ເຊັນສັນຍາສ້າງຕັ້ງໂຮງງານຜະລິດແປ້ງມັນຕົ້ນ ຢູ່ແຂວງຫລວງພະບາງ

ໃນວັນທີ 13 ມິຖຸນາ ທີ່ຜ່ານມາ, ຢູ່ພະແນກແຜນການ ແລະການລົງທຶນ ແຂວງຫລວງພະບາງ ໄດ້ມີພິທີເຊັນສັນຍາສໍາປະທານທີ່ດິນຂອງລັດເຂດບ້ານຫ້ວຍຫຼາ ເມືອງນານ ເພື່ອສ້າງຕັ້ງໂຮງງານຜະລິດແປ້ງມັນຕົ້ນໂດຍການຮ່ວມລົງນາມລະຫວ່າງຝ່າຍອົງການປົກຄອງແຂວງຕາງໜ້າໂດຍທ່ານ ຈິນດາວົງ ໂພສີຄຳ ຫົວໜ້າພະແນກແຜນການ ແລະການລົງທຶນແຂວງ ແລະທ່ານ ສົມຊາຍ ດວງຈະເລີນ ອໍານວຍການບໍລິສັດ ແອວເອສ ການຄ້າ ຂາອອກ-ຂາເຂົ້າ ຈໍາກັດ ໂດຍພາກສ່ວນກ່ຽວຂ້ອງຂອງແຂວງ ຮ່ວມລົງນາມເປັນສັກຂີພິຍານ.

ໂຮງງານຜະລິດແປ້ງມັນຕົ້ນ ທີ່ຈະສ້າງຕັ້ງຄັ້ງນີ້, ມີອາຍຸສັນຍາ 30 ປີ ເລີ່ມແຕ່ວັນທີ 13 ມິຖຸນາ 2022 ເຖິງ 13 ມິຖຸນາ 2052, ມີກໍາລັງການຜະລິດ 50.000 ໂຕນຕໍ່ປີ ແລະ ອົບແຫ້ງເປືອກມັນຕົ້ນຜະລິດເປັນຫົວອາຫານ ເພື່ອຈໍາໜ່າຍພາຍໃນ ແລະຕ່າງປະ ເທດ, ໃນເນື້ອທີ່ສໍາປະທານ ທັງໝົດ 16 ຮັກຕາ, ເປັນການລົງທຶນຂອງເອກະຊົນພາຍໃນ 100% ໃນມູນຄ່າການລົງທຶນ 97 ຕື້ກວ່າກີບ, ທຶນຈົດທະບຽນ 30 ຕື້ກີບ ໂດຍປະຕິບັດພັນທະຄ່າສໍາປະທານຕາມກົດໝາຍ ແລະລະບຽບການຂອງລັດ.

ພ້ອມນີ້, ບໍລິສັດຈະສົ່ງເສີມປະຊາຊົນທີ່ມີເງື່ອນໄຂໃນເມືອງນານປູກມັນຕົ້ນປ້ອນໃຫ້ແກ່ໂຮງງານໃນຮູບແບບ 2 ບວກ 3, ທັງຈະສ້າງເສັ້ນທາງແຕ່ທາງຫລວງແຫ່ງຊາດ ຫາບ້ານຫ້ວຍຫລາ ແລະຫາໂຮງງານ. ສ່ວນການກໍ່ສ້າງໂຮງງານລວມທັງເສັ້ນທາງຕ້ອງຜ່ານການກວດກາຈາກພະແນກການກ່ຽວຂ້ອງຂອງແຂວງ ແລະບໍລິສັດເຫັນດີສະໜັບສະໜູນເງິນພັດທະນາທ້ອງຖິ່ນ ຈຳນວນ 15.000 ໂດລາຕໍ່ປີ, ເງິນພັດທະນາສັງຄົມ 10.000 ໂດລາຕໍ່ປີ.

แชร์