ວາງສີລາຣຶກ ກໍ່ສ້າງວັດໂພນທອງ ພູຣິວັດທະນາຣາມ

ໃນວັນທີ 8 ມິຖຸນາ ທີ່ຜ່ານມາ ຢູ່ເດີ່ນເນີນພູ ບ້ານວັງຊຽງ ເມືອງໂພນທອງ ແຂວງຫຼວງພະບາງ ໄດ້ຈັດພິທີວາງສີລາຣຶກ ການກໍ່ສ້າງວັດໃໝ່ ຂອງເມືອງໂພນທອງ ແຂວງຫລວງພຣະບາງໂດຍໃສ່ຊື່ວ່າ "ວັດໂພນທອງ ພູຣິວັດທະນາຣາມ",

ປະທານພິທີຝ່າຍສົງໂດຍມີ ສາທຸໃຫຍ່ ອ່ອນແກ້ວ ກິຕຕິພັທໂທ ຄະນະບໍລິຫານງານປະຈຳການສູນກາງອົງການພຸດທະສາສະໜາສຳພັນ ແຫ່ງ ສປປ ລາວ, ຜູ້ຊ່ວຍວຽກ ປະທານ ສູນກາງ ອພສ ຜູ້ຊີ້ນຳວຽກງານ ອພສ ບັນດາແຂວງພາກ ເໜືອທັງເປັນ ປະທານອົງການພຸດທະສາສະໜາສຳພັນລາວ ແຂວງຫຼວງພຣະບາງ ພ້ອມດ້ວຍຄະນະບໍລິຫານງານ ອພສ ແຂວງຫຼວງພຣະບາງ, ໃຫ້ກຽດເຂົ້າຮ່ວມມີ ທ່ານ ສົມສະຫວາດ ເລັ່ງສະຫວັດ ອະດີດກົມການເມືອງສູນກາງພັກ, ອະດີດຮອງນາຍຍົກລັດຖະມົນຕີ ແຫ່ງ ສປປລາວ ຊຶ່ງເປັນເຈົ້າສັດທາເຄົ້າ ແລະ ເປັນຜູ້ລະດົມທຶນ ພ້ອມດ້ວຍພັນລະຍາ, ທ່ານ ສຸກັນ ບຸນຍົງ ຮອງເລຂາຄະນະບໍລິຫານງານພັກເເຂວງ ປະທານແນວລາວສ້າງຊາດແຂວງຫຼວງພຣະບາງ, ທ່ານ ບຸນຈັນ ປານຟອງເພັດ ກຳມະການພັກແຂວງເລຂາຄະນະບໍລິຫານງານພັກເມືອງເຈົ້າເມືອງໂພນທອງ ພ້ອມດ້ວຍຄະນະນຳຂອງເມືອງ ຕະຫຼອດຮອດພໍ່ແມ່ປະຊາຊົນ ແລະ ພຸດທະສາສະນິກະຊົນ ພາຍໃນເມືອງໂພນທອງ ເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ອານຸສິດ ຂັດຕິຍະຣາຊ ບໍລິສັດ ອານຸສິດ ສຳຫຼວດ-ອອກແບບ ແລະກໍ່ສ້າງເຄຫະສະຖານໃນນາມບໍລິສັດຮັບເໝົາກໍໄດ້ລາຍງານກ່ຽວກັບການກໍ່ສ້າງວັດຂອງເມືອງໂພນທອງ ໃນຄັ້ງນີ້ ເຊິ່ງມີເນື້ອທີ່ປະມານ 860 ແມັດ ແລະເລີ່ມລົງມືບຸກເບີກທາງຂື້ນວັດ ແລະປັບໜ້າດິນ ແຕ່ວັນທີ 26 ພຶດສະພາ 2022 ເປັນຕົ້ນມາ, ວຽກທີ່ຈະກໍ່ສ້າງໃນເບື້ອງຕົ້ນປະກອບມີ ພັດທະສິມາ ຫຼື ອາຣາມ 1 ຫຼັງ ແລະພຣະທາດ 1 ອົງ ລວມູນຄ່າທັງໝົດແມ່ນ 1.359.748.684 ກີບ ແລະ ຄາດວ່າຈະໃຫ້ສໍາເລັດຕົ້ນເດືອນກຸມພາ ປີ 2023.

ຈາກນັ້ນ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍຍົກລັດຖະມົນຕີ ແຫ່ງ ສປປ ລາວ ໃນນາມເຈົ້າສັດທາເຄົ້າກໍໄດ້ມີຄຳເຫັນແຈ້ງຈຸດປະສົງເຈດຈຳນົງອັນເປັນບຸນກຸສົນໃນການສ້າງວັດໃຫ້ເມືອງໂພນທອງ ໃນຄັ້ງນີ້ເຊິ່ງທ່ານກ່າວວ່າ : ການກໍ່ສ້າງວັດວາອາຣາມ ໃຫ້ເມືອງໂພນທອງ ໃນຄັ້ງນີ້ກໍ່ເພື່ອເປັນການປົກປັກຮັກສາພຸດທະສາສະໜາ, ວັດທະນະທັມທີ່ດີງາມຂອງຊາດ ກໍ່ຄືຂອງເມືອງໂພນທອງ ຫລວງພຣະບາງ ເພື່ອໃຫ້ເປັນບ່ອນພັກເຊົາຂອງພຣະສົງສາມະເນນໄດ້ບວດເຂົ້າສຶກສາຮ່ຳຮຽນພຣະທັມມະວິໄນ, ເປັນບ່ອນເຕົ້າໂຮມຄວາມສາມັກຄີ, ບ່ອນເຮັດບຸນສິນກິນທານ ແລະທັງເປັນການສືບທອດຮີດຄອງປະເພນີອັນດີງາມ ແລະລໍ້າຄ່າຂອງຊາດລາວ ເວົ້າລວມເວົ້າສະເພາະແມ່ນຊາວເມືອງໂພນທອງໃຫ້ຢູ່ຄູ່ຊາວເມືອງໂພນທອງຕະຫຼອດໄປ.

ໂອກາດດັ່ງກ່າວນີ້ ທ່ານ ບຸນຈັນ ປານຟອງເພັດ ເຈົ້າເມືອງໆໂພນທອງ ກໍ່ໄດ້ສະແດງຄວາມຮູ້ບຸນຄຸນ ແລະສະແດງຄວາມຂອບໃຈຕໍ່ເຈົ້າສັດທາ ແລະຜູ້ມີຈິດໃຈເຫຼື້ອມໃສສັດທາ ທີ່ພ້ອມກັນມາສະໜັບສະໜູນ ໃນການສ້າງວັດໃຫ້ເມືອງໂພນທອງ ໃນຄັ້ງນີ້.ຫຼັງຈາກນັ້ນ ກໍໄດ້ເຂົ້າສູ່ພິທີທາງພຸດທະສາສະໜາໂດຍໄດ້ໄຫວ້ພຣະ-ຮັບສິນ, ສູດມະຫາພຸດທະມົນປະຣິຕະມຸງຄຸນ, ຟັງເທດສະຫຼອງ 1 ກັນ, ຄາຣະວະ-ຮັບພອນ ແລະເຂົ້າສູ່ພິທີວາງສີລາຣຶກປຸກເສົາອາຣາມ ແລະພຣະທາດຂື້ນຢ່າງເປັນທາງການ ແລະເພື່ອເປັນສິຣິມຸງຄຸນແກ່ເຈົ້າສັດທາ ແລະພຸດທະສາສະນິກະຊົນທີ່ເຂົ້າຮ່ວມງານໃນຄັ້ງນີ້.

แชร์