ຢູນີເທວ ແລະທະນາຄານ ຮ່ວມທຸລະກິດ ລາວ-ຫວຽດ ຮ່ວມມືດ້ານເຕັກໂນໂລຊີ

ໃນວັນທີ 6 ມິຖຸນາ 2022 ທີ່ສໍານັກງານໃຫຍ່ ບໍລິສັດ ສະຕາ ໂທລະຄົມ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ບໍລິສັດ ສະຕາ ໂທລະຄົມ ຈໍາກັດ (UNITEL) ແລະ ທະນາຄານ ຮ່ວມທຸລະກິດ ລາວ-ຫວຽດ ຈຳກັດ (LVB) ວ່າດ້ວຍການສຶກສາຄວາມເປັນໄປໄດ້ ໃນການຮ່ວມມືດ້ານທຸລະກິດ ແລະ ສະໜອງເຕັກໂນໂລຊີ ຂໍ້ມູນຂ່າວສານ ໂດຍການຮ່ວມລົງນາມ ໄດ້ລົງນາມລະຫວ່າງ ທ່ານ ບຸນມີ ມາລາວົງ ຮອງຜູ້ອຳນວຍການໃຫ່ຍ ບໍລິສັດ ສະຕາ ໂທລະຄົມ ຈໍາກັດ ແລະ ທ່ານ ຫງວຽນ ຫວຽດ ຮືງ ຮອງຜູ້ອຳນວຍການໃຫຍ່ ທະນາຄານຮ່ວມທຸລະກິດ ລາວ-ຫວຽດ ຈຳກັດ ໂດຍມີ ທ່ານ ຫງວ້ຽນ ດຶກ ວູ້ ຜູ້ອໍານວຍການໃຫຍ່ ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ ແລະ ທ່ານ ລີວ ເມັງ ຮ່າ ຜູ້ອໍານວຍການໃຫ່ຍ ບໍລິສັດ ສະຕາ ໂທລະຄົມ ຈໍາກັດ ພ້ອມຄະນະ ເຂົ້າຮ່ວມເປັນສັກຂີພິຍານ.

ການສຶກສາຄວາມເປັນໄປໄດ້ໃນຄັ້ງນີ້, ສອງຝ່າຍຈະສຶກສາຄົ້ນຄວ້ານຳໃຊ້ເຕັກໂນໂລຊີເຂົ້າໃນວຽກງານຂອງທະນາຄານຮ່ວມທຸລະກິດ ລາວ-ຫວຽດ ຈຳກັດ ເພື່ອຫັນປ່ຽນເປັນການເຮັດວຽກແບບດີຈິຕອນໄດ້ຫລາຍຂຶ້ນເຊັ່ນ: ນຳໃຊ້ຫຸ່ນຍົນ (Robot) ເຂົ້າໃນການໃຊ້ຊອບແວເພື່ອແທນການໃຊ້ແຮງງານຄົນເພື່ອປັບປຸງການເຮັດວຽກແກ້ໄຂບັນຫາວຽກງານທີ່ເກີດຂຶ້ນເປັນປະຈໍາໃນແຕ່ລະວັນໃຫ້ວ່ອງໄວຂຶ້ນ ເພື່ອຫລຸດຜ່ອນຄ່າໃຊ້ຈ່າຍ ແລະຍົກລະດັບການແກ້ໄຂວຽກໃຫ້ໄວກວ່າເກົ່າ ລວມເຖິງການຄົ້ນຄວ້າຄວາມເປັນໄປໄດ້ ແລະຜັນຂະຫຍາຍບັນດາວິທີການ, ຜະລິດຕະພັນເຕັກໂນໂລຊີອື່ນຕາມຄວາມຕ້ອງການຕົວຈິງ.

ທ່ານ ຫງວຽນ ຫວຽດ ຮືງ ໄດ້ກ່າວວ່າ: ທະນາຄານ ຮ່ວມທຸລະກິດ ລາວ-ຫວຽດ ຈຳກັດ ແລະ ບໍລິສັດ ສະຕາໂທລະຄົມ ເປັນສອງອົງກອນຕາງໜ້າ, ທັງເປັນສອງອົງກອນແບບຢ່າງ ໃນສາຍພົວພັນ ລະຫວ່າງ ສອງພັກ, ສອງລັດ ຂອງສອງປະເທດ ລາວ-ຫວຽດນາມ. ໃນໄລຍະຜ່ານມາສອງຝ່າຍໄດ້ມີການພົວພັນຢ່າງແໜ້ນແຟ້ນ ຕາມນະໂຍບາຍການຮ່ວມມືສະໜັບສະໜູນເຊິ່ງກັນ ແລະກັນ ກໍຄືການນຳໃຊ້ຜະລິດຕະພັນເຊິ່ງກັນ ແລະກັນ ແລະເຊື່ອມລະບົບເຕັກໂນໂລຊີເພື່ອເສີມຂະຫຍາຍ ແລະ ພັດທະນາຜະລິດຕະພັນໃຫ້ຕອບສະໜອງຄວາມຕ້ອງການຂອງສອງຝ່າຍ.

ທ່ານ ບຸນມີ ມາລາວົງ ຮອງອໍານວຍການໃຫຍ່ ບໍລິສັດ ສະຕາ ໂທລະຄົມ ໄດ້ກ່າວວ່າ: ບໍລິສັດ ສະຕາ ໂທລະຄົມ ເຊິ່ງມີເຄື່ອງໝາຍການຄ້າ “ຢູນີເທວ”, ພາຍຫລັງ 13 ປີທີ່ໄດ້ຮັບການສ້າງຕັ້ງຂຶ້ນ ແລະ ໄດ້ສືບຕໍ່ພັດທະນາພື້ນຖານໂຄງລ່າງ ລະບົບເຄືອຂ່າຍໂທ ລະຄົມມະນາຄົມ ທີ່ນຳໃຊ້ເຕັກໂນໂລຊີທັນສະໄໝຂອງໂລກ ໃນຂອບເຂດທົ່ວປະເທດ, ໄດ້ປະກອບສ່ວນໃນການສະໜອງບໍລິການທາງດ້ານໂທລະຄົມ ແລະ ການສື່ສານ ໃຫ້ແກ່ປະ ຊາຊົນລາວ ໄປຍັງເຂດຫ່າງໄກສອກຫລີກ ໂດຍຢຶດໝັ້ນວີໄສທັດຮັບໃຊ້ປະຊາຊົນ, ຍົກສູງຊີວິດການເປັນຢູ່ຂອງປະຊາຊົນນັບມື້ດີຂຶ້ນ ແລະປະຊາຊົນມີສ່ວນຮ່ວມ. ຢູນີເທວພວກເຮົາຍາມໃດກໍຖືເອົາວຽກງານການພັດທະນາຕົນເອງເປັນໜ້າທີ່ສຳຄັນຈົນສາມາດຍົກລະດັບຕົນເອງກາຍເປັນບໍລິສັດໂທລະຄົມມະນາຄົມທີ່ນອນຢູ່ໃນລະດັບແຖວໜ້າຂອງ ສປປ ລາວ,ກັບພື້ນທີ່ສັນຍານປົກຄຸ້ມກວ້າງຂວາງ, ມີລະບົບເຄືອຂ່າຍໃຫຍ່ສຸດ ແລະຮັບໃຊ້ໃຫ້ລູກຄ້າຫລາຍສຸດ.

แชร์