ທະຫານ ຫຼວງພະບາງ ຕ້ອນຮັບຄະນະຜູ້ແທນສະຫະພັນນັກຮົບເກົ່າທະຫານອາສາສະໝັກ ສສ ຫວຽດນາມ

ໃນວັນທີ 2 ມີຖຸນາ 2022 ຄະນະຜູແທນສະຫະພັນນັກຮົບເກົ່າທະຫານອາສາສະໝັກ ນະຄອນຮ່າໂນ້ຍ ສສ ຫວຽດນາມ, ຊຶ່ງນໍາໂດຍ ສະຫາຍ ພັນເອກ ພິເສດ ຫວູ້ ແອງ ເຕີດ ເປັນຫົວໜ້າຄະນະໄດ້ເຄື່ອນໄຫວພົບປະຢ້ຽມຢາມກອງບັນຊາການທະຫານແຂວງຫຼວງພະບາງ, ໂດຍມີ ສະຫາຍ ພັນເອກ ສີວິໄຊ ເພັງສັນຕິສຸກ ກໍາມະການພັກແຂວງ, ຫົວໜ້າການເມືອງກອງບັນຊາການທະຫານແຂວງຫຼວງພະບາງພ້ອມດ້ວຍຄະນະໃຫ້ການຕ້ອນຮັບຢ່າງອົບອຸ່ນ.

ໂອກາດນີ້ທັງສອງຝ່າຍໄດ້ພັດປ່ຽນກັນຂື້ນພົບປະຊຶ່ງໄດ້ທົບທວນຫວນຄືນມູນເຊື້ອຮັກແພງສາມັກຄີໄມຕີຈິດມິດຕະພາບ, ຜົນງານຂອງສອງພັກ, ສອງລັດ,ສອງກອງທັບ ແລະ ປະຊາຊົນສອງຊາດລາວ - ຫວຽດນາມ ໃນການຮ່ວມສໍາພັນສູ້ຮົບໄລຍະປົດປ່ອຍຂອງສອງຊາດ. ບັນດາສະຫາຍທະຫານອາສາສະໝັກຫວຽດນາມ ທີ່ເຄີຍເຄື່ອນໄຫວຮ່ວມສູ້ຮົບຢູ່ປະເທດລາວໃນເມື່ອກ່ອນ, ຊຶ່ງໄດ້ມີໂອກາດຫວນຕ່າວກັບຄືນມາຢ້ຽມຢາມ ແລະ ທັດສະນະທ່ຽວຊົມເຂດສະໜາມສູ້ຮົບເກົ່າໃນແຂວງຫຼວງພະບາງ ແລະ ແຂວງຊຽງຂວາງອີກຄັ້ງ, ການມາຢ້ຽມໃນຄັ້ງນີ້ປຽບເໝືອນການກັບຄືນສູ່ຄອບຄົວອ້າຍ, ເອື້ອຍນ້ອງທີ່ເກີດຮ່ວມທ້ອງພໍ່ແມ່ດຽວກັນ, ຫຼາຍສະຫາຍທະຫານອາສາສະໝັກຫວຽດນາມ ວິລະຊົນທີ່ເປັນລູກຮັກຫຼານແພງຂອງປະຊາຊົນລາວ ໄດ້ມີໂອກາດກັບຄືນເມື່ອຢ້ຽມຢາມບ້ານເກີດເມືອງນອນທີ່ແສນຮັກ ແລະ ກັບຄືນສູ້ອ້ອມກອດອັນອົບອຸ່ນຂອງຄອບຄົວ, ພໍ່ແມ່, ອ້າຍເອື້ອຍນ້ອງຂອງຕົນເອງ, ພ້ອມກັນນີ້ຍັງເປັນການເສີມຂະຫຍາຍມູນເຊື້ອ, ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫ່ວາງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ - ຫວຽດນາມອ້າຍນ້ອງ, ໂດຍສະເພາະແມ່ນສະຫະພັນນັກຮົບເກົ່າທະຫານອາສາສະໝັກຮ່າໂນ້ຍຫວຽດນາມ ກັບ ກອງບັນຊາການທະຫານແຂວງຫຼວງພະບາງ ແລະ ສະຫະພັນນັກຮົບເກົ່າແຂວງຫຼວງພະບາງໃຫ້ນັບມື້ແໜ້ນແຟ້ນຍີ່ງຂຶ້ນ, ສອງຊາດລາວ - ຫວຽດນາມອ້າຍນ້ອງ ເຄີຍມີມູນເຊື້ອການພົວພັນຮັກແພງສາມັກຄີອັນສະໜິດສະໜົມ ແລະ ໃຫ້ການຊ່ວຍເຫຼືອກັນດ້ວຍຄວາມບໍລິສຸດຜຸດຜ່ອງມາຕັ້ງແຕ່ດົນນານ, ຄວາມສາມັກຄີມິດຕະພາບແບບພິເສດລະຫວ່າງລາວ - ຫວຽດນາມນັ້ນ ສຸດຍິ່ງໃຫຍ່ເຫຼືອພັນລະນາ, ໂດຍປະທານໂຮຈີ່ມິ່ງ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ເປັນຜູ້ກໍ່ສ້າງຂຶ້ນ ແລະ ໄດ້ຮັບການປົກປັກຮັກສາ, ເຜີ້ມພູນຄູນສ້າງ, ຖະນຸຖະໜອມຈາກການນໍາ, ພະນັກງານ - ນັກຮົບຈາກລຸ້ນສູ່ລຸ້ນສືບຖອດກັນມາ, ດັ່ງຄໍາກອນຂອງປະທານໂຮຈີມິ່ງ ໄດ້ກ່າວວ່າ: ຮັກຫອມກັນໝາຍໝັ້ນ-ຫຼາຍສັນພູກໍປີ້ນໄຕ່, ຫຼາຍນໍ້າໃຫຍ່ໂຄກກ້ວາງ-ຂວາງຂັ້ນກໍດຸ້ງໄປ, ສອງຊາດລາວ-ຫວຽດນາມໄດ້-ຝັງຄວາມຮັກຢູ່ໃນໃຈ, ຮົງຮາທັງແມ່ຂອງ-ບໍ່ເລິກປູນປານໃດ. ສະຫາຍ ພັນເອກ ສີວິໄຊ ເພັງສັນຕິສຸກ ກໍາມະການພັກແຂວງຫົວໜ້າການເມືອງກອງບັນຊາການທະຫານແຂວງຫຼວງພະບາງໄດ້ກ່າວວ່າ: ຈາກຜົນງານ, ຄຸນງາມຄວາມດີ ວິລະກໍາອັນລໍ້າເລີດທີ່ເຕັມໄປດ້ວຍຄວາມເສຍສະຫຼະອັນສູງສົງ, ເຕັມໄປດ້ວຍເລືອດ ແລະ ນໍ້າຕາ ຂອງບັນດາເຫຼົ່າທະຫານອາສາສະໝັກຫວຽດນາມ, ພວກເຮົາລຸນລູກຫຼານຜູ້ສືບທອດທີ່ເກີດໃໝ່ໃຫຍ່ລຸນຂໍຈົດຈໍາລະນຶກບຸນຄຸນຂອງບັນດາພວກທ່ານໄວ້ຕະຫຼອດການ ແລະ ຈະສືບຕໍ່ສຶກສາອົບຮົມການເມືອງນໍາພາແນວຄິດໃຫ້ໄວໜຸ່ມລູກຫຼານຄົນຮຸນໃໝ່ໄດ້ຮັບຮູ້ ແລະພ້ອມກັນເສີມຂະຫຍາຍມູນເຊື້ອອັນດີງາມຂອງພວກທ່ານປຊົວກາລະນານ. ພິທີຍັງໄດ້ມອບຂອງຂວັນທີ່ລະນຶກໃຫ້ກັນ ແລະພົບປະດ້ວຍບັນຍາກາດເບີກບານມວນຊື່ມຕື່ມອີກ.

ຂ່າວ: ສົມພອນ ສຸວັນທອນ; ພາບ: ບຸນເພັງ ວົງແກ້ວມະນີ.

• 03/06/2022