ທ່ານ ສີຈິ້ນຜິງ ໃຫ້ກຳລັງໃຈແກ່ນັກສຶກສາທີ່ຮຽນຈົບຈາກມະຫາວິທະຍາໄລວ່າ: ຂໍພຽງແຕ່ມີອຸດົມການກໍຈະມີພາລະກິດ

ປີ 2022 ນີ້, ຄາດວ່ານັກສຶກສາທີ່ຮຽນຈົບຈາກມະຫາວິທະຍາໄລຈະບັນລຸເຖິງ 10.760.000 ຄົນ ເພີ່ມຂຶ້ນ 1.670.000 ຄົນເມື່ອທຽບໃສ່ໄລຍະດຽວກັນຂອງປີກາຍ, ຖືວ່າໄດ້ສ້າງສະຖິຕິໃໝ່ໃນປະຫວັດສາດ.

ທ່ານ ສີຈິ້ນຜິງ ສຸດທີ່ເອົາໃຈໃສ່ຕໍ່ສະພາບການປະກອບອາຊີບຂອງນັກສຶກສາທີ່ຮຽນຈົບຈາກມະຫາວິທະຍາໄລ, ວັນທີ 8 ມິຖຸນານີ້, ໃນໄລຍະສຳຫຼວດກວດກາວຽກງານຢູ່ແຂວງເສສວນ, ທ່ານ ສີຈິ້ນຜິງ ໄດ້ເດີນທາງໄປສຳຫຼວດຄົ້ນຄວ້າວຽກງານຢູ່ມະຫາວິທະຍາໄລອີປິ່ນ, ເພື່ອກວດກາເບິ່ງການວາງສະແດງຜົນງານຕົວແທນແຫ່ງການປະດິດສ້າງ ແລະການສ້າງທຸລະກິດຂອງນັກສຶກສາທີ່ຈະຮຽນຈົບຈາກມະຫາວິທະຍາໄລ ພ້ອມທັງຮັບຮູ້ສະພາບວຽກງານບໍລິການຈັດຫາວຽກເຮັດງານທຳແລະການສ້າງທຸລະກິດຂອງມະຫາວິທະຍາໄລແຫ່ງນີ້.

ຢູ່ຫ້ອງໂຖງໃຫຍ່ສຳຫຼັບການສະໝັກງານສະເພາະຂອງມະຫາວິທະຍາໄລອີປິ່ນກຳລັງຈັດພິທີໂຄສະນາການສະໝັກງານຂອງວິສາຫະກິດ, ທ່ານ ສີຈິ້ນຜິງ ໄດ້ສອບຖາມຄູອາຈານ, ນັກສຶກສາ ແລະຜູ້ຮັບຜິດຊອບວິສາຫະກິດເພື່ອຮັບຮູ້ສະພາບການຕ່າງໆ ເຊັ່ນ: ຄວາມຮຽກຮ້ອງຕ້ອງການຂອງວິສາຫະກິດໃນການຈ້າງງານ, ອັດຕາການເຊັນສັນຍາຈ້າງຂອງນັກສຶກສາແລະອື່ນໆ. ທ່ານ ສີຈິ້ນຜິງ ເນັ້ນໜັກວ່າ: ສູນກາງພັກເອົາໃຈໃສ່ເປັນຢ່າງສູງຕໍ່ການປະກອບອາຊີບຂອງນັກສຶກສາທີ່ຮຽນຈົບຈາກມະຫາວິທະຍາໄລ, ໂດຍໄດ້ນຳໃຊ້ນະໂຍບາຍແລະມາດຕະການຕ່າງໆ. ປັດຈຸບັນກຳລັງຢູ່ໃນໄລຍະສຳຄັນແຫ່ງການຊອກຫາວຽກເຮັດງານທຳຂອງນັກສຶກສາທີ່ຮຽນຈົບຈາກມະຫາວິທະຍາໄລ, ຕ້ອງຂຸດຄົ້ນຊັບພະຍາກອນຈັດຫາວຽກເຮັດງານທຳຕື່ມອີກ, ປະຕິບັດວຽກງານບໍລິການແລະຊີ້ນຳການຈັດຫາວຽກເຮັດງານທຳຢ່າງລະອຽດ ແລະໃຫ້ເປັນຮູບປະທຳ, ໂຮງຮຽນ, ວິສາຫະກິດແລະພາກສ່ວນທີ່ກ່ຽວຂ້ອງຕ້ອງກຳແໜ້ນວຽກງານເຊັນສັນຍາຈ້າງງານນັກສຶກສາທີ່ຮຽນຈົບຈາກມະຫາວິທະຍາໄລໃຫ້ດີ, ໂດຍສະເພາະຕ້ອງຖືເອົານັກສຶກສາທີ່ຮຽນຈົບຈາກມະຫາວິທະຍາໄລທີ່ມາຈາກຄອບຄົວທຸກຍາກ, ຄອບຄົວທີ່ເຂົ້າເຖິງລະບົບຮັບປະກັນຊີວິດການເປັນຢູ່ຂັ້ນຕໍ່າສຸດ, ຄອບຄົວທີ່ບໍ່ມີສະມາຊິກປະກອບອາຊີບພ້ອມດ້ວຍນັກສຶກສາທີ່ເປັນຄົນພິການ ແລະຍັງບໍ່ທັນຊອກຫາວຽກເຮັດງານທຳໄດ້ເປັນໄລຍະຍາວນັ້ນ ເປັນເປົ້າໝາຍສຳຄັນທີ່ຕ້ອງໃຫ້ການຊ່ວຍເຫຼືອ.

ທ່ານ ສີຈິ້ນຜິງ ໄດ້ເວົ້າກັບນັກສຶກສາທັງຫຼາຍວ່າ: ຊີວິດການເປັນຢູ່ທີ່ມີຄວາມສຸກແມ່ນສ້າງຂຶ້ນດ້ວຍການອອກແຮງງານ, ພວກສະຫາຍຄວນຮັກສາຈິດໃຈເບິ່ງໂລກໃນທາງທຳມະດາ, ເບິ່ງເງື່ອນໄຂສ່ວນຕົວເອງແລະຄວາມຮຽກຮ້ອງຕ້ອງການທາງສັງຄົມຢ່າງພາວະວິໄສ, ຄັດເລືອກອາຊີບແລະຕຳແໜ່ງງານຈາກເງື່ອນໄຂຕົວຈິງ, ຮັກການອອກແຮງງານ, ເຮັດແທ້ທຳຈິງເພື່ອເຕີບໃຫຍ່ຂຶ້ນເປັນກ້າວໆຈາກພຶດຕິກຳຕົວຈິງ.

ການປະກອບອາຊີບຄືພື້ນຖານຂອງຊີວິດການເປັນຢູ່ຂອງປະຊາຊົນ. ການປະກອບອາຊີບຂອງນັກສຶກສາຍິ່ງພົວພັນເຖິງພາກສ່ວນໃຫຍ່ຂອງປະເທດຊາດ. ກອງປະຊຸມວຽກງານເສດຖະກິດຂັ້ນສູນກາງທີ່ຈັດຂຶ້ນໃນທ້າຍປີ2021ໄດ້ມີຂໍ້ຮຽກຮ້ອງວ່າຕ້ອງແກ້ໄຂບັນຫາການປະກອບອາຊີບຂອງຊາວໜຸ່ມເຊັ່ນ ນັກສຶກສາທີ່ຮຽນຈົບຈາກມະຫາວິທະຍາໄລໃຫ້ດີ, ປັບປຸງນະໂຍບາຍກ່ຽວກັບການໃຊ້ແຮງງານທີ່ປະກອບອາຊີບຢ່າງຄ່ອງແຄ້ວ ແລະ ນະໂຍບາຍການປະກັນສັງຄົມໃຫ້ສົມບູນຂຶ້ນ. ອີກດ້ານໜຶ່ງ, ນັກສຶກສາທີ່ຮຽນຈົບຈາກມະຫາວິທະຍາໄລກໍຄວນຫັນປ່ຽນຄ່ານິຍົມໃນການເລືອກອາຊີບ ແລະ ການປະກອບອາຊີບ. ຄືດັ່ງທີ່ທ່ານສີຈິ້ນຜິງໄດ້ເວົ້າວ່າ: “ຂໍພຽງແຕ່ມີອຸດົມການກໍຈະມີພາລະກິດ, ຂໍພຽງແຕ່ມີຄວາມສາມາດກໍຈະມີເວທີ.”

แชร์