UNFPA ແລະຟີລິບປິນ ຊ່ວຍເຫຼືອດ້ານສຸຂະພາບຈິດ ແກ່ໄວໜຸ່ມລາວ

ໃນວັນທີ 3 ມິຖຸນາ 2022 ທີ່ນະຄອນຫລວງວຽງຈັນ, ອົງການສະຫະປະຊາຊາດກອງທຶນສຳລັບປະຊາກອນ (UNFPA) ແລະ ລັດຖະບານຟີລິບປິນ ຮ່ວມມືກັນສະໜອງການຊ່ວຍເຫລືອທາງດ້ານສຸຂະພາບຈິດ ແລະຈິດຕະສັງຄົມໃຫ້ແກ່ໄວໜຸ່ມເພື່ອເປັນສ່ວນໜຶ່ງໃນການຕອບໂຕ້ຕໍ່ພະຍາດໂຄວິດ-19 ໃນລາວ, ທັງສ້າງຄວາມເຂັ້ມແຂງໃນການບໍລິການສາຍດ່ວນເພື່ອໃຫ້ຄໍາປຶກສາດ້ານສຸຂະພາບຈິດ ແລະ ຈິດຕະສັງຄົມ ໃຫ້ແກ່ແມ່ຍິງ, ເດັກຍິງ ແລະໄວໜຸ່ມທີ່ອົງການ UNFPA ໃຫ້ການສະໜັບສະໜູນໃນໄລຍະຜ່ານມາ. ພ້ອມນັ້ນໄດ້ແຜນເຄື່ອນໄຫວຕໍ່ໜ້າໂດຍສູນກາງຊາວໜຸ່ມປະຊາຊົນປະຕິວັດລາວເປັນເຈົ້າການໃນການຈັດຕັ້ງປະຕິບັດວຽກງານດັ່ງກ່າວ, ລວມມີການຝຶກອົບຮົມເພື່ອສ້າງຂີດຄວາມສາມາດໃຫ້ຜູ້ໃຫ້ຄໍາປຶກສາໄວໜຸ່ມໃນຂົງເຂດຕ່າງໆ ເປັນຕົ້ນສຸຂະພາບທາງເພດ ແລະສຸຂະພາບຈະເລີນພັນ, ການຈັດການກັບຄວາມຕຶງຄຽດ ແລະຄວາມສໍາພັນລະຫວ່າງໄວໜຸ່ມ.

ທ່ານ ນາງ ດີນາ ຈອຍ ອາມາຕອງ ເອກອັກຄະລັດຖະທູດແຫ່ງສາທາລະນະລັດ ຟີລິບປິນ ໄດ້ກ່າວວ່າ: ພວກເຮົາເຊື່ອໝັ້ນໃນຄວາມສໍາຄັນຂອງການຮ່ວມມື ເພື່ອເສີມຂະຫຍາຍຄວາມສະຫວັດດີພາບຂອງໄວໜຸ່ມ ດ້ວຍກົນໄກແຫ່ງຊາດໄດ້ທີ່ວາງອອກ. ການປະກອບສ່ວນໃນຄັ້ງນີ້ຈະຊ່ວຍໃຫ້ວຽກງານດັ່ງກ່າວເກີດດອກອອກຜົນເປັນຢ່າງດີ ແລະ ເລັ່ງຈັດຕັ້ງປະຕິບັດບັນດາຂົງເຂດບຸລິມະສິດໃນຍຸດທະສາດແຫ່ງຊາດ ເພື່ອການພັດທະນາໄວໜຸ່ມ ແລະ ເຍົາວະຊົນ ໂດຍສະເພາະໃນຂົງເຂດການປົກປ້ອງທາງສັງຄົມ, ໂຄງການດັ່ງກ່າວຈະປະກອບສ່ວນເຂົ້າໃນການບັນລຸກອບແຜນວຽກນາງນ້ອຍ 2030 ແລະເປົ້າໝາຍການພັດທະນາແບບຍືນຍົງ.

ທ່ານ ນາງ ມາຣຽມ ເອ ຄານ ຜູ້ຕາງໜ້າອົງການ UNFPA ປະຈຳ ສປປ ລາວ ໄດ້ກ່າວວ່າ: ການຮ່ວມມືສາມຝ່າຍຄັ້ງນີ້ ແມ່ນການຮ່ວມມືຍຸດທະສາດ ເຊິ່ງວິທີການຮ່ວມມືໃນລັກສະນະນີ້ມີຄວາມສໍາຄັນຍິ່ງເພື່ອແກ້ໄຂບັນດາສິ່ງທ້າທາຍໃນພາກພື້ນອາຊຽນທີ່ຈໍາເປັນຕ້ອງເຊື່ອມສານການສະໜັບສະໜູນດ້ານສຸຂະພາບຈິດ ແລະ ຈິດຕະສັງຄົມໃຫ້ຫລາຍຂຶ້ນເພື່ອປົກປ້ອງສຸຂະພາບ ແລະ ກຽດສັກສີຂອງ ແມ່ຍິງ, ໄວໜຸ່ມຍິງ, ເດັກຊາຍ ແລະ ຜູ້ຊາຍ. ໄລຍະຜ່ານມາ UNFPA ໄດ້ສະໜັບສະໜູນຄູ່ຮ່ວມງານໃນປະເທດເພື່ອສ້າງການຝຶກອົບຮົມທີ່ໄດ້ມາດຕະຖານ ກ່ຽວກັບການຊ່ວຍເຫລືອດ້ານສຸຂະພາບຈິດ ແລະຈິດຕະສັງຄົມໂດຍປະກອບມີອຸປະກອນຈໍາເປັນສໍາລັບຜູ້ໃຫ້ຄໍາປຶກສາ ແລະອາສາສະໝັກ.

ທ່ານ ນວນທອງ ສຸວັນວິໄຊ ຮອງເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ລັດຖະບານຟີລິບປິນ ທີ່ໄດ້ຮ່ວມມືກັບ UNFPA ໃນການສະໜັບສະໜູນການພັດທະນາໄວໜຸ່ມ ແລະເຍົາວະຊົນລາວໂດຍສະເພາະການບໍລິການໃຫ້ຄຳປຶກສາກ່ຽວກັບສຸຂະພາບຈິດ ແລະ ບັນຫາທົ່ວໄປສຳລັບໄວໜຸ່ມພ້ອມທັງສົ່ງເສີມໃຫ້ມີການເຂົ້າເຖິງການບໍລິການໃຫ້ຄໍາປຶກສາ ເພື່ອຮັບມືກັບຄວາມກົດດັນ ແລະບັນຫາທີ່ເຂົາເຈົ້າກໍາລັງປະເຊີນຢ່າງຖືກວິທີ. ປັດຈຸບັນ, ມີຜູ້ໃຫ້ຄໍາປຶກສາ ຈາກສູນກາງຊາວໜຸ່ມປະຊາຊົນປະຕິວັດລາວ, ສະຫະພັນແມ່ຍິງ ແລະສູນໄວໜຸ່ມນະຄອນຫລວງວຽງຈັນ 63 ທ່ານ, ມີຊາວໜຸ່ມອາສາສະໝັກຈາກມະຫາວິທະຍາໄລແຫ່ງຊາດ 320 ຄົນ ໄດ້ຮັບການຝຶກອົບຮົມກ່ຽວກັບເອກະສານ ແລະ ແນະນຳວິທີການເຊື່ອມສານກັບການບໍລິການອື່ນໆ ເຊັ່ນ: ເພດສຶກສາ, ການບໍລິການທີ່ເປັນມິດກັບໄວໜຸ່ມ, ເຍົາວະຊົນ ແລະການປ້ອງກັນຄວາມຮຸນແຮງບົນພື້ນຖານທາງເພດ.

ຂ່າວ: ມະນີທອນ, ຂໍ້ມູນ-ພາບ: UNFPA

แชร์