ເມືອງເງິນ ປະຖະກະຖາ 2 ວັນປະຫວັດສາດ ລາວ-ຫວຽດນາມ

ໃນວັນທີ 7 ມິຖຸນາ 2022 ເມືອງເງິນ ຈັດປະຖະກະຖາ 2 ວັນປະຫວັດສາດ ຄື: ວັນເຊັນສົນທິສັນຍາ ມິດຕະພາບການຮ່ວມມື ລາວ-ຫວຽດນາມ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ໂດຍການປາຖະກະຖາຂອງ ທ່ານ ອາເມ ຊົງເຢ້ຽເລັ່ງ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງໄຊຍະບູລີ ໂດຍຖືເອົາປີ 2022 ເປັນປີສາມັກຄີມິດຕະພາບ ລາວ-ຫວຽດນາມ ໃຫ້ມີຄວາມເບີກບານມ່ວນຊື່ນ, ມີຂະບວນການຟົດຟື້ນ, ມີຊີວິດຊີວາ ແລະ ກາຍເປັນສັນຍາລັກ ແຫ່ງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ.

ໂອກາດນີ້, ທ່ານ ອາເມ ຊົງເຢ້ຽເລັ່ງ ກໍໄດ້ເລົ່າຫວນຄືນມູນເຊື້ອ 2 ວັນສຳຄັນດັ່ງກ່າວ ໂດຍໄດ້ຍົກໃຫ້ເຫັນມູນເຊື້ອປະຫວັດສາດຂອງການພົວພັນຮ່ວມມື ມາແຕ່ຍາວນານຂອງ ສອງພັກ, ສອງລັດ ແລະ ປະຊາຊົນ 2 ຊາດ ລາວ-ຫວຽດນາມ ພາຍໃຕ້ການນຳພາຂອງ 2 ຜູ້ນຳປະເທດ ເປັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີ ພິເສດ  ແລະ ການຮ່ວມມືຮອບດ້ານ ລາວ-ຫວຽດນາມ ເຊິ່ງເປັນປັດໄຈອັນສໍາຄັນຕັດສິນໄຊຊະນະຂອງການປະຕິວັດ ລາວ ແລະ ຫວຽດນາມ ໃນພາລະກິດຕໍ່ສູ້ປົດປ່ອຍຊາດ ໃນເມື່ອກ່ອນ ກໍຄື ການສ້າງສາພັດທະນາ ຂອງທັງສອງປະເທດໃນປະຈຸບັນ.

ຊຶ່ງການປາຖະກະຖາຄັ້ງນີ້, ກໍເພື່ອເປັນການສຶກສາອົບຮົມໃຫ້ພະນັກງານ-ລັດຖະກອນ, ທະຫານ, ຕໍາຫລວດ ແລະ ປະຊາຊົນບັນດາເຜົ່າ ໂດຍສະເພາະແມ່ນຄົນຮຸ່ນໜຸ່ມ ມີຄວາມຮັບຮູ້, ເຂົ້າໃຈທີ່ຖືກຕ້ອງ, ເລິກເຊິ່ງ, ໜັກແໜ້ນ ແລະ ສືບຕໍ່ປົກປັກຮັກສາ ແລະ ເສີມຂະ ຫຍາຍມູນເຊື້ອອັນດີງາມ ລະຫວ່າງ ລາວ-ຫວຽດນາມ ເພືື່ອປົກປັກຮັກສາໝາກຜົນຂອງການປະຕິວັດ ໄວ້ໃຫ້ໝັ້ນຄົງຍາວນານ, ທັງເປັນການຖະນຸຖະໜອມເພີ່ມພູນຄູນສ້າງມູນ ເຊື້ອດັ່ງກ່າວ ໃຫ້ຈະເລີນງອກງາມຍິ່ງຂຶ້ນ. ພ້ອມນີ້, ຍັງເປັນການຈາລຶກບຸນຄຸນ, ຄຸນງາມ ຄວາມດີຂອງພັກ, ລັດ ແລະ ປະຊາຊົນ ຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງ ແລະ ລໍ້າຄ່າ ໃນພາລະກິດປະຕິວັດແຫ່ງການປົກປັກຮັກສາ ແລະ ສ້າງ ສາພັດທະນາປະເທດຊາດ ກໍຄື ການປະກອບສ່ວນຂອງປະຊາຊົນລາວບັນດາເຜົ່າ ເຂົ້າໃນການທ້ອນໂຮມປະເທດຫວຽດນາມ ໃຫ້ເປັນອັນໜຶ່ງອັນດຽວໃນເມື່ອກ່ອນ ແລະ ປົກປັກຮັກສາ, ພັດທະນາ ແລະ ສ້າງສາປະເທດຫວຽດນາມ ໃນປະຈຸບັນ.

ຂ່າວ: ອິນແປງ ແຫວນຄຳ

แชร์