ໂຮງຮຽນອະນຸບານ-ປະຖົມ ຫຼວງປະເສີດ ຫຼັງໃໝ່ຮອງຮັບນັກຮຽນໄດ້ເຖິງ 600 ຄົນ

ໂຄງການກໍ່ສ້າງໂຮງຮຽນອະນຸບານ-ປະຖົມ ຫຼວງປະເສີດ ຫຼັງໃໝ່ຈະດຳເນີນການກໍ່ສ້າງໃຫ້ສຳເລັດໃນໄລຍະເວລາ 12 ເດືອນ ພ້ອມຈະຮອງຮັບນັກຮຽນໄດ້ເຖິງ 600 ຄົນຄຽງຄູ່ກັບການຈັດຕັ້ງປະຕິບັດການຮຽນການສອນຫຼັກສູດຂອງກະຊວງສຶກສາທິການ ແລະກິລາ. ພິເສດສຸດໃນການເປີດນຳໃຊ້ໂຮງຮຽນຫຼັງໃໝ່ຈະເສີມຄູຊຽນຊານຊາວຕ່າງຊາດສອນພາສາອັງກິດ ແລະພາສາຈີນ ແນໃສ່ຍົກສູງຄຸນນະພາບການສຶກສາໃຫ້ລູກຫຼານພໍ່ແມ່ຊາວລາວກໍຄືນະຄອນຫຼວງມີຄວາມຮູ້ຄວາມສາມາດທຽບເທົ່າກັບສາກົນເພື່ອປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດ.

ພິທີຍໍເສົາເອກ ໂຄງການກໍ່ສ້າງໂຮງຮຽນຫຼັງໃໝ່ດັ່ງກ່າວ, ໄດ້ມີຂຶ້ນເມື່ອວັນທີ 10 ມິຖຸນາ ຜ່ານມາທີ່ບ້ານໂນນຄໍ້ເໜືອ ເມືອງໄຊເຊດຖາ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ພັນເອກ ສຸພາ ອິນທະວົງ ຫົວໜ້າກົມຕຳຫຼວດຄຸ້ມຄອງຄົນຕ່າງປະເທດ,ທ່ານ ພົມມີ ໄຊຍະສານ ຫົວໜ້າຫ້ອງການສຶກສາທິການ ແລະ ກິລາ ເມືອງໄຊເຊດຖາ, ທ່ານ ສົມມະໂນນຶກ ຫຼວງປະເສີດ ປະທານກຸ່ມໂຮງຮຽນອານຸບານ-ປະຖົມຫຼວງປະເສີດ ທັງເປັນຜູ້ອໍານວຍການບໍລິສັດ ເອັດເຄ ສໍາຫຼວດອອກແບບ-ຮັບເໝົາກໍ່ສ້າງ ແລະ ທ່ານ ນາງ ພຸດທະລົງ ຫຼວງປະເສີດ ຜູ້ອໍານວຍການ ໂຮງຮຽນອານຸບານ-ປະຖົມ ຫຼວງປະເສີດ ພ້ອມດ້ວຍບັນດາແຂກຖືກເຊີນ ແລະສື່ມວນຊົນ.

ທ່ານ ຈັນທະພອນ ຫຼວງປະເສີດ ຜູ້ບໍລິຫານໂຮງຮຽນດັ່ງກ່າວໄດ້ກ່າວໃຫ້ຮູ້ເຖິງປະຫວັດຄວາມເປັນມາຂອງໂຮງຮຽນ, ຊຶ່ງໂຮງຮຽນອະນຸບານ-ປະຖົມ ຫຼວງປະເສີດ ໄດ້ຮັບການສ້າງຕັ້ງຂຶ້ນໃນປີ 2005 ຈົນມາເຖິງປັດຈຸບັນ, ຜູ້ກໍ່ຕັ້ງໂຮງຮຽນ ແມ່ນພໍ່ເຖົ້າ ດຣ ບຸນຊົມ ແລະແມ່ເຖົ້າ ບົວຄຳ ຫຼວງປະເສີດ ຊຶ່ງມີເຈດຈຳນົງ ແລະ ຄວາມຕັ້ງໃຈຢາກສ້າງໂຮງຮຽນແຫ່ງນີ້ຂຶ້ນມາເພື່ອພັດທະນາລູກຫຼານນັກຮຽນໃນຂອບເຂດນີ້ໃຫ້ໄດ້ຮັບການສຶກສາທີ່ດີ ແລະໂຮງຮຽນຫຼັງນີ້ໄດ້ສູ້ແດດຜ່ານຝົນມາຫຼາຍ 10 ປີ ຊຶ່ງອາຄານຮຽນຫຼັງທໍາອິດສາມາດສ້າງລູກຫຼານ ແລະນ້ອງນັກຮຽນໄດ້ຫຼາຍກວ່າ 17 ຮຸ່ນດ້ວຍຄວາມຮັກ ແລະຄວາມຕັ້ງໃຈທີ່ຢາກຈະພັດທະນານ້ອງນັກຮຽນໃຫ້ເປັນຄົນດີຂອງສັງຄົມນັບມາເຖິງປັດຈຸບັນກໍສືບທອດເຈດຕະນາລົມຂອງພໍ່ເຖົ້າ ແລະແມ່ເຖົ້າ ໃນການຮັບໃຊ້ວຽກງານການສຶກສາ. ດັ່ງນັ້ນ, ຈຶ່ງໄດ້ຕັດສິນໃຈເລີ່ມຕົ້ນໂຄງການພັດທະນາໂຮງຮຽນ ແລະໄດ້ຂຶ້ນແຜນກັນມາແຕ່ປີ 2018 ຈົນມາເຖິງປັດຈຸບັນ.

ທ່ານ ສົມມະໂນນຶກ ຫຼວງປະເສີດ ໄດ້ກ່າວໃນພິທີອີກວ່າ: ໂຄງການກໍ່ສ້າງໂຮງຮຽນຫຼັງໃໝ່ນີ້ ມີເນື້ອທີ່ໂຄງການທັງໝົດ 2.500 ຕາແມັດ ໂດຍມີສະຖານທີ່ຕັ້ງຢູ່ບ້ານໂນນຄໍ້ເໜືອ ເມືອງໄຊເຊດຖາ ນະຄອນຫຼວງວຽງຈັນ ເປັນອາຄານສູງ 3 ຊັ້ນ ປະກອບມີຫ້ອງຮຽນ25 ຫ້ອງ. ໃນນັ້ນ, ຊັ້ນອານຸບານມີ 6 ຫ້ອງ, ຊັ້ນປະຖົມ 10 ຫ້ອງ, ຫ້ອງພັກຄູ 1 ຫ້ອງ,ຫ້ອງປະຊຸມ1 ຫ້ອງ, ສະໂມສອນ 1 ຫຼັງ, ຫ້ອງຄອມພິວເຕີ 1 ຫ້ອງ, ຫ້ອງທົດລອງ 1 ຫ້ອງ,ຫ້ອງການ 2 ຫ້ອງ, ຫ້ອງສະໝຸດ 1 ຫ້ອງ ແລະ ໂຮງອາຫານ1 ຫຼັງ. ນອກຈາກນັ້ນ,ຢູ່ໃນເດີ່ນໂຮງຮຽນຍັງມີສະໜາມກິລາບານເຕະຫຍ້າທຽມ ເພື່ອຫຼິ້ນກິລາ ແລະ ເຮັດກິດຈະກຳນອກຫຼັກສູດຕ່າງໆ ແລະໂຮງຮຽນຍັງສາມາດຮອງຮັບນັກຮຽນໄດ້ເຖິງ 600 ຄົນ. ສໍາລັບໄລຍະເວລາໃນການກໍ່ສ້າງແມ່ນຈະໃຊ້ເວລາ 12 ເດືອນຈຶ່ງຈະສໍາເລັດສົມບູນ ແລະ ເປີດນໍາໃຊ້ເປັນທາງການໂດຍການອອກແບບ ແລະກໍ່ສ້າງດ້ວຍຄຸນນະພາບໂດຍບໍລິສັດ ເອັດເຄ ສໍາຫຼວດອອກແບບກໍ່ສ້າງເຄຫະສະຖານ ຈໍາກັດຜູ້ດຽວ.

ການກໍ່ສ້າງໂຮງຮຽນຫຼັງໃໝ່ນີ້ຍ້ອນວ່າທາງຄອບຄົວຫຼວງປະເສີດ ເຫັນໄດ້ຄວາມສໍາຄັນຂອງວຽກງານການສຶກສາເວົ້າລວມ, ເວົ້າສະເພາະໃນຂົງເຂດເມືອງໄຊເຊດຖາ ກໍຄືໃນນະຄອນຫຼວງວຽງຈັນໂດຍສະເພາະແມ່ນໃນເຂດກຸ່ມບ້ານໂນນຄໍ້ໃຫ້ມີສະຖານທີ່ການສຶກສາທີ່ໄດ້ມາດຖານ, ມີຄຸນະພາບ ແລະມີຄວາມສະດວກສະບາຍແນໃສ່ເຮັດໃຫ້ລູກຫຼານມີສະຖານທີ່ໃນການສຶກສາທີ່ດີເພື່ອປະກອບສ່ວນເຂົ້າໃນການພັດທະນາປະເທດຊາດ.

ຂ່າວ: ບຸນນິກ ມະນີ

แชร์