ການຮ່ວມມື ດ້ານພະລັງງານ ແລະບໍ່ແຮ່ ລາວ-ຫວຽດນາມ ຢູ່ອັດຕະປືມີຜົນສຳເລັດ

ຕະຫລອດໄລຍະ 60 ປີ ແຫ່ງການສ້າງສາຍພົວພັນການທູດ ລະຫວ່າງລາວ-ຫວຽດນາມ ແລະ 45 ປີ ແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມື ລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະແຂວງອັດຕະປືຮ່ວມມືກັບແຂວງແຮກສ່ຽວໃນພາກກາງ ແລະພາກໃຕ້ຂອງ ສສ ຫວຽດນາມ ມາຮອດປັດຈຸບັນມີ 8 ແຂວງ ແລະ 2 ນະຄອນ. ໃນນີ້, ວຽກງານພະລັງງານ ແລະ ບໍ່ແຮ່ ເປັນຍຸດທະສາດສໍາຄັນໃນການປະກອບສ່ວນພັດທະນາ ເສດຖະກິດ-ສັງຄົມຂອງຊາດ ກໍຄືແຂວງອັດຕະປືຍາມໃດກໍໄດ້ເພີ່ມພູນຄູນສ້າງມິດຕະພາບແບບພິເສດການຮ່ວມມືຮອບດ້ານນັບມື້ຍິ່ງຂະຫຍາຍຕົວກ້າວເຂົ້າສູ້ລວງເລິກ, ແທດຫມາະກັບສະພາບການຕົວຈິງ ແລະມີປະສິດທິຜົນ, ສາມາດຕອບສະຫນອງຄວາມມຸ່ງມາດປາຖະຫນາຂອງປະຊາຊົນສອງຊາດນັບມື້ດີຂຶ້ນເລື້ອຍໆ.

ທ່ານ ວິທະຍາ ພົມມະຈັນ ກໍາມະການພັກແຂວງ, ຫົວຫນ້າພະແນກພະລັງງານ ແລະ ບໍ່ແຮ່ແຂວງ ໄດ້ກ່າວຕໍ່ສື່ມວນຊົນເມື່ອບໍ່ດົນມານີ້ ວ່າ: ແນວທາງຂອງພັກ ໄດ້ກໍານົດຢ່າງຈະແຈ້ງກ່ຽວກັບການຮ່ວມມືຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເປັນເພື່ອນມິດຍຸດທະສາດຮ່ວມຊະຕາກໍາທາງປະຫວັດສາດ ແລະ ຮ່ວມອຸດົມການເພື່ອກ້າວຂຶ້ນສັງຄົມນິຍົມ, ຄຽງບ່າຄຽງໄຫລ່ຮ່ວມສະຫນາມຮົບ, ຮ່ວມຂຸມຄອງອັນດຽວກັນ ຕໍ່ສູ້ຈັກະພັດຜູ້ຮຸກຮານຕົວດຽວກັນ ສາມັກຄີກັນ ແລະ ພ້ອມກັນປົກປັກຮັກສາ ແລະ ສ້າງສາ ພັດທະນາປະເທດຊາດ ໄປຕາມທິດທາງອັນດຽວກັນ, ມີສາຍພົວພັນມິດຕະ ພາບ, ສາມັກຄີແບບພິເສດ ແລະ ການຮ່ວມມືຮອບດ້ານ ທີ່ບໍ່ສາມາດ ຕັດແຍກ ຫລື ຕັດຂາດກັນໄດ້. ສິ່ງສຳຄັນໄດ້ມີຍຸດທະສາດ ແລະ ຄາດຫມາຍການຮ່ວມມື ເພື່ອພັດທະນາເຊັ່ນ: ພັດທະນາຄວາມໝັ້ນຄົງສາຍພົວພັນ ສືບຕໍ່ຮຸ່ນຕໍ່ຮຸ່ນໃຫ້ຢືນຍົງ, ພ້ອມກັນປະຕິບັດສອງຫນ້າທີ່ຍຸດທະສາດ ປົກປັກຮັກ ແລະ ສ້າງສາພັດທະນາປະເທດຊາດ, ພ້ອມກັນກ້າວສູ່ຈຸດໝາຍສັງຄົມນິຍົມ, ມີຄວາມສາມັກຄີກັນໃຫ້ການຊ່ວຍເຫລືອເຊິ່ງກັນ ແລະກັນ, ທັງມີການຮ່ວມມືຮອບດ້ານໃນທຸກຂົງເຂດວຽກງານເຊັ່ນ: ບໍ່ວ່າຈະເປັນດ້ານການເມືອງ,ການຕ່າງປະເທດ, ດ້ານປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ, ການລົງທຶນ-ການຄ້າ, ດ້ານຄົມມະນາຄົມ-ຂົນສົ່ງ ແລະດ້ານວັດທະນະທໍາ-ສັງຄົມ, ການຮ່ວມມືດ້ານການສຶກສາ, ພັດທະນາຊັບພະຍາກອນມະນຸດ ແລະ ບໍາລຸງສ້າງວິຊາຊີບ ແລະອື່ນໆ.

ສໍາລັບການຮ່ວມມື ດ້ານພະລັງງານ ແລະບໍ່ແຮ່ ລາວ-ຫວຽດນາມ ຢູ່ແຂວງອັດຕະປື ກໍມີຫລາຍດ້ານທີ່ພົ້ນເດັ່ນ ແລະ ມີຜົນສໍາເລັດເປັນກ້າວໆ ເຊິ່ງປະກອບມີຫລາຍກິດຈະກໍາເຊັ່ນ: ການລົງທຶນດ້ານພະລັງງານມີ: ໂຄງການເຂື່ອນໄຟຟ້າລວມມີ 4 ໂຄງການຄື: ເຂື່ອນໄຟຟ້າເຊກະໝານ 1, ເຂື່ອນໄຟຟ້າເຊກະໝານຊານໄຊ, ເຂື່ອນໄຟຟ້າເຊກອງລຸ່ມ A, ເຂື່ອນໄຟຟ້າເຊກອງລຸ່ມ B, ທັງ 2 ໂຄງການຄາດວ່າຈະສຳເລັດໃນປີ 2025. ນອກຈາກນີ້, ຍັງມີໂຄງການໄຟຟ້າຄວາມຮ້ອນ 1 ໂຄງການ, ເປັນໂຮງງານໄຟຟ້າຄວາມຮ້ອນຈາກເສດອ້ອຍ, ໂຄງການໄຟຟ້າແສງຕາເວັນອ່າງນໍ້າເຊກະຫມານ 1(MOU) 1 ໂຄງການ, ໂຄງການສາຍສົ່ງ ແລະ ການສະໜອງພະລັງງານ 3+1 ໂຄງການ ປະກອບມີໂຄງການສາຍສົ່ງ 230Kv (ເຂື່ອນໄຟຟ້າເຊກະໝານ1) ສົ່ງອອກໄຟຟ້າ ໄປຫວຽດນາມ, ໂຄງການສາຍສົ່ງ 230Kv (ເຂື່ອນໄຟຟ້ານໍ້າກົງ 2-3) ສົ່ງອອກໄຟຟ້າໄປຫວຽດນາມ, ໂຄງການສາຍສົ່ງ 35Kv(ນຳເຂົ້າໄຟຟ້າ ຈາກ ຫວຽດນາມ ສະໜອງໄຟຟ້າໃຫ້ ບໍລິສັດວັງຕັດ, ໂຄງການສາຍສົ່ງ 500 KV ພະລັງງານລົມ ສົ່ງອອກໄຟຟ້າໄປຫວຽດນາມ. ກິດຈະການລົງທຶນ ດ້ານບໍ່ແຮ່ປະກອບມີ: ໂຄງການສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ມີ 2 ບໍລິສັດ, ມີ 2 ກິດຈະກໍາ ແລະ ໂຄງການຂຸດຄົ້ນ-ປຸງແຕ່ງແຮ່ທາດ ມີ 1 ບໍລິສັດ, 1 ກິດຈະກໍາ. ລວມມູນຄ່າການລົງທຶນທັງຫມົດໃນ 2 ກິດຈະກໍາຫລັກມີ 815.133.145 ໂດລາສະຫະລັດ, ໃນນີ້; ມູນຄ່າການລົງທຶນ ດ້ານສະຖານີສາຍສົ່ງ 30.800.000 ໂດລາສະຫະລັດ, ມູນຄ່າການລົງທຶນດ້ານພະລັງານ 691.000.000 ໂດລາສະຫະລັດ ແລະ ມູນຄ່າການລົງທຶນ ດ້ານແຮ່ທາດ: 93.333.145 ໂດລາສະຫະລັດ.

ບັນດາຜົນໄດ້ຮັບ ຈາກການຮ່ວມມື ແລະການລົງທຶນລະຫວ່າງ ສປປ ລາວ ແລະ ສສ ຫວຽດ ນາມ ຢູ່ແຂວງອັດຕະປືໃນໄລຍະຜ່ານມາເຫັນໄດ້ວ່າ: ຕ່າງຝ່າຍຕ່າງມີຜົນປະໂຫຍດຮ່ວມກັນ ເຊິ່ງໄດ້ສະແດງອອກເຖິງດ້ານການເມືອງ ຕອບສະໜອງໄດ້ຄາດໝາຍຍຸດທະສາດລວມ ຂອງສອງພັກ, ສອງລັດ, ຮັກສາໄດ້ມູນເຊື້ອປະຫວັດສາດພິລະອາດຫານ ໃນການຕໍ່ສູ້ກູ້ຊາດຮ່ວມກັນ, ຮັກສາໄດ້ສາຍພົວພັນເພື່ອນມິດຍຸດທະສາດ ແລະຄວາມສາມັກຄີແບບພິເສດຮອບດ້ານນັບມື້ແໜ້ນແຟ້ນຍິ່ງຂຶ້ນ, ປະກອບ ສ່ວນຊ່ວຍບັນລຸຄາດໝາຍຕາມແຜນແມ່ບົດ ແລະແຜນພັດທະນາເສດຖະກິດ-ສັງຄົມ ຂອງແຂວງ, ປະກອບສ່ວນຊ່ວຍສະໜັບສະໜູນວຽກງານປ້ອງກັນຊາດ-ປ້ອງກັນຄວາມສະຫງົບລຽບຕາມຊາຍແດນ. ດ້ານເສດຖະກິດ: ປະກອບສ່ວນສ້າງພື້ນຖານເສດຖະກິດ ທີ່ໝັ້ນຄົງ ແລະ ຍືນຍົງ, ປະກອບສ່ວນສ້າງຖານລາຍຮັບຂອງແຂວງ ແລະສ້າງລາຍໄດ້ໃຫ້ປະຊາຊົນ. ດ້ານສັງຄົມ: ໄດ້ຮັບການຊຸກຍູ້ ເພີ່ມທະວີການພົວພັນຮ່ວມມືຫລາຍຂຶ້ນ ແລະການໄປມາຫາສູ່ໃກ້ຊິດຕິດແທດກັນຫລາຍຂຶ້ນ, ໄດ້ສ້າງວຽກເຮັດງານທໍາຕິດພັນກັບບັນດາໂຄງການ, ມີຄວາມເຄົາລົບນັບຖືຮີດຄອງປະເພນີອັນງາມຂອງສອງຊາດກໍຄືແຂວງອັດຕະປື, ໃຫ້ການຊ່ວຍເຫລືອເຊິ່ງກັນ ແລະກັນ ໃນຍາມປະສົບໄພພິບັດ ແລະບັນຫາໂລກລະບາດຕ່າງໆເປັນປົກກະຕິ.

แชร์