ພະນັກງານຫຼັກແຫຼ່ງກຸ່ມເສດຖະກິດ ແຂວງສາລະວັນ ເຊື່ອມຊຶມມູນເຊື້ອ 2 ວັນປະຫວັດສາດ ລາວ-ຫວຽດນາມ

ໃນວັນທີ 16 ມີຖຸນາ ທີ່ຜ່ານມາ ແຂວງສາລະວັນ ຈັດພິທີປາຖະກະຖາ 2 ວັນປະຫວັດສາດ ລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບການຮ່ວມມື ຄົບຮອບ 45 ປີ (18/7/1977-18/7/2022) ໄດ້ຈັດຂຶ້ນທີ່ສະໂມສອນແຂວງ. ໂດຍໃຫ້ກຽດເຂົ້າຮ່ວມປາຖະກະຖາຂອງ ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ມີບັນດາການນຳຂອງພະແນກການ, ອົງການທຽບເທົ່າ, ລັດວິສາຫະກິດ, ທະນາຄານ ແລະ ພະນັກງານຫຼັກແຫຼ່ງຂົງເຂດເສດຖະກິດຂອງແຂວງສາລະວັນ ເຂົ້າຮ່ວມ.

ໃນພິທີ ທ່ານ ຈັນສະໝອນ ພົມມະແສງ ໄດ້ກ່າວໃນໂອກາດຫວນຄືນມູນເຊື້ອການພົວພັນຮ່ວມມືມິດຕະພາບຂອງສອງຊາດລາວ-ຫວຽດນາມ ຄັ້ງນີ້ວ່າ: ເພື່ອເປັນການສຶກສາອົບຮົມ,ໂຄສະນາ ແລະເຜີຍແຜ່ໃຫ້ພະນັກງານລັດຖະກອນ, ທະຫານ, ຕຳຫຼວດ ແລະປະຊາຊົນບັນດາເຜົ່າໂດຍສະເພາະພະນັກງານຫຼັກແຫລ່ງກຸ່ມເສດຖະກິດ ແຂວງສາລະວັນ ໃຫ້ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງເລິກເຊິງໜັກແໜ້ນ ພ້ອມກັນສືບຕໍ່ປົກປັກຮັກສາ, ເສີມຂະຫຍາຍມູນເຊື້ອອັນດີງາມຂອງສອງຊາດໃຫ້ໝັ້ນຄົງຂະໜົງແກ່ນ ເປັນສິ່ງທີ່ສຳຄັນທີ່ສຸດທີ່ພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ຈະໄດ້ສືບຕໍ່ໃນການພົວພັນຮ່ວມມື ແລກປ່ຽນບົດຮຽນນຳກັນຢ່າງຮອບດ້ານ ສ້າງຄວາມເຊື່ອໝັ້ນຊຶ່ງກັນ ແລະ ກັນພ້ອມກັນປົກປັກຮັກສາ ແລະ ສ້າງສາປະເທດຊາດຕາມເສັ້ນທາງສັງຄົມນິຍົມ. ນອກຈາກນັ້ນໄດ້ຍົກໃຫ້ເຫັນເຖິງມູນເຊື້ອປະຫວັດສາດຂອງການພົວພັນຮ່ວມມືມາແຕ່ຍາວນານ ຂອງສອງພັກສອງລັດ ແລະ ປະຊາຊົນສອງຊາດລາວ-ຫວຽດນາມ ພາຍໃຕ້ການນຳພາຂອງຜູ້ນຳສອງປະເທດທີ່ມີຄວາມກ້າຫານສະຫຼາດສ່ອງໃສເປັນຈິດໜຶ່ງໃຈດຽວກັນພ້ອມກັນຕໍ່ສູ້ເພື່ອປົດປ່ອຍປະເທດຊາດຍາດເອົາເອກະລາດຈາກພວກຈັກກະພັດຜູ້ຮຸກຮານຈົນສາມາດຍາດໄດ້ໄຊຊະນະ ແລະ ສະຖາປະນາປະເທດຂອງຕົນຂຶ້ນ. ການພົວພັນຮ່ວມມືກາຍເປັນຕົວແບບທີ່ຍິ່ງໃຫຍ່, ໄດ້ຖະໜຸຖະໜອມເພີ່ມພູນຄູນສ້າງນໍ້າໃຈສາມັກຄີມິດຕະພາບອັນຍິ່ງໃຫຍ່ ແລະ ການພົວພັນຮ່ວມມືແບບພິເສດ ຢ່າງສະເໝີຕົ້ນສະເໝີປາຍ. ແຕ່ປີ 1962 ເປັນຕົ້ນມາ ແລະ ຄວາມສາມັກຄີເປັນພີ່ນ້ອງ ລະຫວ່າງສອງຊາດ ທີ່ໄດ້ຄຽງບ່າຄຽງໄຫຼ່ກັນຕໍ່ສູ້ຢ່າງພິລະອາດຫານ, ຜ່ານຜ່າທຸກອຸປະສັກທຸລະກັນດານທີ່ເຕັມໄປດ້ວຍຄວາມເສຍສະຫຼະເລືອດເນື້ອ, ຮ່ວມສູ້ຮົບໃນຂຸມຄອງດຽວກັນ, ຮ່ວມສຸກຮ່ວມທຸກ, ຮ່ວມກັນຮົບ, ພ້ອມກັນເອົາໄຊຊະນະຕໍ່ສັດຕູຕົວດຽວກັນທີ່ເຕັມໄປດ້ວຍນໍ້າໃຈສາມັກຄີສູ້ຮົບ ແລະ ນໍ້າໃຈມິດຕະພາບ ລະຫວ່າງປະຊາຊົນສອງປະເທດພວກເຮົາ ໃນພາລະກິດຕໍ່ສູ້ກູ້ຊາດ ຊຶ່ງໄດ້ກາຍເປັນພື້ນຖານຄວາມສາມັກຄີອັນໝັ້ນແກ່ນ ແລະ ສາຍພົວພັນຮ່ວມມືຍາວນານ ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດຈົນມາໃນປັດຈຸບັນສາຍພົວພັນ ແລະການຮ່ວມມື ລາວ-ຫວຽດນາມ ຊຶ່ງໄດ້ກາຍເປັນພື້ນຖານຂອງການພົວພັນມິດຕະພາບ, ຄວາມສາມັກຄີພິເສດ ລາວ-ຫວຽດນາມ.

ສຳລັບແຂວງສາລະວັນກໍ່ໄດ້ມີການພົວພັນຮ່ວມມືກັບບັນດາແຂວງພາກກາງ, ພາກໃຕ້ ແລະບັນດາແຂວງຕ່າງໆຂອງ ສສ.ຫວຽດນາມ ພົບປະແລກປ່ຽນບົດຮຽນເຊິ່ງກັນ ແລະ ກັນ ໃນຈຳນວນ 10 ແຂວງ ຄື: ແຂວງກວາງຈີ, ແຂວງເທື່ອທຽນເຫວ້, ນະຄອນດານັງ, ແຂວງບິ່ງດິ້ງ, ແຂວງກອນຕູມ, ແຂວງກຽນຢາງ, ແຂວງດັກລັກ, ແຂວງຢາລາຍ, ແຂວງດົ່ງຖ໊າບ ແລະແຂວງບິ່ງເຝຶ໊ອກ ໃນນັ້ນ, ໄດ້ລົງນາມບົດບັນທຶກໃນຂັ້ນການນຳຂັ້ນສູງຮ່ວມກັນ 8 ແຂວງ ລວມມີ 11 ສະບັບ ແລະການຮ່ວມມືຮອບດ້ານໃນການຊຸກຍູ້ພັດທະນາເສດຖະກິດ-ສັງຄົມຂອງສອງຊາດກໍຄືແຂວງສາລະວັນດີຂຶ້ນເປັນກ້າວໆໃນແຕ່ລະໄລຍະ.

ຂ່າວ-ພາບ: ວິໄລວອນ ສິດທິໄຊ

แชร์