຊຶ່ງມີຜູ້ຮ່ວມບໍລິຈາກເລືອດຢ່າງເປັນຂະບວນຟົດຟຶ້ນ ແລະ ໄດ້ມີການມອບໃບຍ້ອງຍໍໃຫ້ຜູ້ບໍລິຈາກເລືອດດີເດັ່ນ-ຕໍ່ເນື່ອງ ຈຳນວນ 54 ຄົນ, ຍິງ 20 ຄົນ ທີ່ມາຈາກພະແນກການຕ່າງໆອ້ອມຂ້າງແຂວງ, ໂດຍເປັນກຽດມອບຂອງ ທ່ານ ພູທົງ ຄຳມະນີວົງ ຮອງເຈົ້າຂວງສາລະວັນ. ສຳລັບການບໍລິຈາກເລືອດໃນປີນີ້ແມ່ນປະຕິບັດຕາມຄຳຂັວນ “ ບໍລິຈາກເລືອດແມ່ນພະລັງແຫ່ງຄວາມສາມັກຄີມາຮ່ວມກັນບໍລິຈາກເລືອດເພື່ອຊ່ວຍຊີວິດ ” .

ພາບ-ຂ່າວ: ທິດລານີ ໂຄດໂຍທາ.

แชร์