ຫຼາຍສາເຫດເຮັດໃຫ້ການລົງທືນຂອງລັດ ບໍ່ໄປຕາມໂຄງການປະກອບການລົງທືນ

   ທ່ານສຸພັນແກ້ວມີໄຊລັດຖະມົນຕີກະຊວງແຜນການແລະການລົງທຶນໄດ້ຊີ້ແຈງກ່ຽວກັບການຈັດສັນງົບປະມານການລົງທຶນຂອງລັດປີ 2018 ທີ່ບໍ່ໄປຕາມມະຕິຂອງກອງປະຊຸມສະພາແຫ່ງຊາດສະບັບເລັກທີ 075/ສພຊ ແລະ ທິດທາງໃນປີ 2019 ຕໍ່ກອງປະຊຸມສະໄໝສາມັນເທື່ອທີ 6 ວ່າ:ໂຄງປະກອບການລົງທຶນພາຍໃນຂອງລັດ (ບ້ວງປົກກະຕິ) ປະ ຈຳປີ 2019 ຈະບໍ່ໄປຕາມໂຄງປະກອບການລົງທຶນຄືປີຜ່ານມາ,ສຳລັບປີ 2018 ຍ້ອນວ່າການກຳນົດຂອບແມ່ນກຳນົດເພື່ອເປັນທິດ ແນະນຳໃຫ້ບັນດາກະຊວງ,ອົງການແລະທ້ອງຖິ່ນໃຫ້ມີຈຸດສຸມໃນການຈັດສັນທຶນໃນການແກ້ໄຂໜີ້,ໂຄງການສືບຕໍ່ແລະສະເໜີໜີ້ໃໝ່ (ລວມທຶນພັດທະນາຊົນນະບົດແລະແກ້ໄຂຄວາມທຸກຍາກ) ແຕ່ຍ້ອນລັດຖະບານໄດ້ຕົກລົງໃຫ້ຊຳລະໜີ້ນອກຈາກບ້ວງປົກກະຕິ,ອວ່າຍໜີ້ 3 ແຈ,ດ້ວຍເງິນສົດແລະອອກພັນທະບັດໄລຍະປີ 2017 ຊຶ່ງຖ້າຄິດໄລ່ທຸກແຫ່ງໜີ້ສິນແມ່ນໄດ້ຮັບການແກ້ໂຂເຖິງ 3.700 ຕື້ກີບເຮັດໃຫ້ໜີ້ສິນຫຼຸດລົງໃນລະດັບໜຶ່ງ.

   ສຳລັບປີ 2019 ອີງຕາມທິດຊີ້ນຳຂອງລັດຖະບານແມ່ນໃຫ້ຖືເອົາງົບປະມານເປັນໂຕຕັ້ງໃນການສ້າງແຜນ ຫຼື ຂຶ້ນແຜນລາຍຈ່າຍ,ແຜນການລົງທຶນຂອງລັດກໍ່ເຊັ່ນ ກັນ,ສຳລັບໂຄງປະກອບຈະໄດ້ສຸມໃສ່ແກ້ໄຂບັນຫາແລະຂໍ້ຄົງຄ້າງໃນປີ 2018 ໂດຍສະເພາະແມ່ນສຸມໃສ່ຟື້ນຟູພື້ນຖານໂຄງລ່າງທີ່ໄດ້ຮັບຜົນກະທົບຈາກໄພນ້ຳຖ້ວມເພື່ອກັບຄືນສູ່ສະພາບປົກກະຕິແລະສາມາດນຳໃຊ້ໄດ້,ຈັດສັນທຶນໃສ່ການຊົດເຊີຍໂຄງການກໍ່ສ້າງທາງລົດໄຟລາວ-ຈີນ,ສຸມໃສ່ແກ້ໄຂໜີ້ແລະໂຄງການສືບຕໍ່ຈຳນວນໜຶ່ງ,ສ່ວນໂຄງການໃໝ່ໃຫ້ຊະລໍໄປກ່ອນ,ຈະພິຈາລະນາພຽງແຕ່ໂຄງການຍຸດທະສາດປ້ອງກັນຊາດທີ່ຈຳເປັນທີ່ສຸດເທົ່ານັ້ນ.

   ສຳລັບທຶນພັດທະນາຊົນນະບົດແລະລົບລ້າງຄວາມທຸກຍາກລວມທັງໝົດມີປະມານ 1.300 ໂຄງ ການມູນຄ່າ 2.297 ຕື້ກວ່າກີບໃນນັ້ນທຶນຮ່ວມມືລາວ-ຈີນ ບ້ວງ 4 ຕື້ຢວນທີ່ຈະໃຫ້ການຊ່ວຍເຫຼືອໃນລະຫວ່າງ 2018-2020 ໄດ້ ຄົ້ນຄວ້ານຳສະເໜີ 682 ໂຄງ ການ,ສຳລັບປີ 2019 ຄາດຈະ ໄດ້ຮັບທຶນຈຳນວນ 1.913 ຕື້ກີບ,ທຶນຈາກບັນດາຄູ່ຮ່ວມມື 212 ຕື້ ກວ່າກີບ,ທຶນປົກກະຕິ 112 ຕື້ກີບ ຊຶ່ງສຸມໃສ່ 20 ຈຸດສຸມທີ່ສູນກາງ ຄຸ້ມຄອງແຕ່ປະຕິບັດຢູ່ທ້ອງຖິ່ນ 36,91 ຕື້ກີບ, 71 ຈຸດສຸມທີ່ທ້ອງຖິ່ນຄຸ້ມຄອງ 75 ຕື້ກວ່າກີບ,ທຶນທີ່ບັນດາກະຊວງ,ແຂວງຈັດສັນທຶນໃຫ້ແກ່ໂຄງການພັດທະນາຊົນນະບົດແລະແກ້ໄຂຄວາມທຸກຍາກປະມານ 60 ຕື້ກີບ, ນອກນີ້ຍັງມີທຶນຈາກການປ່ອຍສິນເຊື່ອຂອງທະນາຄານນະໂຍບາຍແລະທຶນອື່ນໆອີກ.

    ການພິຈາລະນາທຶນໃນຂົງເຂດການສຶກສາແລະສາທາລະນະສຸກຕ້ອງສົມທຽບທຶນທັງໝົດທີ່ໄດ້ຮັບທັງຢູ່ສູນກາງແລະທ້ອງຖິ່ນລວມທັງທຶນພາຍໃນແລະທຶນຊ່ວຍ ເຫຼືອຈາກຕ່າງປະເທດ,ຕາມການ ສັງລວມ 2 ພາກສ່ວນ (ກະຊວງ ການເງິນແລະກະຊວງແຜນການ) ສະຫຼຸບໄດ້ຄື:ຈັດສັນໃຫ້ຂະແໜງສຶກສາມູນຄ່າ 3.898 ຕື້ກວ່າກີບເທົ່າກັບ 12,35% ຂອງລາຍ ຈ່າຍທັງໝົດເຫັນວ່າເພີ່ມຂຶ້ນເລັກ ນ້ອຍ (ປີ 2018 ໄດ້ຮັບ 12,30%),ຈັດໃຫ້ຂະແໜງສາທາເທົ່າກັບປີທີ່ຜ່ານມາຈຳນວນ 2.061 ຕື້ກີບເທົ່າກັບ 7,64% ຂອງລາຍຈ່າຍທັງໝົດ.

   ສ່ວນໂຄງປະກອບການລົງທຶນຂອງລັດ(ພາຍໃນ) ລະຫວ່າງ ສູນກາງແລະທ້ອງຖິ່ນແມ່ນໄດ້ ຕາມມາດຕາ 24 ຂອງກົດໝາຍວ່າດ້ວຍການລົງທຶນຂອງລັດຄື: ສູນກາງຈະໄດ້ຮັບທຶນທັງໝົດ 49% ແລະທ້ອງຖິ່ນໄດ້ຮັບ 51%.

แชร์