ໂຮງຮຽນນານາຊາດລາວ ມອບໃບຢັ້ງຢືນໃຫ້ນັກຮຽນສໍາເລັດການຮຽນ ຂັ້ນອະນຸບານ 3 ຫາ ມ.7 ສົກນີ້

ໂຮງຮຽນ (ຮຮ) ນານາຊາລາວ ໄດ້ຈັດພິທີມອບໃບຢັ້ງຢືນໃຫ້ນັກຮຽນແຕ່ຊັ້ນອະນຸບານ 3 ຫາຊັ້ນມັດທະຍົມສຶກສາຕອນປາຍ (ມ.7) ສົກຮຽນ 2021-2022 ໃນວັນທີ 28 ພຶດສະພາ 2022 ທີ່ໂຮງແຮມແລນມາກ ນະຄອນຫຼວງວຽງຈັນ, ໂດຍເປັນກຽດມອບຂອງທ່ານ ນາງ ຄໍາປະເສີດ ກິຕິຍະວົງ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ, ມີທ່ານ ນາງ ລີປ່າເອ້ຍ ບົວປາວ ຕາງໜ້າພະແນກສຶກສາທິການ ແລະກິລາ ນະຄອນຫຼວງວຽງຈັນ ແລະ ທ່ານ ອຸ່ຍວີ ສີຣີໂນວ ຜູ້ອໍານວຍການໂຮງຮຽນນານາຊາດລາວ, ພ້ອມດ້ວຍຄະນະຮັບຜິດຊອບ, ຄູອາຈານ ແລະ ພໍ່ແມ່ຜູ້ປົກຄອງຕະຫຼອດຮອດນ້ອງນັກຮຽນເຂົ້າຮ່ວມ.

ໃນພິທີ, ໄດ້ມີການລາຍງານບົດສະຫຼຸບການຈັດຕັ້ງການຮຽນການສອນໃນສົກຮຽນ 2021-2022, ຊຶ່ງໂຮງຮຽນນານາຊາດລາວເປັນໂຮງຮຽນໜຶ່ງທີ່ໃຊ້ຫຼັກສູດການຮຽນການສອນແບບປະສົມປະສານລະຫວ່າງຫຼັກສູດແຫ່ງຊາດຂອງກະຊວງສຶກສາທິການ ແລະກິລາ ແລະຫຼັກສູດນານາຊາດ, ຊຶ່ງເປັນຫຼັກສູດແຄັທບິສ ຈາກປະເທດອັງກິດ. ສໍາລັບສົກຮຽນ 2021-2022 ມີນັກຮຽນຊັ້ນອະນຸບານ ຈໍານວນ 69 ນ້ອງ, ຍິງ 34 ນ້ອງ. ໃນນີ້, ນັກຮຽນຕ່າງປະເທດ 30 ນ້ອງ, ຍິງ 15 ນ້ອງ. ໃນສົກຮຽນນີ້ ມີນັກຮຽນອະນຸບານ 3 ຈົບການສຶກສາ ແລະ ໄດ້ຮັບໃບຢັ້ງຢືນ ຈໍານວນ 29 ນ້ອງ, ຍິງ 19 ນ້ອງ. ໃນນີ້, ມີນັກຮຽນຕ່າງປະເທດ ຈໍານວນ 11 ນ້ອງ, ຍິງ 6 ນ້ອງ; ຊັ້ນປະຖົມສົມບູນ ມີນັກຮຽນທັງໝົດ 208 ນ້ອງ, ຍິງ 87 ນ້ອງ. ໃນນີ້, ມີນັກຮຽນຕ່າງປະເທດ ຈໍານວນ 19 ນ້ອງ, ຍິງ 8 ນ້ອງ, ໂດຍຈົບການສຶກສາ ແລະ ຮັບໃບຢັ້ງຢືນ ຈໍານວນ 37 ນ້ອງ, ຍິງ 18 ນ້ອງ. ໃນນັ້ນ, ມີນັກຮຽນຕ່າງປະເທດຈໍານວນ 5 ຄົນ, ຍິງ 3 ຄົນ. ສໍາລັບຊັ້ນມັດທະຍົມສົມບູນ ມີນັກຮຽນທັງໝົດ 277 ນ້ອງ, ຍິງ 135 ນ້ອງ. ໃນນັ້ນ, ມີນັກຮຽນຕ່າງປະເທດ 27 ນ້ອງ, ຍິງ 9 ນ້ອງ. ໃນສົກຮຽນນີ້, ຊັ້ນມັດທະຍົມປີທີ 4 (ມ.4) ມີນັກຮຽນສອບເສັງຈົບຊັ້ນ ແລະໄດ້ຮັບໃບຢັ້ງຢືນ ຈໍານວນ 37 ນ້ອງ, ຍິງ 15 ນ້ອງ ແລະ ຊັ້ນມັດທະຍົມປີທີ 7 (ມ.7) ມີນັກຮຽນສອບເສັງຈົບຊັ້ນ ແລະ ໄດ້ຮັບໃບຢັ້ງຢືນຈໍານວນ 42 ນ້ອງ, ຍິງ 19 ນ້ອງ.

ສໍາລັບຄູອາຈານທຸກຄົນໄດ້ເອົາໃຈໃສ່ສິດສອນນັກຮຽນຕາມໂຄງການຫຼັກສູດ ແລະແຜນການຮຽນການສອນທີ່ໄດ້ມີການວາງແຜນໄວ້ແຕ່ຕົ້ນປີ, ຕິດຕາມການກວດການັກຮຽນທີ່ຮຽນເກັ່ງ, ມີພອນສະຫວັນ ແລະເອົາໃຈໃສ່ນັກຮຽນທີ່ຮຽນອ່ອນ, ເອົາໃຈໃສ່ສິດສອນບໍາລຸງໃຫ້ທັນກັບໝູ່ຄູ່. ສ່ວນນັກຮຽນກໍມີຄວາມເຄົາລົບນັບຖືຕໍ່ກົດລະບຽບວິໄນຂອງໂຮງຮຽນວາງອອກໄດ້ດີສົມຄວນ, ເອົາໃຈໃສ່ສຶກສາຮໍ່າຮຽນ ແລະຕັ້ງໃຈຄົ້ນຄວ້າ, ສຶກສາເອົາບົດຮຽນເພື່ອຍາດໄດ້ທີ 1 ພາຍໃນຫ້ອງຮຽນ ແລະເປັນນັກຮຽນດີຮຽນເກັ່ງ. ນອກຈາກມອບໃບຢັ້ງຢືນແລ້ວ, ພາຍໃນພິທີຍັງໄດ້ຮັບຊົມການສະແດງຂອງນ້ອງໆນັກຮຽນຈາກໂຮງຮຽນດັ່ງກ່າວນໍາອີກ.

แชร์