ເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ຮ່ວມພິທີເປີດບັ້ນແຂ່ງຂັນ “ຊອກຮູ້ກ່ຽວກັບປະຫວັດສາດການພົວພັນແບບພິເສດ ລາວ-ຫວຽດນາມ, ຫວຽດນາມ-ລາວ” ປີ 2022.

ໃນວັນທີ13 ມິຖຸນາ 2022, ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ຈັດພິທີເປີດບັ້ນແຂ່ງຂັນ “ຊອກຮູ້ກ່ຽວ ກັບປະຫວັດສາດການພົວພັນແບບພິເສດ ລາວ-ຫວຽດນາມ, ຫວຽດນາມ- ລາວ” ປີ 2022 ໂດຍການເຂົ້າຮ່ວມຂອງ ສະຫາຍ ຫງວຽນ ຈ້ອງ ເຫງ໊ຍ, ເລຂາທິການສູນກາງພັກກອມມູນິດຫວຽດນາມ, ຫົວໜ້າຄະນະໂຄສະນາສຶກສາສູນກາງ, ຮອງຫົວໜ້າຄະນະຊີ້ນຳລະດັບຊາດ “ປີສາມັກຄີມິດຕະພາບ ຫວຽດ ນາມ-ລາວ” ປີ 2022; ສະຫາຍ ເລ ຫາຍ ບິ່ງ,ກຳມະການສຳຮອງສູນກາງພັກກອມມູນິດຫວຽດນາມ, ຮອງຫົວໜ້າຄະນະໂຄສະນາສຶກສາສູນກາງ, ຮອງຫົວໜ້າຄະນະຊີ້ນຳ, ຫົວ ໜ້າຄະນະຈັດຕັ້ງການແຂ່ງຂັນ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດ ຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ, ບັນດາຜູ້ຕາງໜ້າກະຊວງ, ຂະແໜງການ ແລະພະແນກການ, ພະນັກງານຄູອາຈານພ້ອມດ້ວຍນັກສຶກສາລາວ ແລະຫວຽດນາມກຳລັງສຶກສາທີ່ສະຖາບັນການຕ່າງປະເທດເຂົ້າຮ່ວມຢ່າງພ້ອມພຽງ. ໂອກາດເຂົ້າຮ່ວມພິທີດັ່ງກ່າວ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດ ຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຕີລາຄາສູງຕໍ່ກັບການຈັດບັ້ນແຂ່ງຂັນ “ຊອກຮູ້ກ່ຽວກັບປະຫວັດສາດການພົວພັນແບບພິເສດ ລາວ-ຫວຽດນາມ, ຫວຽດນາມ-ລາວ” ປີ 2022.

ພ້ອມດຽວກັນນັ້ນສະຫາຍເອກອັກຄະລັດ ຖະທູດຍັງໄດ້ເນັ້ນຕື່ມວ່າ: ການທີ່ຄະນະໂຄສະນາສຶກສາສູນກາງພັກກອມມູນິດຫວຽດ ນາມ ຈັດຕັ້ງເປີດບັ້ນແຂ່ງຂັນຄັ້ງນີ້ ຈະເປັນການປະກອບສ່ວນອັນສໍາຄັນເຂົ້າໃນການເພີ່ມທະວີສຶກສາອົບຮົມໃຫ້ສະມາຊິກພັກ, ພະນັກງານ, ທະຫານຕໍາຫຼວດຕະຫຼອດຮອດປະຊາຊົນ ໂດຍສະເພາະຄົນຮຸ້ນໜຸ່ມຮັບຮູ້ເລິກເຊິ່ງຕື່ມກ່ຽວກັບສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ- ຫວຽດນາມ ຂອງພວກເຮົາ. ທັງມີຄວາມເຊື່ອ ໝັ້ນວ່າ ການແຂ່ງຂັນຊອກຮູ້ກ່ຽວ ກັບການພົວພັນພິເສດ 2 ຊາດພວກເຮົາໃນຄັ້ງນີ້ຈະໄດ້ຮັບຄວາມສົນໃຈຢ່າງກວ້າງຂວາງຈາກຊັ້ນຄົນຕ່າງໆ ນັບທັງຊາວໜຸ່ມເຍົາວະຊົນຈົນຮອດຜູ້ອາວຸໂສ, ທັງຈະສາມາດຂຸດຄົ້ນຊອກເຫັນອັນໂດດເດັ່ນຍອດຍິ່ງຂອງການພົວພັນພິເສດນີ້. ບັນດາຂໍ້ມູນທີ່ໄດ້ຮັບຈາກການແຂ່ງຂັນໃນຄັ້ງນີ້ຈະກາຍເປັນຄັງສາງທີ່ອຸດົມສົມບູນ ແລະມີຄວາມໝາຍທາງປະຫວັດສາດຂອງການພົວພັນ 2 ຊາດຂອງພວກເຮົາ ແລະຈະເປັນເອກະສານໄວ້ໃຫ້ຄົນຮຸ້ນຕໍ່ໆໄປໄດ້ສຶກສາຮຽນຮູ້ຕະຫຼອດໄປ. ຈາກນັ້ນ ສະຫາຍ ເລ ຫາຍ ບິ່ງ, ກຳມະ ການສຳຮອງສູນກາງພັກກອມມູນິດຫວຽດນາມ, ຮອງຫົວໜ້າຄະນະໂຄສະ ນາສຶກສາສູນກາງ, ຮອງຫົວໜ້າຄະນະຊີ້ນຳ, ຫົວໜ້າຄະນະຈັດຕັ້ງ, ຄະນະຈັດຕັ້ງບັ້ນແຂ່ງຂັນໄດ້ຢືນຢັນວ່າ: “ນໍ້າໃຈມິດຕະພາບແບບພິເສດຫວຽດນາມ - ລາວ ແມ່ນຊັບສົມບັດອັນລໍ້າຄ່າຂອງປະຊາຊົນສອງປະເທດ. ສາຍພົວພັນສາມັກຄີແບບພິເສດ ແລະການຮ່ວມມືຮອບດ້ານລະຫວ່າງ ຫວຽດນາມ-ລາວ ນັບມື້ນັບແໜ້ນແຟ້ນ ແລະພັດທະນາຢ່າງກ້ວາງຂວາງໃນຫຼາຍຂົງເຂດ, ກາຍເປັນແບບຢ່າງທີ່ເປັນເອກະລັກສະເພາະທີ່ມີໜຶ່ງດຽວໃນໂລກ.

ການແຂ່ງຂັນ “ຊອກຮູ້ກ່ຽວກັບປະຫວັດສາດການພົວພັນແບບພິເສດ ຫວຽດນາມ - ລາວ, ລາວ - ຫວຽດນາມ” ປີ 2022 ແມ່ນເຫດການການເມືອງທີ່ສຳຄັນໃນບັນດາການເຄື່ອນໄຫວເພື່ອສະເຫຼີມສະຫຼອງປີສາມັກຄີ ມິດ ຕະພາບ ຫວຽດນາມ - ລາວ ລາວ - ຫວຽດ ນາມ ປີ 2022. ຫວັງວ່າຜ່ານການເຂົ້າ ຮ່ວມການແຂ່ງຂັນ ແລະ ຕອບຄຳຖາມ, ຜູ້ອ່ານຈະຮັບຮູ້ ແລະ ເພີ່ມທະວີຄວາມເຂົ້າໃຈສອງປະເທດ ຫວຽດນາມ - ລາວ ລາວ - ຫວຽດນາມ ແລະປະຊາຊົນສອງປະເທດຫວຽດນາມ ແລະລາວ, ຈະໄດ້ຮຽນຮູ້ກ່ຽວກັບບາດກ້າວການພັດທະນາ ແລະການເຊື່ອມໂຍງຂອງສອງປະເທດກ່ຽວກັບປະຫວັດສາດແຫ່ງການພົວພັນແບບພິເສດ, ຄວາມສະໜິດຕິດພັນລະ ຫວ່າງສອງປະເທດ, ມິດຕະພາບທີ່ເປັນມູນເຊື້ອອັນໝັ້ນຄົງເຂັ້ມແຂງ, ເປັນມູນເຊື້ອຂອງສອງພັກ, ສອງລັດ ແລະປະຊາຊົນສອງປະເທດຫວຽດນາມ - ລາວທີ່ມີມາແຕ່ດົນນານໃຫ້ເລີກເຊີ່ງກວ່າເກົ່າ.

ຂ່າວ, ພາບ: ໂອລຳ ຈັນທະວິໄລ

แชร์