ເຜີຍແຜ່ ສິດ-ໜ້າທີ່ຢູ່ໃນລະບົບ ອມພ ແລະການນໍາໃຊ້ໂປຣແກຣມບັນຊີ ຢູ່ເມືອງສີມັດຕະນາກ

ໃນລະຫວ່າງວັນທີ 7-8 ມິຖຸນາ ທີ່ຜ່ານມາກົມສ່ວຍສາອາກອນ, ສ່ວຍສາອາກອນປະຈຳນະຄອນຫລວງວຽງຈັນຮ່ວມກັບສ່ວຍສາອາກອນປະຈຳ ເມືອງສີສັດຕະນາກ ລົງເຜີຍແຜ່-ແນະນໍາກ່ຽວກັບສິດ ແລະ ໜ້າທີ່ຂອງຜູ້ຢູ່ໃນລະບົບອາກອນມູນຄ່າເພີ່ມ ແລະການນໍາໃຊ້ໂປຣແກຣມບັນຊີ ທີ່ຕິດພັນກັບໃບເກັບເງິນ ໃຫ້ບັນດາຫົວໜ່ວຍທຸລະກິດເປົ້າໝາຍຢູ່ເມືອງສີສັດຕະນາກ ນະຄອນຫລວງວຽງຈັນ ຊຶ່ງເປົ້າໝາຍຫົວໜ່ວຍທຸລະກິດທີ່ເຂົ້າຮ່ວມຮັບມີທັງໝົດ 747 ຫົວໜ່ວຍ ໂດຍໄດ້ແບ່ງອອກເປັນ 4 ເທື່ອ.

ການເຜີຍແຜ່ຄັ້ງນີ້, ເພື່ອບັນດາຫົວໜ່ວຍທຸລະກິດເປົ້າໝາຍ ຢູ່ເມືອງສີສັດຕະນາກ, ເຂົ້າໃຈ ແລະກຳແໜ້ນຮັບຮູ້ເຂົ້າໃຈເລິກໃນການເຂົ້າສູ່ລະບົບອາກອນມູນຄ່າເພີ່ມ, ລວມທັງຮູ້ກ່ຽວກັບສິດ ແລະ ໜ້າທີ່ຂອງຜູ້ຢູ່ໃນລະບົບອາກອນມູນຄ່າເພີ່ມ ແລະ ການນໍາໃຊ້ໂປຣແກຣມບັນຊີທີ່ຕິດພັນກັບໃບເກັບເງິນ, ເຫັນໄດ້ສິດ-ໜ້າທີ່ ແລະ ຜົນປະໂຫຍດຂອງການເຂົ້າໃນລະບົບອາກອນມູນຄ່າເພີ່ມ, ການອອກໃບເກັບເງິນ, ການສະ ຫລຸບບັນຊີໂດຍຜ່ານໂປຣແກຣມບັນຊີ, ແນະນໍາໃຫ້ຮູ້ໄດ້ເຖິງຫົວໜ່ວຍຈຸນລະວິສາຫະກິດ, ຫົວໜ່ວຍຂະໜາດນ້ອຍ ແລະກາງໃນການເຂົ້າລະບົບອາກອນມູນຄ່າເພີ່ມທີ່ຈະໄດ້ຮັບນະໂຍບາຍອັດຕາອາກອນກຳໄລ 0,1%, 3% ແລະ 5% ໄລຍະ 3 ປີຕາມກົດ ໝາຍວ່າດ້ວຍການປັບປຸງບາງມາດຕາ ຂອງສ່ວຍສາອາກອນ ສະບັບເລກທີ 01/ສພຊ.ພ້ອມກັນນັ້ນ, ຍັງເປັນການຊຸກຍູ້ຫົວໜ່ວຍທຸລະກິດ ເຂົ້າໃນລະບົບອາກອນມູນຄ່າເພີ່ມ,ເຊິ່ງເປັນວຽກງານໜຶ່ງທີ່ນອນໃນວາລະແຫ່ງຊາດ ແລະເປັນວຽກທີ່ທຸກພາກສ່ວນຕ້ອງໄດ້ໃຫ້ການຮ່ວມມື ແລະນໍາເອົາໄປຈັດຕັ້ງປະຕິບັດໃຫ້ຖືກຕ້ອງ, ສອດຄ່ອງຕາມກົດໝາຍກຳນົດ.

ສຳລັບການເຜີຍແຜ່ຢູ່ເມືອງສີສັດຕະນາກ, ໄດ້ດໍາເນີນການເຜີຍແຜ່ແນະນຳໃຫ້ບັນດາຫົວໜ່ວຍທຸລະກິດທີ່ນອນໃນລະບົບອາກອນມູນຄ່າເພີ່ມເຂົ້າໃຈໃນການຈັດຕັ້ງປະຕິບັດການແຈ້ງມອບພັນທະອາກອນດັ່ງກ່າວ, ຄັ້ງທີ 1 ໃນວັນທີ 17 ມີນາ 2022ຈຳນວນ 120 ບໍລິສັດ ແມ່ນໄດ້ສຳເລັດອອກໃບຢັ້ງຢືນເຂົ້າລະບົບອາກອນມູນຄ່າເພີ່ມຈຳນວນ 99 ບໍລິສັດ ແລະ ໃນຄັ້ງທີ 2 ໃນວັນທີ 25 ພຶດສະພາ 2022, ຕາມການສັງເກດຕີລາຄາເຫັນໄດ້ວ່າບັນດາຫົວໜ່ວຍທຸລະກິດໂດຍສະເພາະຢູ່ເມືອງສີສັດຕະນາກ ມີຄວາມຕື່ນຕົວຫັນເຂົ້າມາສູ່ລະບົບອາກອນມູນຄ່າເພີ່ມ, ການແຈ້ງຜ່ານລະບົບTAXRIS ຫລາຍຂຶ້ນ.

ສະນັ້ນ, ມັນຈຶ່ງຮຽກຮ້ອງໃຫ້ຫົວໜ່ວຍທຸລະກິດທີ່ເຮັດໜ້າທີ່ແທນພາກລັດໃນການເກັບອາກອນມູນຄ່າເພີ່ມຈາກຜູ້ຊົມໃຊ້ສິນຄ້າ ແລະບໍລິການ, ໄດ້ປະຕິບັດສິດ-ໜ້າ ທີ່ຂອງຜູ້ຢູ່ໃນລະບົບອາກອນມູນຄ່າເພີ່ມຢ່າງຖືກຕ້ອງໂດຍສະເພາະແມ່ນການແຈ້ງ-ມອບ, ການນຳໃຊ້ໃບເກັບເງິນ ແລະ ການຖືບັນຊີໃຫ້ຖືກຕ້ອງ ແລະສອດຄ່ອງຕາມກົດໝາຍກຳນົດ. ທັງນີ້, ກໍເພື່ອຮັບປະກັນການຈັດຕັ້ງປະຕິບັດການເຂົ້າໃນລະບົບອາກອນມູນຄ່າເພີ່ມຢ່າງມີປະສິດທິຜົນ, ເປັນການປະກອບສ່ວນເຂົ້າໃນການສ້າງສາພັດທະນາປະເທດຊາດອີກດ້ວຍ.

ຂ່າວ-ພາບ: ກະຊວງການເງິນ

แชร์