ເຊົ້າວັນທີ 3 ມິຖຸນາ 2022 , ໂຄງການເຂື່ອນໄຟຟ້ານໍ້າອູ ທີ່ໄດ້ລົງທຶນກໍ່ສ້າງໂດຍ ບໍລິສັດ POWERCHINA ໄດ້ເລີ່ມຕົ້ນລົງມືປູກປ່າທົດແທນຢູ່ພາຍໃນເຂດອ່າງຮັບນໍ້າຢ່າງເປັນທາງການ, ຂຶ້ນທີ່ບ້ານຫ້ວຍໂລ້ ເຂື່ອນໄຟຟ້ານໍ້າອູ 1, ເປັນການເປີດຜ້າມ່ານຂອງໂຄງການປູກປ່າທົດແທນໃນເຂດອ່າງຮັບນໍ້າຂອງແມ່ນຳ້ອູ, ເພື່ອຊຸກຍູ້ຊ່ວຍເຫຼືອໃນການສ້າງພື້ນທີ່ຮັກສາລະບົບນິເວດໃນພາກເໜືອຂອງ ສປປ ລາວ.
ກິດຈະກຳທີ່ມີຄວາມໝາຍອັນສຳຄັນຢ່າງຍິ່ງດັ່ງກ່າວນີ້ໄດ້ຈັດຂຶ້ນເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ " ວັນສິ່ງແວດລ້ອມໂລກ ". ພາຍໃຕ້ການຊີ້ນຳຂອງນັກວິຊາການ ຈາກກະຊວງກະສິກຳ ແລະ ປ່າໄມ່, ພະແນກກະສິກຳ ແລະປ່າໄມ້ ແຂວງຫຼວງພະບາງ, ຫ້ອງການກະສິກຳ ແລະ ປ່າໄມ້ ເມືອງປາກອູ, ໂດຍມີການນຳຈາກອຳນາດການປົກຄອງເມືອງປາກອູ, ບໍລິສັດຜະລິດໄຟຟ້າພະລັງນໍ້າ ນໍ້າອູ, ຊຸມຊົນທ້ອງຖິ່ນ, ໂຮງຮຽນ, ບໍລິສັດທີ່ປຶກສາດ້ານສິ່ງແວດລ້ອມ ແລະ ພາກສ່ວນອື່ນໆ ທີ່ກ່ຽວຂ້ອງເຂົ້າຮ່ວມກິດຈະກຳຄັ້ງນີ້ຢ່າງພ້ອມພຽງ. ເພື່ອປູກຕົ້ນໄມ້ໃຫ້ເປັນປ່າ, ເພີ່ມພື້ນທີ່ການປົກຄຸມຂອງປ່າໄມ້, ປົກປັກຮັກສາລະບົບນິເວດ ແລະຊີວະນາໆພັນ, ເພື່ອເພີ່ມ " ພື້ນທີ່ສີຂຽວ " ໃຫ້ແກ່ ສປປ.ລາວ.
ກິດຈະກຳໄດ້ເລີ່ມຕົ້ນໂດຍບໍລິສັດທີ່ປຶກສາດ້ານສິ່ງແວດລ້ອມໄດ້ນຳສະເໜີກ່ຽວກັບແຜນການປູກປ່າໃນບໍລິເວນເຂດອ່າງໂຕ່ງ, ພ້ອມທັງໃຫ້ຄວາມຮູ້ຄວາມເຂົ້າໃຈກ່ຽວກັບການອະນຸລັກຮັກສາປ່າໄມ້, ຊັບພະຍາກອນນໍ້າ, ສັດປ່າ ແລະຄວາມຮູ້ດ້ານອື່ນໆ. ນັກວິຊາການຈາກພະແນກກະສິກຳ ແລະປ່າໄມ້ ແຂວງຫຼວງພະບາງ ໄດ້ສະເໜີຄຳເຫັນໃນພິທີເພື່ອເປັນບົດຮຽນກ່ຽວກັບການປູກປ່າ, ການລ້ຽງປາ, ການອະນຸລັກສັດນໍ້າສັດປ່າ ແລະດ້ານອື່ນໆຕື່ມອີກ.
ຫຼັງຈາກ ທ່ານເຈົ້າເມືອງ ເມືອງປາກອູ ແລະຜູ້ຕາງໜ້າ ຂອງບໍລິສັດຜະລິດໄຟຟ້າ ພະລັງນຳ້ ນຳ້ອູ ໄດ້ຂຶ້ນປະກອບຄຳຄິດເຫັນຕາມລຳດັບແລ້ວ, ກໍໄດ້ຮ່ວມກັບປະຊາຊົນໃນຊຸມຊົນທ້ອງຖິ່ນ, ຄູອາຈານ-ນັກຮຽນ ກໍໄດ້ພ້ອມກັນລົງມືປູກຕົ້ນໄມ້ແຫ່ງຄວາມຮັກ, ຫຼັງຈາກການປູກຕົ້ນໄມ້ສຳເລັດ ແລ້ວ ກໍມີການມອບອຸປະກອນການຮຽນ ແລະ ເຄື່ອງກິລາ ໃຫ້ແກ່ໂຮງຮຽນປະຖົມບ້ານຫ້ວຍໂລ, ແລະ ຈັດພິທີປ່ອຍປາ ລົງສູ່ແມ່ນໍ້າອູ ຮ່ວມກັບພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຫຼວງພະບາງ.
ການຈັດກິດຈະກຳຄັ້ງນີ້ເຕັມໄປດ້ວຍບັນຍາກາດທີ່ຟົດຟື້ນ ແລະມີເນື້ອໃນທີ່ອຸດົມສົມບູນ, ຊຶ່ງເປັນການຊຸກຍູ້ໃຫ້ແກ່ການຮ່ວມມືຢ່າງແໜ້ນແຟ້ນລະຫວ່າງ ບໍລິສັດ ຜະລິດໄຟຟ້າ ນຳ້ອູ ກັບ ພາກສ່ວນຕ່າງໆທີ່ກ່ຽວຂ້ອງ, ເປັນການເພີ່ມທະວີສາຍພົວພັນກັບອົງການປົກຄອງທ້ອງຖິ່ນ, ວິສາຫະກິດປະຈຳທ້ອງຖິ່ນ ແລະຊຸມຊົນທ້ອງຖິ່ນ ເພື່ອແນໃສ່ເຕົ້າໂຮມຄວາມສາມັກຄີ, ເພີ່ມທະວີຜົນປະໂຫຍດ ແລະຕັ້ງໜ້າປະຕິບັດໜ້າທີ່ຮັບຜິດຊອບທາງສັງຄົມຂອງບໍລິສັດ.
ໂຄງການປູກປ່າທົດແທນຕາມແມ່ນຳ້ອູ ເປັນ ການຮ່ວມມືລະຫວ່າງ ບໍລິສັດ ຜະລິດໄຟຟ້າ ພະລັງນໍ້າ ນຳ້ອູ ແລະ ກະຊວງກະສິກຳ ແລະ ປ່າໄມ້ ສປປ.ລາວ, ໄດ້ວ່າຈ້າງບໍລິສັດທີ່ປຶກສາດ້ານສິ່ງແວດລ້ອມ ເຊິ່ງເປັນພາກສ່ວນທີສາມ ເພື່ອດຳເນີນ ການສຳຫຼວດ-ວິໄຈ ແລະ ວາງແຜນການປູກປ່າສະຫງວນລະບົບນິເວດ ຫຼາຍກວ່າ 20 ແຫ່ງ, ໃນນັ້ນ, ການປູກທົດແທນໄດ້ເລີ່ມຕົ້ນຢູ່ເຂດອ່າງໂຕ່ງຂອງເຂື່ອນໄຟຟ້ານຳ້ອູ1 ທີ່ຕັ້ງຢູ່ໃນເມືອງປາກອູ, ເຊິ່ງຈະໄດ້ຈັດການປູກທົດແທນຄືນ 4 ແຫ່ງ, ມີເນື້ອທີ່ທັງໝົດ 500 ກວ່າເຮັກຕາ, ຊຶ່ງເບ້ຍໄມ້ທີ່ຈະນຳມາປູກໃນໂຄງການປູກປ່າທົດແທນ ມີຕົ້ນໄມ້ໃຫ້ໝາກ, ໄມ້ແດງ, ໄມ້ດູ່ ແລະ ໄມ້ເສດຖະກິດອື່ນໆ. ເຊິ່ງໂຄງການດັ່ງກ່າວຈະໃຫ້ສຳເລັດພາຍໃນ 2 ປີຂ້າງໜ້າ.
ໂຄງການດັ່ງກ່າວຈະໄດ້ດຳເນີນຕາມຫຼັກການແບ່ງປັນຜົນປະໂຫຍດຂອງໂຄງການຢ່າງຄົບຖ້ວນ, ຜ່ານການເກັບກຳຄວາມເຫັນຂອງພາກສ່ວນທີ່ກ່ຽວຂ້ອງໃນທ້ອງຖິ່ນ, ລົງເລິກການຮ່ວມມືດ້ານເຂດແດນ, ນັບແຕ່ການກ້າເບ້ຍໄມ້ໄປເຖິງການປູກທົດແທນຄືນ, ການບຳລຸງຮັກສາຕາມແນວທາງ ໂດຍແມ່ນປະຊາຊົນໃນຊຸມຊົນເປັນຜູ້ດຳເນີນການໃຫ້ສຳເລັດ. ເປັນການສະແດງໃຫ້ເຫັນເຖິງຄວາມຫ່ວງໃຍຈາກບໍລິສັດໂຄງການຂອງ POWERCHINA ຕໍ່ປະຊາຊົນທີ່ດຳລົງຊີວິດລຽບຕາມແມ່ນໍ້າອູ ໃຫ້ມີຊີວິດການເປັນຢູ່, ສະພາບແວດລ້ອມທີ່ດີກວ່າເກົ່າ, ເພື່ອປະກອບສ່ວນເຂົ້າໃນການພັດທະນາການປົກປັກຮັກສາສິ່ງແວດລ້ອມລະບົບນິເວດໃນທ້ອງຖິ່ນ, ການພັດທະນາການຈ້າງງານ ແລະວຽກງານເສດຖະກິດສັງຄົມ.
ຕາງໜ້າອຳນາດການປົກຄອງ ເມືອງປາກອູ ໄດ້ສະແດງຄວາມຂອບອົກຂອບໃຈຕໍ່ ບໍລິສັດ PowerChina ທີ່ໄດ້ໃຫ້ການເອົາໃຈໃສ່ສະໜັບສະໜູນຕໍ່ວຽກງານທ້ອງຖິ່ນຕະຫຼອດມາ, ເຂື່ອນໄຟຟ້ານຳ້ອູ ເປັນໂຄງການທີ່ສຳຄັນພາຍໃນທ້ອງຖິ່ນ, ເຊິ່ງໄດ້ສະໜອງພະລັງງານທີ່ໝັ້ນຄົງ, ປັບປຸງພື້ນຖານໂຄງລ່າງພາຍໃນທ້ອງຖິ່ນ, ທັງໄດ້ສ້າງບ້ານຈັດສັນໃໝ່ທີ່ມີຄວາມສວຍງາມ, ມາຮອດປະຈຸບັນນີ້ເຫັນວ່າປະຊາຊົນພາຍໃນບ້ານ ມີຊີວິດການເປັນຢູ່ດີຂຶ້ນຫຼາຍກວ່າເກົ່າ. ມື້ນີ້,ໂຄງການປູກຕົ້ນໄມ້ທົດແທນປ່າໄດ້ມີຜົນດີຕໍ່ວຽກງານປົກປັກຮັກສາລະບົບນິເວດ ແລະສິ່ງແວດລ້ອມຂອງທ້ອງຖິ່ນ, ເປັນໂຄງການທີ່ຈະກໍ່ໃຫ້ເກີດປະໂຫຍດໃນໄລຍະຍາວ ແລະຂ້າພະເຈົ້າເຊື່ອແນ່ວ່າ ແຄມສອງຝັ່ງແມ່ນຳ້ອູ ຈະນັບມື້ນັບສວຍງາມຂຶ້ນເລື້ອຍໆ.
ຜູ້ຕາງໜ້າຈາກບໍລິສັດຜະລິດໄຟຟ້າ ພະລັງນໍ້າ ນຳ້ອູ ໄດ້ກ່າວວ່າ " ພື້ນທີ່ໃກ້ຄຽງກັບຂອງທຸກໆເຂື່ອນ ແລະເຂດອ່າງເກັບນໍ້າ ຕາມສາຍນຳ້ອູ ແມ່ນໄດ້ຮັກສາ ນຳ້ທີ່ໃສສະອາດ ແລະພູຜາທີ່ຂຽວອຸ່ມທຸ່ມຕະຫຼອດມາ, ໂຄງການປູກຕົ້ນໄມ້ທົດແທນໃນຄັ້ງນີ້ແມ່ນໄດ້ມີການວາງແຜນ, ໄດ້ພົວພັນກັບພາກລັດເພື່ອສ້າງແຜນການ, ຄັດເລືອກບໍລິສັດທ້ອງຖິ່ນເພື່ອປຶກສາຫາລື, ການເຂົ້າຮ່ວມປະຕີບັດຂອງປະຊາຊົນໃນທ້ອງຖິ່ນ, ເປັນສິ່ງຊຸກຍູ້ໃຫ້ມີການລົງມືຢ່າງເປັນທາງການໃນມື້ນີ້, ເຊິ່ງໄດ້ມີການປະຕິບັດຢ່າງເປັນຂັ້ນເປັນຕອນ. ໝາກຜົນຂອງການລົງມືປະຕິບັດໃນຄັ້ງນີ້ບໍ່ແມ່ນຈະໄດ້ມາຢ່າງງ່າຍດາຍ, ນີ້ເປັນປະຈັກພະຍານທີ່ສາມາດປະຕິບັດໄດ້ ແລະ ມີພະລັງທີ່ສຸດ, ເຊິ່ງສະແດງໃຫ້ເຫັນວ່າບໍລິສັດຜູ້ລົງທຶນຈາກ ສປ.ຈີນ ແມ່ນບໍລິສັດ ທີ່ໃຫ້ຄວາມອົບອຸ່ນ ແລະມີຄວາມຮັບຜິດຊອບສູງຕໍ່ໜ້າທີ່ທາງສັງຄົມ.”
POWERCHINA ທີ່ປະຕິບັດໂຄງການຢູ່ຕ່າງປະເທດ,ໄດ້ຍຶດໝັ້ນໃນຫຼັກການ “ສ້າງສັງຄົມໃຫ້ໜ້າຢູ່ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ”, ຍຶດໝັ້ນແນວຄວາມຄິດ ໃນການວາງແຜນທີ່ມີລັກສະນະວິທະຍາສາດ ແລະ ການພັດທະນາທີ່ເປັນມິດກັບສິ່ງແວດລ້ອມ, ນຳສະເໜີແຜນການທີ່ສົມເຫດສົມຜົນທີ່ສຸດສຳລັບ “ 7ເຂື່ອນ 1 ອ່າງໂຕ່ງ” ຢູ່ເຂດແມ່ນຳ້ອູ. ເພື່ອຫຼຸດຜ່ອນການຍົກຍ້າຍຂອງປະຊາຊົນໃນເຂດອາໄສເດີມ, ຫຼຸດຜ່ອນນຳ້ຖ້ວມໃນທີ່ດິນປູກຝັງ ແລະປ່າໄມ້, ຫຼຸດຜ່ອນຜົນກະທົບຕໍ່ສິ່ງແວດລ້ອມລະບົບນິເວດ, ນັບຕັ້ງແຕ່ການອອກແບບໂຄງການໄປຈົນເຖິງການກໍ່ສ້າງ ແລະການດຳເນີນງານຕະຫຼອດໄລຍະເວລາສຳປະທານໂຄງການ, ການຄວບຄຸມຕາມມາດຕະຖານສູງ ແລະຂໍ້ກໍານົດທີ່ເຄັ່ງຄັດ ແລະປະຕິບັດຢ່າງຈິງຈັງ ຕາມຂໍ້ກຳນົດວ່າດ້ວຍພັນທະທາງສີ່ງແວດລ້ອມ-ສັງຄົມ ໃນສັນຍາສຳປະທານ.
ບໍລິສັດ ໂຄງການເຂື່ອນໄຟຟ້ານຳ້ອູ ໄດ້ຮັກສາການພົວພັນມິດຕະພາບທີ່ເປັນມູນເຊື້ອກັບພາກລັດຂອງ ສປປ.ລາວ ໃນທຸກຂັ້ນ, ທຸກພາກສ່ວນທີ່ກ່ຽວຂ້ອງໃນສັງຄົມ ແລະ ປະຊາຊົນພາຍໃນຊຸມຊົນທ້ອງຖີ່ນ, ໃຫ້ທຸກຄົນສະໜັບສະໜູນເຊິ່ງກັນ ແລະ ກັນ, ເປັນເອກກະພາບກັນ, ເປັນເພື່ອນບ້ານທີ່ດີ, ໝູ່ທີ່ດີ, ສະຫາຍທີ່ດີ ແລະຄູ່ຮ່ວມງານທີ່ດີ” . ການປະຕິບັດໂຄງການປູກຕົ້ນໄມ້ທົດແທນ, ເພື່ອດຳເນີນການປູກຕົ້ນໄມ້, ເພີ່ມເຂດປົກຄຸມຂອງພື້ນທີ່ປ່າໄມ້ ແລະ ເຂົ້າຮ່ວມບັນດາການເຄື່ອນໄຫວທີ່ມີຫົວຂໍ້ຄື: ການປ່ອຍພັນປາ, ການປົກປັກຮັກສາສັດ ແລະ ພືດ, “ວັນຄຸ້ມຄອງໂລກ”, “ວັນສິ່ງແວດລ້ອມ” ແລະອື່ນໆ, ເປົ້າໝາຍດຽວສຸດທ້າຍກໍຄືການຮັກສາສິ່ງແວດລ້ອມ, ສ້າງບ້ານໃຫ້ເປັນເຂດສີຂຽວ, ສະໜັບສະໜູນການສ້າງ “ ລະບົບນິເວດສີຂຽວໃນ ສປປ.ລາວ”, ຕັ້ງໜ້າປະຕິບັດໃນສິ່ງທີ່ຖືກຕ້ອງ,ໃຫ້ປະໂຫຍດຕໍ່ສັງຄົມໄດ້ຫຼາຍຂຶ້ນ, ເຮັດສິ່ງທີ່ດີໃຫ້ຫຼາຍກວ່າເກົ່າ, ກໍ່ສ້າງໃຫ້ປະຊາຊົນລາວມີຄວາມຮັ່ງມີຜາສຸກ, ເພື່ອການສະໜັບສະໜຸນໃຫ້ແກ່ການສ້າງສັງຄົມແຫ່ງການແບ່ງປັນລະຫວ່າງ ລາວ-ຈີນ ໃນຕໍ່ໜ້າ.
ທີ່ມາ: ບໍລິສັດຜະລິດໄຟຟ້າ ພະລັງນຳ້ ນຳ້ອູ ຈໍາກັດ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |