ຊຽງຂວາງ ປິດບັ້ນກວດສອບບົດສະຫຼຸບຂາດຕົວການປະຕິບັດແຜນງົບປະມານແຫ່ງລັດ ປີ 2021

ໃນວັນທີ 13 ມິຖຸນາ 2022 ຊຽງຂວາງ ຈັດກອງປະຊຸມປິດບັ້ນກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງຊຽງຂວາງປະຈຳປີ 2021 ໂດຍການເປັນປະທານຂອງ ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງໆຊຽງຂວາງ, ຜູ້ຊີ້ນຳວຽກງານເສດຖະກິດ, ທ່ານ ຊົມຊື່ນ ໄຊເກີຢ່າຈົງຕົວ ປະທານອົງການກວດສອບປະຈຳພາກເໜືອ, ຜູ້ຊີ້ນຳຄະນະກວດສອບແຫ່ງລັດ, ມີຫົວໜ້າຮອງຫົວໜ້າພະແນກ ແລະພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ, ທ່ານ ລູກສອນ ພອນສະຫວັດ ຫົວໜ້າຄະນະກວດສອບໄດ້ຜ່ານເນື້ອໃນຜົນການກວດສອບຄືນຕາມມະຕິສະພາປະຊາຊົນແຂວງ, ການຈັດຕັ້ງປະຕິບັດຄຳແນະນຳຂອງຄະນະກວດສອບສົກປີຜ່ານມາ ແລະຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021, ຜ່ານການກວດກາຄືນການຈັດຕັ້ງປະຕິບັດບັນດາມາດຕະການ ແລະຄຳແນະນຳກວດສອບໃນປີຜ່ານມາ, ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2020 ເຫັນວ່າບັນດາຫົວໜ່ວຍງົບປະມານທີ່ຖືກກວດສອບໄດ້ມີຄວາມພະຍາຍາມໃນການປະຕິບັດໜ້າທີ່ວຽກງານທີ່ຖືກຕ້ອງສອດຄ່ອງກັບລະບຽບ, ກົດໝາຍ ແລະບັນດານິຕິກຳທາງດ້ານການເງິນເປັນຕົ້ນການປະຕິບັດບັນດາລະບຽບຫລັກການດ້ານການຄຸ້ມຄອງງົບປະມານແຫ່ງລັດຢ່າງເປັນລະບົບ, ສາມາດສະຫລຸບຖານະການເງິນໄດ້ສຳເລັດຕາມກຳນົດເວລາ ແລະໄດ້ເອົາໃຈໃສ່ປັບປຸງແກ້ໄຂ ຕາມຄຳແນະນຳຂອງຄະນະກວດສອບໄດ້ຈຳນວນໜຶ່ງ.

ຈາກນັ້ນ, ປະທານກອງປະຊຸມໄດ້ມີຄຳເຫັນໂດຍເນັ້ນໃຫ້ພາກສ່ວນກ່ຽວຂ້ອງສືບຕໍ່ປັບປຸງແກ້ໄຂໃຫ້ສຳເລັດຢ່າງຂາດຕົວ, ບົດສະຫລຸບຂາດຕົວການຈັດຕັ້ງປະຕິບັດແຜນງົບປະ ມານແຫ່ງລັດຂອງແຂວງ ປະຈຳປີ 2021 ໃຫ້ຖືກຕ້ອງຕາມລະບຽບກົດໝາຍ ແລະ ນິຕິກຳທີ່ຕິດພັນກັບການຄຸ້ມຄອງການເກັບລາຍຮັບ ແລະການຄຸ້ມຄອງລາຍຈ່າຍໃຫ້ເຂັ້ມງວດ, ສືບຕໍ່ປະສານງານ, ປຶກສາຫາລືເພື່ອຊອກທິດທາງແກ້ໄຂຢ່າງເປັນເອກະພາບ, ເປັນເຈົ້າການກວດສອບດ້ວຍຕົນເອງ, ເລັ່ງທວງລາຍຮັບເຂົ້າງົບປະມານ, ກະກຽມຂໍ້ມູນເຂົ້າກອງປະຊຸມສະພາແຂວງ ແລະ ຖືເອົາຄວາມຮັບຜິດຊອບເປັນພື້ນຖານແກ້ໄຂໃນແຕ່ລະຂົງເຂດວຽກງານເພື່ອເຮັດໃຫ້ວຽກງານດັ່ງກ່າວມີຜົນສຳເລັດຕາມຄາດໝາຍທີ່ວາງໄວ້.

ຂ່າວ: ບຸນມີ ແສງທຸມມີ

แชร์