ສ້າງຄວາມເຂັ້ມແຂງ ວຽກງານກວດກາໃຫ້ພະນັກງານ ໄອຍະການປະຊາຊົນ 5 ແຂວງ

ອົງການໄອະການປະຊາຊົນສູງສຸດ ຈັດກອງປະຊຸມ ສ້າງຄວາມເຂັ້ມແຂງວຽກງານກວດກາ ໃຫ້ພະນັກງານອົງການໄອຍະການປະຊາຊົນ 5 ແຂວງຄື: ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອົງການໄອຍະການປະຊາຊົນແຂວງອັດຕະປື  ໃນລະຫວ່າງວັນທີ 6-9 ມິຖຸນາ 2022 ທີ່ ນະຄອນປາກເຊ ແຂວງຈໍາປາສັກ ໂດຍການເປັນປະທານຮ່ວມຂອງ ທ່ານນາງ ພອນທິບ ສາວະລີ ກໍາມະການຄະນະບໍລິຫານງານພັກ, ຮອງປະທານກວດກາພັກ, ຫົວໜ້າກົມກວດກາ ອົງການໄອຍະການປະຊາຊົນສູງສຸດ ແລະ ທ່ານ ຈອນ ຄອນນໍລີ ຜູ້ອໍານວຍການ ສະຖາບັນຊ່ວຍເຫລືອທາງດ້ານກົດໝາຍ ແລະ ວິຊາການເອວສະຕາ (ILSTA), ມີຜູ້ຊ່ຽວຊານ ຈາກອົງການ ILSTA, ກົມຕ້ານ ແລະ ກວດສອບການສໍ້ລາດບັງຫລວງ, ອົງການກວດກາແຫ່ງລັດ, ມີພາກສ່ວນກ່ຽວຂ້ອງ ແລະ ຄະນະຮັບຜິດຊອບ ເຂົ້າຮ່ວມ.

ທ່ານ ນາງ ພອນທິບ ສາວະລີ ໄດ້ຍົກໃຫ້ເຫັນເຖິງ ເຫດຜົນ ແລະ ຄວາມຈຳເປັນໃນການຝຶກອົບຮົມໃນຄັ້ງນີ້, ເພື່ອເຮັດໃຫ້ພະນັກງານໄອຍະການປະຊາຊົນ ບັນດາແຂວງ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບວຽກງານກວດກາ, ການຕ້ານການສໍ້ລາດບັງຫລວງ, ການຕ້ານການຟອກເງິນ, ການຕ້ານການສະໜອງທຶນໃຫ້ຜູ້ກໍ່ການຮ້າຍ ແລະ ການແກ້ໄຂຄຳຮ້ອງທຸກ ພ້ອມທັງຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ຢ່າງມີປະສິດທິພາບ; ພັດທະນາວຽກງານກົມກວດກາ ໃຫ້ເປັນລະບົບ ແລະ ສອດຄ່ອງກັບສະພາບຕົວຈິງໃນປັດຈຸບັນ. ພ້ອມນີ້, ທ່ານຍັງໄດ້ເນັ້ນໃຫ້ຜູ້ເຂົ້າຮ່ວມ ເອົາໃຈ ໃສ່ຢ່າງຕັ້ງໜ້າ ໃນການແລກປ່ຽນບົດຮຽນ ພ້ອມທັງຖອດຖອນທາງດ້ານປະສົບການນຳຄູ-ອາຈານ, ຜູ້ເຂົ້າຮ່ວມດ້ວຍກັນ ເພື່ອກຳແໜ້ນບົດຮຽນ, ພ້ອມທັງນໍາໄປຈັດຕັ້ງຜັນຂະຫຍາຍ ເຂົ້າໃນການປະຕິບັດວຽກງານກວດກາ ຂອງອົງການໄອຍະການປະຊາຊົນ ຢ່າງມີປະສິດທິຜົນ, ເຮັດໃຫ້ອົງການໄອຍະການປະຊາຊົນ ປອດໃສ, ເຂັ້ມແຂງ ແລະ ໜັກແໜັນ, ຮັບປະ ກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ຖືກຕ້ອງ ແລະ ມີຄວາມເປັນເອກະພາບ ຕາມກົດໝາຍ ແລະ ມີຜົນສໍາເລັດ ປະກອບສ່ວນເສີມຂະຫຍາຍບົດບາດການນຳພາຂອງພັກ ຢູ່ອົງການໄອຍະການປະຊາຊົນ ຢ່າງບໍ່ຢຸດຢັ້ງ. 

ໂອກາດນີ້, ບັນດາຄູຝຶກ, ວິທະຍາກອນ, ຜູ້ຊ່ຽວຊານ ແລະ ສໍາມະນາກອນ ໄດ້ພ້ອມກັນຍົກບັນຫາຕ່າງໆຂຶ້ນມາຄົ້ນຄວ້າ ແລະ ແລກປ່ຽນບົດຮຽນ ກ່ຽວກັບ 5 ບົດຮຽນ ຄື: ພາບລວມຂອງການສໍ້ລາດບັງຫຼວງສາກົນ; ການຕ້ານສະກັດກັ້ນການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ; ການຕ້ານການສໍ້ລາດບັງຫລວງ ແລະ ການດໍາເນີນຄະດີສໍ້ລາດບັງຫລວງ ຢູ່ ສປປ ລາວ; ການສືບສວນ-ສອບສວນ ການສໍ້ລາດບັງຫລວງ; ພາລະບົດບາດຂອງກົມກວດກາ ແລະ ຄໍາສັ່ງ ຂອງຫົວໜ້າອົງການໄອຍະການປະຊາຊົນສູງສຸດ.

ຂ່າວ-ພາບ: ອານຸສັກ ກວາງວັນ

แชร์