ສປ ຈີນ ຈັດສຳມະນາ ການຄຸ້ມຄອງໂຄງການຊ່ວຍເຫລືອເພື່ອການພັດທະນາຂອງ ສປປ ລາວ

ສະຖາບັນເຈົ້າໜ້າທີ່ທຸລະກິດສາກົນ, ກະຊວງການຄ້າ ສາທາລະນະລັດ ປະຊາຊົນຈີນ(AIBO) ຈັດສຳມະນາກ່ຽວກັບ “ການຄຸ້ມຄອງໂຄງການຊ່ວຍເຫລືອ ເພື່ອການພັດທະນາຂອງ ສປປ ລາວ” ທາງອອນລາຍໃນລະຫວ່າງວັນທີ 8-22 ມິຖຸນາ 2022 ທີ່ມີສູນກາງຖ່າຍທອດຄວາມຮູ້ຈາກນະຄອນຫລວງປັກກິ່ງ ສປ ຈີນ ໂດຍມີ ທ່ານ ຫຼິວຢູທ່າວ ຮອງຫົວໜ້າສະຖາບັນເຈົ້າໜ້າທີ່ທຸລະກິດສາກົນ, ກະຊວງການຄ້າ ສປ ຈີນ, ທ່ານ ຂວັນໃຈ ອ່ຽມສຸທິ ທີ່ປຶກສາເສດຖະກິດ-ການຄ້າ ສະຖານທູດ ສປປ ລາວ ປະຈໍາ ສປ ຈີນ ແລະທ່ານ ຣັດສະໝີ ດວງສັດຈະ ຜູ້ຕາງໜ້ານັກສຳມະນາກອນຈາກ ສປປ ລາວ, ມີຄະນະຮັບຜິດຊອບໂຄງການ ແລະພາກສ່ວນກ່ຽວຂ້ອງຂອງລາວຈໍານວນໜຶ່ງທີ່ເຮັດວຽກຕິດພັນເຂົ້າຮ່ວມ.

ການຈັດສຳມະນາແບບທາງໄກໃນຄັ້ງນີ້, ໄດ້ຮັບການສະໜັບສະໜູນຈາກກະຊວງການຄ້າ, ສປ ຈີນ ແລະໄດ້ດຳເນີນການໂດຍສະຖາບັນເຈົ້າໜ້າທີ່ທຸລະກິດສາກົນຂອງກະຊວງການຄ້າ ສປ ຈີນ ເຊິ່ງຈະນຳມາເຖິງປະໂຫຍດອັນໃຫຍ່ຫລວງ ແລະສຳຄັນຫລາຍເພາະຈະໄດ້ຮັບຮູ້ສະພາບທົ່ວໄປຂອງປະເທດຈີນໂດຍສະເພາະຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”; ບົດຮຽນພື້ນຖານໃນການເປີດປະຕູສູ່ພາຍນອກ ແລະ ການພັດທະນາເສດຖະກິດຂອງຈີນ; ແນວຄວາມຄິດການປົກຄອງລັດ ແລະ ບໍລິຫານການເມືອງຂອງການນໍາຈີນ; ສາຍພົວພັນການເມືອງ ແລະຕ່າງປະເທດຂອງຈີນ; ນະໂຍບາຍການຊ່ວຍເຫລືອຕ່າງປະເທດຂອງຈີນ; ການແນະນໍາການສິນເຊື່ອທີ່ມີບູລິມະສິດໃນການຊ່ວຍເຫລືອຕ່າງປະເທດຂອງຈີນ; ການຄຸ້ມຄອງໂຄງການຊ່ວຍເຫລືອຕ່າງປະເທດຄົບວົງຈອນຂອງຈີນ; ການແນະນໍາການຄຸ້ມຄອງໂຄງການສິ່ງຂອງທົ່ວໄປ ໃນການຊ່ວຍເຫລືອຕ່າງປະເທດຂອງຈີນ ແລະການຮ່ວມມືກ່ຽວການກັບພັດທະນາສາກົນ.

ພາຍຫລັງການສຶກສາຄົ້ນຄວ້າຄັ້ງນີ້, ຈະເຮັດໃຫ້ສໍາມະນາກອນຂອງລາວໄດ້ຮັບຮູ້ລະບົບນະໂຍບາຍການຊ່ວຍເຫລືອ ແລະຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງປະເທດຈີນຢ່າງຮອບດ້ານ; ຮູບແບບການຄຸ້ມຄອງໂຄງການຊ່ວຍເຫລືອຕ່າງປະເທດຂອງປະເທດຈີນ ທີ່ໃຫ້ປະໂຫຍດ ແລະໃຫ້ຄວາມຈະເລີນຂອງບັນດາປະຊາຊາດ, ຮັບຮູ້ຕົວຢ່າງໂຄງການຊ່ວຍເຫລືອຂອງປະເທດຈີນ ແລະບົດຮຽນທີ່ສະສົມໄວ້ສາມາດຜັນຂະຫຍາຍໄດ້, ຕິດພັນສະພາບ ແລະເງື່ອນໄຂຕົວຈິງຂອງປະເທດຕົນເອງເພື່ອມີຂໍ້ສະເໜີກ່ຽວກັບການພັດທະນາໃນຂະແໜງການຄຸ້ມຄອງໂຄງການຊ່ວຍເຫລືອ, ຍົກສູງລະດັບ ແລະ ຄວາມສາມາດທາງດ້ານເຕັກນິກໃນການຄຸ້ມຄອງໂຄງການຊ່ວຍເຫລືອຢ່າງມີປະສິດທິພາບ, ສົ່ງເສີມການຊ່ວຍເຫລືອໃຫ້ມີການພັດທະນາໄປຢ່າງຕໍ່ເນື່ອງ.

ໂອກາດນີ້, ທ່ານ ຣັດສະໝີ ດວງສັດຈະ ໃນນາມຜູ້ທີ່ເຂົ້າຮ່ວມໄດ້ສະແດງຄວາມຊົມເຊີຍ ແລະຄຳຂອບໃຈມາຍັງຄະນະນໍາກະຊວງການຄ້າໂດຍສະເພາະສະຖາບັນເຈົ້າໜ້າທີ່ທຸລະກິດສາກົນທີ່ໄດ້ໃຫ້ການສະໜູນສະໜູນ ແລະຊ່ວຍເຫລືອຖ່າຍທອດບົດຮຽນອັນລໍ້າຄ່າໃຫ້ແກ່ສຳມະນາກອນລາວໃນຄັ້ງນີ້, ພ້ອມນີ້ຍັງສະແດງຄວາມຮູ້ບຸນຄຸນ ຍັງພັກ, ລັດຖະບານ ແລະປະຊາຊົນຈີນ ທີ່ໄດ້ໃຫ້ການຊ່ວຍເຫລືອອັນລໍ້າຄ່າຫລາຍດ້ານແກ່ ສປປ ລາວ ຕະຫລອດມາໂດຍສະເພາະການສະກັດກັ້ນ, ປ້ອງກັນພະຍາດໂຄວິດ-19 ແລະ ການຈັດຕັ້ງຜັນຂະຫຍາຍ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ກັບຍຸດທະສາດຫັນປະເທດ ທີ່ບໍ່ມີທາງອອກສູ່ທະເລ ກາຍເປັນປະເທດເຊື່ອມຕໍ່-ເຊື່ອມໂຍງພາກພື້ນ ແລະສາກົນໃຫ້ເປັນຮູບປະທຳໂດຍໄດ້ເລັ່ງລັດເຊື່ອມໂຍງເຂົ້າກັບເສັ້ນທາງລົດໄຟ ລາວ-ຈີນ ແລະຈີນ-ລາວ ເຊິ່ງແມ່ນເສັ້ນທາງລົດໄຟທີ່ທັນສະໄໝທີ່ສຸດເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນລາວ ແລະປະຊາຊົນຈີນກໍຄືບັນດາປະຊາຊາດໃນພາກພື້ນ.

แชร์