ກະຊວງການເງິນ-ຮສສ ຮ່ວມມືສະໜອງຂໍ້ມູນດ້ານແຮງງານ ແບບທັນສະໄໝ

ກະຊວງການເງິນ ແລະ ກະຊວງແຮງງານ ແລະສະຫວັດດີການສັງຄົມ(ຮສສ) ໄດ້ຕົກລົງຮ່ວມມືກັນໃນການຈັດຕັ້ງປະຕິບັດການເຊື່ອມຕໍ່ຂໍ້ມູນ ແລະ ສະໜອງຂໍ້ມູນ ເພື່ອຮ່ວມກັນສ້າງ ແລະບໍລິຫານຂໍ້ມູນດ້ານແຮງງານແບບທັນສະໄໝ ຫຼືລະບົບດີຈີຕອນຂອງ ສປປ ລາວ ໂດຍກະຊວງ ຮສສ ຕາມຍຸດທະສາດຫັນເປັນທັນສະໄໝຂອງລັດຖະບານ ໂດຍນຳໃຊ້ເຕັກໂນໂລຊີທີ່ທັນສະໄໝເຂົ້າໃນວຽກງານການເກັບກຳຂໍ້ມູນ ແລະຮັກສາຂໍ້ມູນແຮງງານ,ການຕິດຕາມການເຄື່ອນໄຫວຂອງຕະຫລາດແຮງງານ, ການລາຍງານຕົວເລກດ້ານແຮງງານ ທີ່ລວມເອົາທັງແຮງງານລາວ ແລະແຮງງານຕ່າງປະເທດທີ່ເຮັດວຽກຢູ່ ລາວ.

ການລົງນາມໃນບົດບັນທຶກຄວາມເຂົ້າໃຈລະຫວ່າງສອງກະຊວງໄດ້ມີຂຶ້ນໃນວັນທີ 13 ມິຖຸນາ 2022 ໂດຍທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ, ກະຊວງການເງິນ ແລະ ທ່ານ ນາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ (ຮສສ), ໃຫ້ກຽດເຂົ້າຮ່ວມໂດຍທ່ານ ປອ ບຸນເຫຼືອ ສິນໄຊວໍລະວົງ ຮອງລັດຖະມົນຕີກະຊວງການເງິນ ແລະທ່ານ ພົງໄຊສັກ ອິນຖາລາດ ຮອງລັດຖະມົນຕິກະຊວງ ຮສສ.

ການເຊັນບົດບັນທຶກຄວາມເຂົ້າໃຈຄັ້ງນີ້ກໍເພື່ອຮັບປະກັນໃຫ້ການບໍລິຫານແຮງງານດ້ວຍລະບົບຖານຂໍ້ມູນທີ່ທັນສະໄໝທີ່ມີລັກສະນະແບບຄົບວົງຈອນສາມາດເຊື່ອມໂຍງຂໍ້ມູນກັບບັນດາກະຊວງ ແລະທຸກພາກສ່ວນທີ່ກ່ຽວຂ້ອງ; ແກ້ໄຂບັນຫາທາງດ້ານແຮງງານໂດຍສະເພາະແມ່ນແກ້ໄຂການວ່າງງານ,ການຂາດແຄນແຮງງານ, ການຂຶ້ນທະບຽນຮັບສະໝັກງານ, ການປະກາດຕຳແໜ່ງງານວ່າງລວມທັງການບັນຈຸງານ; ພ້ອມນັ້ນຜູ້ອອກແຮງງານລາວ ແລະແຮງງານຕ່າງປະເທດທີ່ເຮັດວຽກໃນບັນດາຫົວໜ່ວຍແຮງງານ, ໂຄງການລົງທຶນພາຍໃນ ແລະຕ່າງປະເທດຈະໄດ້ຮັບການຄຸ້ມຄອງດ້ວຍການຂຶ້ນທະບຽນເປັນຜູ້ອອກແຮງງານ. ອອກເລກລະຫັດຜູ້ເສຍອາກອນລາຍໄດ້, ການສະໜອງຂໍ້ມູນແຮງງານ, ສັນຍາແຮງງານ, ພຶ້ນຖານເງິນເດືອນຂອງແຮງງານລາວ ແລະຕ່າງປະເທດເພື່ອເກັບກຳຈຳນວນລົງໃນລະບົບຖານຂໍ້ມູນຢ່າງຄົບຖ້ວນ ແລະທົ່ວເຖິງ.

ສິ່ງສໍາຄັນແມ່ນໃຫ້ສາມາດກວດກາຕິດຕາມຜູ້ອອກແຮງງານທີ່ເຮັດວຽກໃນຫົວໜ່ວຍແຮງງານ, ຕິດຕາມການເຄື່ອນໄຫວການປະກອບອາຊີບອິດສະຫຼະ, ຕິດຕາມການປະກັນຕົນໃນລະບົບປະກັນສັງຄົມ, ຕິດຕາມການເຂົ້າ-ອອກຂອງແຮງງານ ຫຼືການເຄື່ອນຍ້າຍບ່ອນເຮັດວຽກທີ່ບໍ່ຖືກຕ້ອງຕາມກົດໝາຍ, ປ້ອງກັນ ແລະແກ້ໄຂບັນຫາການຍາດແຮງງານກັນຂອງຜູ້ໃຊ້ແຮງງານລວມທັງການໃຫ້ປະຕິບັດພັນທະຕ່າງໆຂອງແຮງງານ, ແນໃສ່ປົກປ້ອງສິດ ແລະຜົນປະໂຫຍດຂອງຜູ້ອອກແຮງງານ, ຜູ້ໃຊ້ແຮງງານ ແລະຂອງລັດຖະບານຕາມກົດໝາຍ ແລະລະບຽບການທີ່ກ່ຽວຂ້ອງ.

• 13/06/2022