ປາຖະກະຖາ 2 ວັນປະຫວັດສາດລາວ-ຫວຽດນາມ ແລະວັນສໍາຄັນອື່ນໆ

ໃນວັນທີ 9 ມິຖຸນາ 2022 ພະແນກແຜນການ ແລະການລົງທຶນ ແຂວງອຸດົມໄຊ ໄດ້ຈັດປາຖະກະຖາວັນສຳຄັນທາງປະຫວັດສາດຂອງຊາດ ແລະຂອງແຂວງເພື່ອເຮັດໃຫ້ພະນັກງານ-ລັດຖະກອນ ພາຍໃນພະແນກແຜນການ ແລະການລົງທຶນ ແຂວງອຸດົມໄຊຮັບຮູ້, ເຂົ້າໃຈແຈ້ງກ່ຽວກັບວັນສຳຄັນດັ່ງກ່າວ, ລວມທັງເນື້ອໃນຂອງ 2 ວາລະແຫ່ງຊາດ ຂອງແຂວງອຸດົມໄຊ ແລ້ວພ້ອມກັນສືບຕໍ່ຈັດຕັ້ງປະຕິບັດໃຫ້ໄດ້ຮັບໝາກຜົນ ແລະເຮັດໃຫ້ວັນສຳຄັນຂອງຊາດ, ຂອງແຂວງກາຍເປັນວັນທີ່ມີຄວາມໝາຍ ແລະ ຄວາມສຳຄັນ.

ໂອກາດນີ້, ທ່ານນາງ ຈັນທະລາ ໄຊບຸນເຮືອງ ກຳມະການພັກແຂວງ, ຫົວໜ້າພະແນກແຜນການ ແລະການລົງທຶນ ແຂວງອຸດົມໄຊໄດ້ ປາຖະກະຖາ ວັນສ້າງຕັ້ງແຂວງອຸດົມໄຊ ຄົບຮອບ 60 ປີ, ວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 60 ປີ, ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ ລວມທັງເນື້ອໃນຂອງ 2 ວາລະແຫ່ງຊາດ ສະເພາະຂອງແຂວງອຸດົມໄຊ ໂດຍທ່ານໄດ້ຍົກໃຫ້ເຫັນເຖິງ ປະຫວັດຄວາມເປັນມາ ແລະການເຕີບໃຫຍ່ຂະຫຍາຍຕົວຂອງແຂວງອຸດົມໄຊ ແລະກຳລັງປ້ອງກັນຄວາມສະຫງົບໃນເມື່ອກ່ອນຈົນເຖິງປັດຈຸບັນ ລວມທັງການພົວພັນ,ຮວມມື,ການຊ່ວຍເຫຼືອເຊິ່ງກັນ ແລະກັນ, ການເພີ່ມທະວີຄວາມສາມັກຄີຮັກແພງຕະຫລອດຮອດການຄ້າ ແລະການລົງທຶນ ລະຫວ່າງ 2 ຊາດລາວ-ຫວຽດນາມ ໂດຍສະເພາະ ແຂວງອຸດົມໄຊ ກັບບັນດາແຂວງແຮກສ່ຽວ ແລະແຂວງພົວພັນ ຮ່ວມມືຂອງ ສສ ຫວຽດນາມ. ນອກນັ້ນ,ຍັງຍົກໃຫ້ເຫັນເຖິງຈຸດປະສົງ, ເປົ້າໝາຍ, ຄວາມສຳຄັນຕະຫຼອດຮອດຮູບແບບ, ວິທີການ, ຂັ້ນຕອນ ແລະ ບາງໜ້າວຽກທີ່ສຳຄັນ ໃນການຈັດຕັ້ງປະຕິບັດເນື້ອໃນຂອງ 2 ວາລະແຫ່ງຊາດ ຂອງແຂວງອຸດົມໄຊ ກໍຄືວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະບັນຫາຢາເສບຕິດ

แชร์