ຜູ້ແທນແຂວງເຊິນລາ ຢ້ຽມຢາມພົບປະການນໍາຫຼວງພະບາງ

ໃນລະຫວ່າງວັນທີ 13-14 ມິຖຸນາ 2022 ທີ່ໂຮງແຮມມະໂນລັກ ນະຄອນຫຼວງພະບາງ ສະຫາຍ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ແລະສະຫາຍ ປອ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ,ວັດທະນະທໍາ ແລະທ່ອງທ່ຽວແຂວງ ພ້ອມດ້ວຍຄະນະ ໄດ້ຕ້ອນຮັບຄະນະຜູ້ແທນແຂວງເຊິນລາ ແຫ່ງ ສສ ຫວຽດນາມ ນໍາໂດຍສະຫາຍ ນາງ ຈ້າງ ທິຊັ່ວນ ຄະນະປະຈຳພັກແຂວງ,ຮອງຈົ້າແຂວງເຊີນລາ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະເຮັດວຽກຢູ່ແຂວງຫລວງພະບາງ.

ທີ່ຫ້ອງປະຊຸມຫ້ອງວ່າການແຂວງຫຼວງພະບາງ ສະຫາຍ ບຸນເລື່ອມ ມະນີວົງ ຮອງເຈົ້າແຂວງ ກໍໄດ້ກ່າວຕ້ອນຮັບ ແລະຕີລາຄາສູງຕໍ່ການພົບປະກັນລະຫວ່າງການນໍາ ຂອງ 2 ແຂວງຄັ້ງນີ້ວ່າ: ການຢ້ຽມຢາມ ແລະພົບປະຄັ້ງນີ້ໃນໂອກາດສະເຫລີມສະຫລອງສອງວັນປະຫວັດສາດ ລາວ -ຫວຽດນາມຄື: (ວັນສົນທິສັນຍາມິດຕະພາບ ຄົບຮອບ 45 ປີ ແລະວັນສ້າງຕັ້ງສາຍພົວພັນການທູດ ຄົບຮອບ 60 ປີ) “ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022” . ຢູ່ໃນທ່າມກາງທີ່ແຂວງຫຼວງພະບາງ ພວມຈັດຕັ້ງປະຕິບັດມະຕິກອງປະຊຸມໃຫ່ຍຂອງພັກ, ແຂວງຫຼວງພະບາງ ໄດ້ສຳເລັດການເຜີຍແຜ່ເນື້ອໃນເນື່ອງໃນໂອກາດສະເຫຼີມສະຫຼອງສອງວັນປະຫວັດສາດຢູ່ບັນດາພະແນກການ, ເມືອງໂດຍພື້ນຖານ ແລະເຄື່ອນໄຫວກິດຈະກໍາຕ່າງໆ ເພື່ອສະເຫຼີມສະຫຼອງວັນດັ່ງກ່າວ, ພ້ອມດຽວກັນນີ້ກໍ່ໄດ້ເຮັດໜັງສືເຊື້ອເຊີນຄະນະຜູ້ແທນຈາກ 13 ແຂວງ ແລະ 2 ກົມກອງ ຂອງ ສສ ຫວຽດນາມ, ມາເຂົ້າຮ່ວມງານສະເຫຼີມສະຫຼອງປີມິດຕະພາບລາວ-ຫວຽດນາມ ທີ່ຈະຈັດຂຶ້ນຢູ່ແຂວງຫຼວງພະບາງ ໃນວັນທີ 18/07/2022. ພ້ອມດຽວກັນນີ້ ທ່ານ ບຸນເລື່ອມ ມະນີວົງ ກໍໄດ້ຍົກໃຫ້ເຫັນສະພາບໂດຍຫຍໍ້ຂອງແຂວງຫຼວງພະບາງເປັນໜຶ່ງໃນບັນດາແຂວງພາກເໜືອລາວ, ມີຊາຍແດນຕິດກັບ 7 ແຂວງພາກເໜືອຂອງລາວ ແລະ 02 ແຂວງຂອງ ສສ ຫວຽດນາມ, ມີເນື້ອທີ່ 16.875 ກິໂລຕາແມັດ, ລະບົບການປົກຄອງມີ 11 ເມືອງ ແລະ 1 ນະຄອນ, ພົນລະເມືອງທັງໝົດ 5 ແສນກວ່າຄົນ,ລວມຍອດຜະລິດຕະພັນພາຍໃນ (GDP) ຂອງປີຜ່ານມາບັນລຸໄດ້ 8176,5 ຕື້ກີບ, ສະເລ່ຍລາຍຮັບໃສ່ຫົວຄົນ 17,36 ລ້ານກີບ/ຄົນ/ປີ.ໃນນັ້ນ: ລວມຍອດຜະລິດຕະພັນກະສິກຳ-ປ່າໄມ້ ກວມ 40,1% ;ດ້ານອຸດສາຫະກຳ-ຫັດຖະກໍາ ກວມ 24,51% ;ດ້ານການບໍລິການ ກວມ 35,38%. ແຂວງຫຼວງພະບາງ ຖືເອົາວຽກງານການທ່ອງທ່ຽວເປັນວຽກງານບູລິມະສິດ, ເປັນເສົາຄໍ້າໃຫ້ແກ່ການພັດທະນາເສດຖະກິດ-ສັງຄົມຂອງແຂວງ, ເປັນຂະແໜງການທີ່ຊຸກຍູ້ໃຫ້ແກ່ຂະແໜງການປີ່ນອ້ອມໄດ້ຮັບການເຕີບໃຫ່ຍຂະຫຍາຍຕົວເພີ່ມຂຶ້ນຕະຫຼອດມາ.

ສໍາລັບການພົວພັນຮ່ວມມືກັບແຂວງເຊິນລາ ສສ ຫວຽດນາມ ມີຫຼາຍໂຄງການເປັນຕົ້ນແມ່ນການກໍ່ສ້າງຊັບພະຍາກອນມະນຸດ, ການໃຫ້ທຶນຊ່ວຍເຫຼືອກໍ່ສ້າງອາຄານຫ້ອງການຕ່າງໆ ໃນມູນຄ່າອັນມະຫາສານ,ການຊ່ວຍເຫຼືອການປັກຫຼັກໝາຍຖີ່ຕາມເສັ້ນຊາຍແດນ 02 ແຂວງ ແລະອື່ນໆ. ເພື່ອເຮັດໃຫ້ການພົວພັນຮ່ວມມືຂອງ 02 ແຂວງສອດຄ່ອງຕາມບົດບັນທຶກຂອງ 02ແຂວງໃຫ້ມີປະສິດທິຜົນ.

ສ່ວນໃນຕໍ່ໜ້າ 2 ແຂວງ ຈະສືບຕໍ່ແລກປ່ຽນການຢ້ຽມຢາມເຮັດວຽກຂອງການນໍາກໍ່ຄືຂະແໜງການດ້ວຍຫຼາຍຮູບການ, ຜັນຂະຫຍາຍຈັດຕັ້ງປະຕິບັດເນື້ອໃນບົດບັນທຶກທີ່ການນຳ 02 ແຂວງໄດ້ລົງນາມກັນ ໃຫ້ປະກົດຜົນເປັນຈິງ. ສືບຕໍ່ຮ່ວມມືກັນຢ່າງແໜ້ນແຟ້ນດ້ານ ປ້ອງກັນຊາດ-ປ້ອງກັນຄວາມສະຫງົບສຸກ, ພັດທະນາຮອບດ້ານ ແລະ ສ້າງເຂດຊາຍແດນຂອງ 02 ແຂວງ, ມີມາດຕະການ, ຕິດຕາມກວດກາການຂ້າມແດນຜິດກົດໝາຍຂອງພົນລະເມືອງ, ການລັກລອບຂຸດຄົ້ນຊັບພະຍາກອນທຳມະຊາດ, ບັນຫາຢາເສບຕິດ ແລະ ບັນຫາອື່ນໆ ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຕາມຂອບເຂດຊາຍແດນຂອງ 02 ແຂວງ; ສືບຕໍ່ຍົກສູງຄຸນນະພາບ ແລະ ປະສິດທິຜົນໃນການຮ່ວມມືດ້ານເສດຖະກິດ, ການຄ້າ, ວັດທະນະທຳ-ການທ່ອງທ່ຽວ, ການສຶກສາ, ສາທາລະນະສຸກ, ຄົມມະນາຄົມ ແລະ ອື່ນໆ; ຍົກສູງຄຸນນະພາບດ້ານການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງຂະແໜງການຕ່າງໆຂອງ 02 ແຂວງ ແລະໃນມໍໆນີ້ສອງຝ່າຍ ຈະຊຸກຍູ້ຂະແໜງການທີ່ກ່ຽວຂ້ອງ ເພື່ອກະກຽມບັນດາໜ້າວຽກຕ່າງໆ ໃນງານທ່ອງທ່ຽວ“ ເພງຮັກເຊີນລາ-ຫຼວງພະບາງ” ປີ2022 ທີ່ແຂວງຫຼວງພະບາງ ຈະເປັນເຈົ້າພາບຈັດຂຶ້ນໃນວັນທີ18/07/2022, ໂດຍສະເພາະແມ່ນກະກຽມດ້ານສະຖານທີ່, ເນື້ອໃນ, ແຜນການເຄື່ອນໄຫວ, ພາກສ່ວນທີ່ຈະເຂົ້າຮ່ວມງານ, ອຸປະກອນການສະແດງ, ການຮັກສາຄວາມປອດໄພ ແລະບັນຫາອື່ນໆທີ່ກ່ຽວຂ້ອງ, ເພື່ອເຮັດໃຫ້ງານດັ່ງກ່າວ ມີເນື້ອໃນ ແລະມີຄວາມຈົບງາມ.

ໂອກາດດັ່ງກ່າວນີ້ ທ່ານ ນາງ ຈ້າງ ທິຊັ່ວນ ຮອງເຈົ້າແຂວງເຊິນລາກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງການນໍາແຂວງຫຼວງພະບາງ ເຊິ່ງສະແດງເຖິງໄມຕີຈິດມິດຕະພາບ ຂອງສອງພັກສອງລັດກໍຄື ແຂວງເຊິນລາ ແລະແຂວງຫຼວງພບາງນີ້ເປັນການເພີ່ມທະວີສາຍສໍາພັນແບບພິເສດໃຫ້ແໜ້ນແຟ້ນຍິ່ງຂຶ້ນ.

ຂ່າວ: ເພັດສາຄອນ ສິມມະວົງ

แชร์