ຄຊພຊ ທົບທວນແຜນຍຸດທະສາດ 5 ປີ ສົ່ງເສີມການພັດທະນາຊັບພະຍາກອນມະນຸດ ຮອດປີ 2025

ຄະນະກໍາມະທິການແຫ່ງຊາດ ເພື່ອການພັດທະນາຊັບພະຍາກອນມະນຸດ (ຄຊພຊ) ຈັດກອງປະຊຸມສະໄໝສາມັນຄົບຄະນະກຳມະທິການແຫ່ງຊາດ ຄັ້ງທີ X ແບບເຊິ່ງໜ້າ ແລະ ລະບົບທາງໄກ ໃນວັນທີ 6 ມິຖຸນາ 2022 ທີ່ສະຖາບັນຂົງຈື ມະຫາວິທະຍາໄລແຫ່ງຊາດ, ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ທັງເປັນປະທານ ຄຊພຊ ແລະ ໃຫ້ກຽດເຂົ້າຮ່ວມຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຜູ້ຊີ້ນຳວຽກງານວັດທະນະທຳ ແລະ ສັງຄົມ ແລະ ທ່ານ ທອງຈັນ ໂຂງພູມຄຳ ຮອງຫົວໜ້າຄະນະຈັດຕັ້ງສູນກາງພັກພ້ອມດ້ວຍຄະນະຮັບຜິດຊອບກໍາມະການຂອງ ຄຊພຊ ຂັ້ນສູນກາງ ແລະຂັ້ນແຂວງ, ນະຄອນຫຼວງ ກອງເລຂາ ຄຊພຊ.

ໂອກາດນີ້, ທ່ານ ຮສ.ປອ ພຸດ ສິມມາລາວົງ ກ່າວວ່າ: ກອງປະຊຸມຄັ້ງນີ້ມີຄວາມໝາຍສໍາຄັນສໍາລັບ ຄຊພຊ ເພື່ອມາຮ່ວມກັນສະຫຼຸບຕີລາຄາ ແລະ ປຶກສາຫາລືການຈັດຕັ້ງປະຕິບັດຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ຕີລາຄາການປະຕິບັດມະຕິກອງປະຊຸມ ຄຊພຊ ຄັ້ງທີ IX ຜ່ານມາ ພ້ອມທັງກະກຽມວາງແຜນພັດທະນາຊັບພະຍາກອນມະນຸດໃນຕໍ່ໜ້າໃຫ້ມີຄຸນນະພາບ ໂດຍສະເພາະໃນສະພາບແວດລ້ອມຂອງການປ່ຽນແປງໃໝ່ຂອງໂລກ ບັນດາປັດໃຈທີ່ເປັນອຸປະສັກກີດຂວາງທີ່ເກີດຂຶ້ນໃໝ່ຕໍ່ການພັດທະນາເສດຖະກິດ-ສັງຄົມໃນປັດຈຸບັນ ເພື່ອເຮັດໃຫ້ຊັບພະຍາກອນມະນຸດເຮົາສາມາດແຂ່ງຂັນກັບພາກພື້ນ ແລະ ສາກົນ ສຸມໃສ່ການຈັດຕັ້ງປະຕິບັດມະຕິກອງປະຊຸມ ຄັ້ງທີ IX ຂອງ ຄຊພຊ ໃນໜຶ່ງປີຜ່ານມາ ທົບທວນການຈັດຕັ້ງປະຕິບັດແຜນຍຸດທະສາດ 5 ປີຜ່ານມາ ແລະສ້າງແຜນປະຕິບັດຍຸດທະສາດການພັດທະນາຊັບພະຍາກອນມະນຸດໃນ 5 ປີຕໍ່ໜ້າ ທີ່ກອງເລຂາ ຄຊພຊ ແລະທີມງານຊ່ຽວຊານລາຍງານລົງເລິກວຽກງານດັ່ງກ່າວ. ຄຽງຄູ່ກັນນີ້, ຄຊພຊ ໄດ້ລາຍງານຜົນ “ບົດລາຍງານການເພີ່ມທະວີການພັດທະນາຊັບພະຍາກອນມະນຸດໃຫ້ມີຄຸນນະພາບສູງຂຶ້ນສາມາດຕອບສະໜອງຄວາມຮຽກຮ້ອງຕ້ອງການຂອງການພັດທະນາປະເທດຊາດໃນໄລຍະໃໝ່” ຕໍ່ກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ພ້ອມທັງຄຳເຫັນຊີ້ນຳຂອງສະຫາຍເລຂາທິການໃຫຍ່ກຳມະການກົມການເມືອງ ແລະກຳມະການສູນກາງເພື່ອເປັນທິດທາງໃຫ້ແກ່ພວກເຮົາໃນການຮ່າງມະຕິຈັດຕັ້ງປະຕິບັດຂອງກົມການເມືອງສູນກາງພັກ ຫຼືຄະນະບໍລິຫານງານສູນກາງພັກ.

ວຽກງານການພັດທະນາຊັບພະຍາກອນມະນຸດ, ຊຶ່ງຜ່ານມາຍັງບໍ່ທັນໄດ້ຮັບການເອົາໃຈໃສ່ ແລະ ໃຫ້ຄວາມສໍາຄັນໃນຂອດການຈັດຕັ້ງປະຕິບັດເທົ່າທີ່ຄວນ ເຊັ່ນ: ແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາຂອງແຕ່ລະຂະແໜງການ ຫຼື ແຜນພັດທະນາຂອງແຕ່ລະທ້ອງຖິ່ນຍັງບໍ່ໄດ້ກຳນົດລະອຽດຈຳນວນຄວາມຕ້ອງການຊັບພະຍາກອນມະນຸດໃນແຕ່ລະດ້ານ, ຊຶ່ງສະແດງອອກໃນການຜັນຂະຫຍາຍຍຸດທະສາດການພັດທະນາຊັບພະຍາກອນມະນຸດແຫ່ງຊາດຫຼາຍພາກສ່ວນເຮັດສໍາເລັດບາງພາກສ່ວນເຮັດພໍໃຫ້ແລ້ວບາງພາກສ່ວນໃກ້ຈະສໍາເລັດແລະຈໍານວນໜ້ອຍໜຶ່ງບໍ່ທັນໄດ້ເຮັດ,ຫຼາຍພາກສ່ວນມີຄໍາເຫັນໃຫ້ການພັດທະນາຊັບພະຍາກອນມະນຸດ ສອດຄ່ອງກັບຄວາມຕ້ອງການຂອງການພັດທະນາ ແລະ ສາຂາວິຊາຊີບທີ່ມີຄວາມຕ້ອງການຂອງຕະຫຼາດແຮງງານແຕ່ພໍໃຫ້ພາກສ່ວນກ່ຽວຂ້ອງສະໜອງຂໍ້ມູນຄວາມຕ້ອງການມາພັດບໍ່ມີລາຍລະອຽດ ບາງພາກສ່ວນບໍ່ອໍານວຍຄວາມສະດວກ ແລະ ໃຫ້ການຮ່ວມມືເທົ່າທີ່ຄວນ ໂດຍສະເພາະໃນຂົງເຂດເສດຖະກິດທີ່ມີການນໍາໃຊ້ ແລະ ຈ້າງງານເຮັດໃຫ້ການພັດທະນາຊັບພະຍາກອນມະນຸດຜ່ານມາມີສະພາບການສ້າງເຫຼືອສ້າງບໍ່ພຽງພໍໃນບາງຂົງເຂດສົ່ງຜົນໃຫ້ການພັດທະນາຊັບພະຍາກອນມະນຸດບໍ່ທັນໄດ້ຮັບໝາກຜົນ ແລະສອດຄ່ອງຕາມຈຸດປະສົງ ແລະຄາດໝາຍຂອງລັດຖະບານ ຕ້ອງຍອມຮັບວ່າຍັງມີບາງຂໍ້ຄົງຄ້າງ ແລະສິ່ງທ້າທາຍເປັນຕົ້ນການຜັນຂະຫຍາຍຍຸດທະສາດການພັດທະນາຊັບພະຍາກອນມະນຸດແຫ່ງຊາດ ຮອດປີ 2025 ໃຫ້ເປັນໂຄງການແຜນງານ ແລະ ແຜນກິດຈະກຳຍັງຊັກຊ້າ ຊຶ່ງມັນຕິດພັນກັບເນື້ອໃນຍຸດທະສາດເອງທີ່ຍັງກວມລວມກວ້າງເກີນໄປ ການປະສານງານລະຫວ່າງຫຼາຍຂະແໜງການໃນການຜັນຂະຫຍາຍ ແລະ ຈັດຕັ້ງປະຕິບັດຕົວຈິງຂອງພາກສ່ວນກ່ຽວຂ້ອງຊັກຊ້າໃຊ້ເວລາຫຼາຍຂີດຄວາມສາມາດຂອງພະນັກງານທີ່ຈັດຕັ້ງປະຕິບັດວຽກງານຂອງຫຼາຍພາກສ່ວນຍັງຈຳກັດ ແລະອື່ນໆ. ດັ່ງນັ້ນ, ຈຶ່ງຈຳເປັນຕ້ອງໄດ້ຮ່ວມກັນຄົ້ນຄວ້າ ແລະປຶກສາຫາລືແກ້ໄຂໃຫ້ສອດຄ່ອງ.

ໃນໂອກາດນີ້, ທ່ານ ກິແກ້ວ ໄຂຄຳພິທູນ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານໄລຍະຜ່ານມາຂອງ ຄຊພຊ ພ້ອມທັງເນັ້ນໜັກໃຫ້ທຸກພາກສ່ວນທີ່ກ່ຽວຂ້ອງໂດຍສະເພາະແມ່ນບັນດາຄະນະກຳມະການພັດທະນາຊັບພະຍາກອນມະນຸດຂັ້ນສູນກາງ ແລະ ຂັ້ນແຂວງ ຕ້ອງໄດ້ເພີ່ມຄວາມເອົາໃຈໃສ່ຊີ້ນຳນຳພາການຈັດຕັ້ງປະຕິບັດບາງດ້ານ ເປັນຕົ້ນແມ່ນການສຸມໃສ່ຄົ້ນຄວ້າຮ່າງມະຕິກ່ຽວກັບວຽກງານພັດທະນາຊັບພະຍາກອນມະນຸດ ເພື່ອໃຫ້ກົມການເມືອງສູນກາງພັກ ພິຈາລະນາ ຊຶ່ງເນື້ອໃນຂອງມະຕິຕ້ອງມີຈຸດສຸມທີ່ຊັດເຈນລະອຽດ ແລະ ສາມາດຈັດຕັ້ງປະຕິບັດໄດ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງຊາດ ຕິດພັນກັບເສດຖະກິດປາຍແຫຼມຮັບປະກັນຄວາມສອດຄ່ອງລະຫວ່າງການສ້າງ ແລະ ການຊົມໃຊ້. ສໍາລັບທິດທາງໃຫ້ເນັ້ນໜັກໃສ່ການສຶກສາອົບຮົມແນວຄິດການເມືອງ ຄຸນສົມບັດສິນທຳປະຕິວັດ ສະຕິຊາດ ການປັບປຸງສຸຂະພາບ ການປັບປຸງຄຸນນະພາບຂອງການສຶກສາ ທຸກຊັ້ນ-ທຸກສາຍ ແລະ ການພັດທະນາທັກສະສີມືແຮງງານ ພ້ອມທັງມີການແບ່ງຄວາມຮັບຜິດຊອບຂອງພາກສ່ວນກ່ຽວຂ້ອງໃຫ້ຊັດເຈນ. ສຳລັບງົບປະມານໃນການເຄື່ອນໄຫວວຽກງານດັ່ງກ່າວໃນສະພາບທີ່ລັດຖະບານຍັງມີຄວາມຫຍຸ້ງຍາກດ້ານງົບປະມານແມ່ນຈັດສັນໃຫ້ຂະແໜງການຕົນເພື່ອຈັດຕັ້ງປະຕິບັດກິດຈະກຳທີ່ມີຄວາມຈຳເປັນເພື່ອບັນລຸຍຸດທະສາດ ຄຊພຊ ໃຫ້ມີຜົນສຳເລັດເທື່ອລະກ້າວ.

แชร์