ກະຊວງການເງິນ-ອອປສ ຮ່ວມມືກຳນົດກົນໄກປະສານງານ ໃນການດໍາເນີນຄະດີ

ໃນວັນທີ 09 ມິຖຸນາ 2022 ທີ່ອົງການໄອຍະການປະຊາຊົນສູງສຸດ (ອອປສ) ໄດ້ຈັດພິທີເຊັນບົດບັນທຶກຮ່ວມລະຫວ່າງກະຊວງການເງິນ ແລະ ອົງການໄອຍະການປະຊາຊົນສູງສຸດ ວ່າດ້ວຍການກໍານົດກົນໄກປະສານງານໃນການດໍາເນີນຄະດີອາຍາ ຕາມຂະບວນການຍຸຕິທໍາ ກ່ຽວກັບການລະ ເມີດກົດໝາຍພາສີ ແລະ ກົດໝາຍວ່າດ້ວຍສ່ວຍສາອາກອນ ລວມທັງການທຳຜິດອື່ນທີ່ກ່ຽວຂ້ອງໃຫ້ຖືກ ຕ້ອງຕາມກົດໝາຍ ແລະ ມີປະສິດທິຜົນ. ການຮ່ວມມືຄັ້ງນີ້ ລົງນາມໂດຍທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີພະນັກງານທີ່ກ່ຽວຂ້ອງສອງຝ່າຍເຂົ້າຮ່ວມ.

ການລົງນາມເຊັນບົດບັນທຶກຮ່ວມກັນໃນຄັ້ງນີ້ ເພື່ອກໍານົດຫລັກການ, ຄວາມຮັບຜິດຊອບ ແລະ ວິ ທີການປະສານງານ ລະຫວ່າງກະຊວງການເງິນ ແລະ ອົງການໄອຍະການປະຊາຊົນສູງສຸດ ກ່ຽວກັບການດຳເນີນວຽກງານຮ່ວມກັນແນໃສ່ໃຫ້ການດໍາເນີນຄະດີພາສີ, ສ່ວຍສາອາກອນ ແລະ ການທຳຜິດອື່ນໆທີ່ກ່ຽວຂ້ອງຖືກຕ້ອງຕາມກົດໝາຍ, ທັງປະຕິບັດຕາມທີ່ຕັ້ງ, ພາລະບົດບາດ, ສິດ ແລະ ໜ້າທີ່ຂອງຕົນ ຕາມກົດໝາຍ ແລະ ລະບຽບການ; ກໍານົດຄວາມຮັບຜິດຊອບຂອງກະຊວງການເງິນ, ອົງການໄອຍະການປະຊາຊົນສຸງສຸດເປັນອັນລະອຽດ, ມີແບບແຜນວິທີການປະສານງານ, ການຈັດຕັ້ງປະຕິບັດເຜີຍແຜ່ໃຫ້ພະນັກງານຂອງຕົນຢູ່ຂັ້ນສູນກາງ ແລະ ທ້ອງຖິ່ນໄດ້ຮັບຮູ້ ແລະ ເຂົ້າໃຈບົດບັນທຶກສະບັບນີ້ຢ່າງທົ່ວເຖິງເພື່ອຈັດຕັ້ງປະຕິບັດໃຫ້ຖືກຕ້ອງ ແລະ ຮັບປະກັນຄວາມເປັນເອກະລາດໃນການເຄື່ອນໄຫວວຽກງານວິຊາສະເພາະຂອງແຕ່ລະພາກສ່ວນ; ການແກ້ໄຂບັນຫາຕ່າງໆທີ່ພົວພັນເຖິງການດຳເນີນຄະດີພາສີ, ສ່ວຍສາອາກອນ ແລະ ການກະທຳຜິດອື່ນໆ ທີ່ກ່ຽວຂ້ອງຕາມຫລັກການລວມສູນປະຊາທິປະໄຕ ແລະ ມີຄວາມເປັນເອກະພາບບົນພື້ນຖານກົດໝາຍ ແລະ ລະບຽບການ; ສະໜອງຂໍ້ມູນ-ຂ່າວສານທີ່ຈຳເປັນໃຫ້ກັນ ແລະ ກັນເພື່ອປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງມີປະສິດທິຜົນ.

ໃນພິທີດັ່ງກ່າວ ຍັງໄດ້ມີການມອບປຶ້ມກົດໝາຍ ວ່າດ້ວຍການດໍາເນີນຄະດີອາຍາ ແລະ ກົດໝາຍວ່າດ້ວຍການດໍາເນີນຄະດີແພ່ງ, ປຶ້ມປະມວນກົດໝາຍອາຍາ ແລະ ແພ່ງ ໃຫ້ຄະນະປະສານງານກະຊວງການເງິນ ໂດຍການມອບຂອງທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແລະ ຮັບໂດຍທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ນໍາອີກດ້ວຍ.

ຂ່າວ-ພາບ: ກະຊວງການເງິນ

• 09/06/2022