ຜ່ານຮ່າງມາດຕະການຄຸ້ມຄ້ອງ ແລະສົ່ງຕໍ່ຜູ້ຖືກເຄາະຮ້າຍຈາກຄວາມຮຸນແຮງຕໍ່ແມ່ຍິງ

ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ຮ່ວມກັບອົງການສະຫະປະຊາຊາດກອງທຶນສໍາລັບປະຊາກອນ (UNFPA) ຈັດກອງປະຊຸມປຶກສາຫາລືຄັ້ງສຸດທ້າຍກ່ຽວກັບການຜ່ານຮ່າງມາດຕະການຄຸ້ມຄ້ອງ, ປະສານງານ ແລະ ສົ່ງຕໍ່ຜູ້ຖືກເຄາະຮ້າຍ/ຜູ້ລອດຊີວິດຈາກຄວາມຮຸນແຮງຕໍ່ແມ່ຍິງ (SOP) ໃນວັນທີ 7 ມິຖຸນາ 2022, ພາຍໃຕ້ການເປັນປະທານຂອງທ່ານ ນາງ ອິນລາວັນ ແກ້ວບຸນພັນ ປະທານສະຫະພັນແມ່ຍິງລາວ, ທ່ານ ໂພລ ແຄລີ (Paul Kelly) ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ມີທ່ານ ນາງ ມາຣຽມ ເອຄານ ຜູ້ຕາງໜ້າ UNFPA ປະຈໍາລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ Paul Kelly ໄດ້ກ່າວວ່າ: ກອງປະຊຸມປຶກສາຫາລືຄັ້ງນີ້, ເປັນຂີດໝາຍສຳຄັນກ່ອນການສະຫລຸບ ແລະການຈັດຕັ້ງປະຕິບັດມາດຕະການຄຸ້ມຄ້ອງ, ປະສານງານ ແລະສົ່ງຕໍ່ຜູ້ຖືກເຄາະຮ້າຍ/ຜູ້ລອດຊີວິດ ຈາກຄວາມຮຸນແຮງຕໍ່ແມ່ຍິງໃນບາງແຂວງ, ລັດຖະບານອົດສະຕຣາລີ ຮ່ວມກັບລັດຖະບານລາວມຸ່ງໝັ້ນທີ່ຈະຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະ ຢຸດຕິຄວາມຮຸນແຮງຕໍ່ແມ່ຍິງ ແລະເດັກຍິງ. ພວກເຮົາຮູ້ວ່າຄວາມຮຸນແຮງຕໍ່ແມ່ຍິງ ແລະເດັກຍິງ ເປັນບັນຫາຮ້າຍແຮງໄດ້ທຸກເວລາ ໂດຍສະເພາະໄລຍະທີ່ມີການລະບາດຂອງພະຍາດໂຄວິດ-19, ໃນແຕ່ລະປີ ມີແມ່ຍິງ ແລະເດັກຍິງ ໃນທົ່ວໂລກ 245 ລ້ານຄົນ ໄດ້ຮັບຜົນກະທົບຈາກຄວາມຮຸນແຮງທາງເພດ ຫລືທາງດ້ານຮ່າງກາຍ.

ຄວາມຮຸນແຮງຕໍ່ແມ່ຍິງ ແລະເດັກຍິງ ເປັນການລະເມີດສິດທິມະນຸດຂອງເຂົາເຈົ້າ ແລະສົ່ງຜົນກະທົບຢ່າງເລິກເຊິ່ງຕໍ່ບຸກຄົນ, ຊຸມຊົນ ແລະປະເທດຕ່າງໆ. ສະນັ້ນ, ພວກເຮົາຕ້ອງໄດ້ເຮັດວຽກຮ່ວມກັບສະມາຊິກທຸກຄົນໃນສັງຄົມ, ລວມທັງຊາຍ ແລະເດັກຊາຍເພື່ອຫັນປ່ຽນມາດຖານ, ທັດສະນະຄະຕິ ແລະພຶດຕິກຳທາງເພດ ເພື່ອລົບລ້າງຄວາມຮຸນແຮງທາງເພດເຊິ່ງຜູ້ຊາຍມີບົດບາດສຳຄັນໃນການປົກປ້ອງຄວາມຮຸນແຮງເພື່ອໃຫ້ຊຸມຊົນຂອງພວກເຮົາຢຸດຕິການໃຊ້ຄວາມຮຸນແຮງ, ຜູ້ຊາຍຕ້ອງລຸກຂື້ນເພື່ອດຳເນີນການຕໍ່ຕ້ານຄວາມຮຸນແຮງຕໍ່ແມ່ຍິງ ແລະເດັກຍິງ.

ລັດຖະບານອົດສະຕຣາລີ ໄດ້ສະໜອງທຶນ 400.000 ໂດລາອົດສະຕຣາລີ ໃຫ້ແກ່ອົງການ UNFPA ເພື່ອສະໜັບສະໜູນການເສີມສ້າງຄວາມເຂັ້ມແຂງຂອງການບໍລິການດ້ານສັງຄົມ ແລະສຸຂະພາບໂດສຸມໃສ່ການສ້າງຄວາມອາດສາມາດສຳລັບຜູ້ໃຫ້ບໍລິການດ້ານສຸຂະພາບ ແລະສັງຄົມເພື່ອສະໜັບສະໜູນຜູ້ລອດຊີວິດຈາກຄວາມຮຸນແຮງ.

ຂ່າວ: ສຸກສະຫວັດ
ພາບ: ຂັນໄຊ

แชร์