ທຸລະກິດບໍລິການທ່ອງທ່ຽວຢູ່ເມືອງວັງວຽງ ເລີ່ມຟື້ນຕົວດີຂຶ້ນຢ່າງຕໍ່ເນື່ອງ

           ເມືອງວັງວຽງ ຖືເປັນເມືອງຍອດນິຍົມແຫລງທ່ອງທ່ຽວຂອງລາວ ທີ່ແຂກພາຍໃນ ແລະ ຕ່າງປະເທດຮູ້ຈັກກັນດີ  ປະຈຸບັນທາງລັດຖະບານວາງອອກໃນແຕ່ລະໄລຍະ ແລະ ຫລ້າສຸດໄດ້ຕົກລົງເປີດປະເທດເຕັມຮູບແບບໃນວເຮັດໃຫ້ບັນດາຫົວໜ່ວຍທຸລະກິດບໍລິການທ່ອງທ່ຽວຢູ່ ເມືອງວັງວຽງຈັນ, ແຂວງວຽງຈັນ ເລີ່ມຟື້ນຕົວດີຂຶ້ນຢ່າງຕໍ່ເນື່ອງ ໂດຍມີ ລົດໄຟລາວ-ຈີນ ແລະ ທາງດ່ວນ, ຈາກນະ ຄອນຫລວງວຽງຈັນ ຫາ ວັງວຽງ ທີ່ປະກອບສ່ວນສໍາຄັນເຮັດໃຫ້ນັກທ່ອງທ່ຽວເຂົ້າໄປທ່ອງທ່ຽວເມືອງວັງວຽງ ເພີ່ມຂຶ້ນ ຍ້ອນການເດີນທາງທີ່ສະດວກສະບາຍ. 

   ທ່ານ ຫົງຄໍາ ແກ້ວດວງສີ, ປະທານບໍລິສັດ ທ່ອງທ່ຽວ ນໍ້າທິບ ຈໍາກັດ, ທັງເປັນຜູ້ຈັດການ ບໍລິສັດ ລາວຟຣາຍອິງມີເດຍ ຈໍາກັດ ໃຫ້ສໍາພາດວ່າ: ສະເພາະບໍລິສັດຂອງທ່ານທັງ ສອງບໍລິສັດ ໄດ້ກັບຄືນມາເປີດບໍລິການຮັບໃຊ້ນັກທ່ອງ ທ່ຽວເປັນປົກກະ ຕິແລ້ວ ພາຍຫລັງຕ້ອງປິດກິດຈະການດົນສົມຄວນ ຍ້ອນການລະບາດຂອງພະຍາດໂຄວິດ-19. ສະເພາະບໍລິສັດ ທ່ອງທ່ຽວ ນໍ້າທິບ ຈໍາກັດ ໄດ້ບໍລິການເຮືອກາຍັກ ເຊີ່ງມີເຮືອ 75 ລໍາ ແລະ ການບໍລິການຂີ່ສະລິງຢູ່ຖໍ້າປູຄໍາ, ສ່ວນ ບໍລິສັດ ລາວຟຣາຍອິງມີເດຍ ຈໍາກັດ ແມ່ນບໍລິການຂີ່ບາລູນ ເຊີ່ງເປັນພຽງບໍລິສັດດຽວທີ່ໃຫ້ບໍລິ ການບາລູນຢູ່ເມືອງວັງວຽງ ກໍຄື ຢູ່ໃນລາວ. ປັດຈຸບັນ ເຫັນວ່ານັກທ່ອງທ່ຽວໄດ້ເຂົ້າໄປໃຊ້ການບໍລິການບໍລິສັດຂອງທ່ານນັນມື້ເພີ່ມຂຶ້ນ ໂດຍສະເພາະໃນໄລຍະທ້າຍອາທິດ, ສະເລ່ຍແລ້ວອາທິດໜຶ່ງບໍ່ຫລຸດ 100 ຄົນ, ສ່ວນບາລູນ ໄດ້ບໍລິການ 2-3 ຖ້ຽວຕໍ່ 1 ອາທິດ ເຊີ່ງເກືອບທັງໝົດແມ່ນນັກທ່ອງທ່ຽວພາຍໃນປະເທດ.

      ທ່ານກ່າວຕື່ມວ່າ: ຈໍານວນນັກທ່ອງທ່ຽວທີ່ເຂົ້າໄປໃຊ້ການບໍລິການຂອງບໍລິສັດທ່ານ ເຖີງວ່າຍັງບໍ່ຫລາຍເມື່ອທຽບໃສ່ໄລຍະກ່ອນເກີດການລະບາດຂອງພະຍາດໂຄວິດ-19 ແຕ່ຖືວ່າເປັນຈໍານວນທີ່ເພີ່ມຂຶ້ນ ເພາະການບໍລິ ການນັກທ່ອງທ່ຽວໃນໄລຍະນີ້ ແມ່ນປະຕິບັດຄວບຄູ່ກັບມາດຕະການປ້ອງກັນພະຍາດດັ່ງກ່າວ ດ້ວຍການຮັບນັກທ່ອງທ່ຽວເປັນກຸ່ມໃຜກຸ່ມລາວໃນແຕ່ລະກິດຈະກໍາ  ໝາຍຄວາມວ່າ ບໍ່ໃຫ້ນັກທ່ອງທ່ຽວແຕ່ລະກຸ່ມສັບປົນກັນໃນແຕ່ ລະກິດຈະກໍາ ເພື່ອຫລຸດຜ່ອນຄວາມສ່ຽງໃນການຕິດເຊື້ອພະຍາດທີ່ອາດຈະເກີດຂຶ້ນ.  ຢ່າງໃດກໍຕາມ ພາຍຫລັງທີ່ລັດຖະບານເປີດປະເທດເຕັມຮູບແບບ ເຫັນວ່າມີບໍລິສັດທ່ອງທ່ຽວຈາກໄທ ແລະ ສ.ເກົາຫລີ ທີ່ເຄີຍນໍາເອົານັກທ່ອງ ທ່ຽວຕ່າງປະເທດມາໃຊ້ບໍລິການບໍລິສັດຂອງທ່ານມາກ່ອນ ໄດ້ຕິດຕໍ່ພົວພັນຫາເພື່ອຈະເອົານັກທ່ອງທ່ຽວມາທ່ອງທ່ຽວເມືອງວັງວຽງ ແລະ ໃຊ້ການບໍລິການບໍລິສັດຂອງທ່ານແລ້ວຫລາຍສົມຄວນ ແລະ ຄາດວ່າຈະເດີນທາງມາໃນໄວໆ ນີ້.

        ທ່ານ ຫົງຄໍາ ແກ້ວດວງສີ ຍັງໄດ້ເວົ້າເຖີງການເປີດນໍາໃຊ້ລົດໄຟລາວ-ຈີນ ແລະ ທາງດ່ວນຈາກນະຄອນຫລວງວຽງຈັນ ຫາ ວັງວຽງ ວ່າ ເປັນການເປີດນໍາໃຊ້ທີ່ຄຸ້ມຄ່າ ແລະ ມີປະສິດທິທີ່ສຸດ ຍ້ອນພາຍຫລັງເປີດນໍາໃຊ້ເສັ້ນທາງຄົມ ມະນາຄົມທັງ 2 ແຫ່ງ ເຮັດໃຫ້ນັກທ່ອງທ່ຽວເດີນທາງເຂົ້າໄປທ່ອງທ່ຽວເມືອງວັງວຽງ ເພີ່ມຂຶ້ນຢ່າງຫລວງຫຼາຍ, ໃນນັ້ນ ຕາມການສອບຖາມນັກທ່ອງທ່ຽວທີ່ໄປໃຊ້ການບໍລິການບໍລິສັດຂອງທ່ານໃນໄລຍະຫລັງມານີ້ ສ່ວນ ໃຫຍ່ແມ່ນເດີນທາງດ້ວຍລົດໄຟລາວ-ຈີນ ແລະ ທາງດ່ວນດັ່ງກ່າວ. ເຊີ່ງທ່ານເຊື່ອໝັ້ນວ່າ: ທັງລົດໄຟລາວ-ຈີນ ແລະ ທາງດ່ວນ ຈະສືບຕໍ່ເປັນສ່ວນສໍາຄັນໃນການເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນ ທາງເຂົ້າໄປທ່ອງທ່ຽວເມືອງວັງວຽງ ນັບມື້ເພີ່ມຂຶ້ນໃນຕໍ່ໜ້າ, ເຊັ່ນດຽວກັບບໍລິສັດຂອງທ່ານ ຈະມີນັກທ່ອງທ່ຽວໄປໃຊ້ບໍລິການເພີ່ມຂຶ້ນເຊັ່ນດຽວກັນ ເພາະປັດຈຸບັນ ໄດ້ພົວພັນກັບບັນດາບໍລິສັດນໍາທ່ຽວໃນການນໍາເອົານັກທ່ອງທ່ຽວຕ່າງປະເທດເຂົ້າມາລາວ ກໍຄື ເມືອງວັງວຽງ ແລ້ວຫລາຍສົມຄວນ. ຂະນະທີ່ ການບໍລິການທຸກກິດຈະກໍາທີ່ບໍລິສັດຂອທ່ານບໍລິການ ໄດ້ຮັບການປັບປຸງ ແລະ ກຽມພ້ອມແລ້ວທີ່ຈະຕ້ອນຮັບນັກທ່ອງທ່ຽວທີ່ຈະໄປໃຊ້ບໍລິການ.

แชร์