ຫົວໜ້າຄະນະພົວພັນຕ່າງປະເທດສູນກາງພັກລາວ-ຈີນ ພົບປະສອງຝ່າຍຜ່ານວີດີໂອທາງໄກ

ໃນວັນທີ 31 ພຶດສະພາ 2022 ທ່ານ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກຜ່ານວີດີໂອທາງໄກ ກັບ ທ່ານ ຊົ້ງທາວ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ.

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີ ແລະ ຕີລາຄາສູງ ຕໍ່ການພົບປະສອງຝ່າຍໃນຄັ້ງນີ້ ຊຶ່ງເປັນການປະຕິບັດຕາມແຜນການຮ່ວມມື ລະຫວ່າງ 2 ພັກ ກໍຄື 2 ຄະນະພົວພັນຕ່າງປະເທດສູນກາງພັກ ລາວ-ຈີນ ປະຈໍາປີ ແລະ ເປັນການຜັນຂະຫຍາຍຄວາມຮັບຮູ້ເປັນເອກະພາບກັນ ລະຫວ່າງ ການນໍາສູງສຸດຂອງສອງພັກ ລາວ-ຈີນ, ພ້ອມທັງ ແຈ້ງໂດຍຫຍໍ້ກ່ຽວກັບ ສະພາບການພົ້ນເດັ່ນພາຍໃນພັກ, ພາຍໃນປະເທດ ໂດຍສະເພາະແມ່ນຜົນສໍາເລັດຂອງການດໍາເນີນກອງປະຊຸມຄົບຄະນະ ເທື່ອທີ 4 ສະໄໝທີ XI ຂອງພັກ ປປ ລາວ ໃຫ້ຝ່າຍຈີນຊາບ, ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດ ຂອງ ກອງປະຊຸມ 2 ສະພາ ເທື່ອທີ 5 ສະໄໝທີ XIII ຂອງ ສປ ຈີນ ໃນເດືອນມີນາ 2022 ກໍຄື ຜົນສໍາເລັດຂອງ ພັກກອມມູນິດຈີນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIX ຂອງພັກ ໃນຕະຫຼອດ 5 ປີຜ່ານມາ ແລະ ອວຍພອນໃຫ້ການກະກຽມດໍາເນີນກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ ທີ່ຈະມີຂຶ້ນໃນທ້າຍປີນີ້ ປະສົບຜົນສໍາເລັດຢ່າງຈົບງາມ.

ໂອກາດນີ້ ທ່ານ ຊົ້ງທາວ ໄດ້ສະແດງຄວາມຂອບໃຈຕໍ່ການແຈ້ງສະພາບພົ້ນເດັ່ນພາຍໃນຂອງພັກ, ລັດລາວ ແລະ ຕີລາຄາສູງຕໍ່ຜົນສໍາເລັດຂອງກອງປະຊຸມຄົບຄະນະ ເທື່ອທີ 4 ສະໄໝທີ XI ຂອງພັກ ປປ ລາວ, ທ່ານ ຍັງໄດ້ແຈ້ງໃຫ້ຊາບກ່ຽວກັບສະພາບພົ້ນເດັ່ນພາຍໃນຂອງພັກກອມມູນິດຈີນໂດຍສະເພາະຜົນສໍາເລັດຂອງການຈັດຕັ້ງຜັນຂະຫຍາຍແນວຄິດ ສີຈີ້ນຜິງ ວ່າດ້ວຍສັງຄົມນິຍົມທີ່ມີລັກສະນະພິເສດຂອງຈີນ ໃນຍຸກສະໄໝໃໝ່, ຜົນສໍາເລັດໃນການພັດທະນາເສດຖະກິດ-ສັງຄົມ ຂອງຈີນ ໃນໄລຍະຜ່ານມາ ແລະການຮັບມືກັບການແພ່ລະບາດຂອງພະຍາດໂຄວິດ-19 ຢູ່ ສປ ຈີນ ໃນປັດຈຸບັນ.

ພ້ອມນັ້ນ, ສອງຝ່າຍຍັງໄດ້ເອກະພາບກັນຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ, ສອງ ຄຕພ ລາວ-ຈີນ ໃນຕະຫຼອດໄລຍະຜ່ານມາ, ເຖິງຈະມີຄວາມຫຍຸ້ງຍາກ ເນື່ອງຈາກການແພ່ລະບາດຂອງພະຍາດໂຄວິດ-19, ແຕ່ສອງຝ່າຍ ຍັງຮັກສາໄດ້ບັນຍາກາດອັນດີ ແລະ ໃຫ້ການສະໜັບສະໜູນຊຶ່ງກັນ ແລະ ກັນ, ຮັກສາໄດ້ກົນໄກການພົບປະຈໍາປີ ລະຫວ່າງ ເລຂາທິການໃຫຍ່, ປະທານປະເທດ ແລະ ການນໍາຂັ້ນຕ່າງໆ ຂອງສອງພັກ, ສອງລັດ ລາວ-ຈີນ ດ້ວຍຮູບແບບທາງໄກ, ຊຶ່ງເປັນການເສີມສ້າງຄວາມໄວ້ເນື້ອເຊື່ອໃຈຊຶ່ງກັນ ແລະກັນຢ່າງເລິກຊຶ່ງ ແລະເປັນພື້ນຖານອັນໜັກແໜ້ນໃຫ້ແກ່ການຮ່ວມມືໃນຂະແໜງການອື່ນໆ. ພ້ອມກັນນັ້ນ, ພາຍໃຕ້ການນໍາພາຊີ້ນໍາຢ່າງໃກ້ຊິດຂອງ ການນໍາສູງສຸດຂອງສອງພັກ, ສອງລັດ ລາວ-ຈີນ, ການຈັດຕັ້ງຜັນຂະຫຍາຍບັນດາແຜນການ ແລະກົນໄກການຮ່ວມມືຕ່າງໆ ທີ່ສອງພັກ, ສອງລັດ ໄດ້ລົງນາມຮ່ວມກັນໃນໄລຍະຜ່ານມາ ແມ່ນໄດ້ຮັບການຈັດຕັ້ງປະຕິບັດຢ່າງຕັ້ງໜ້າ; ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ກໍໄດ້ຮັບການຈັດຕັ້ງປະຕິບັດ ແລະສືບຕໍ່ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ; ແຜນການຮ່ວມມືລະຫວ່າງສອງພັກ, ແຜນການຮ່ວມມືບໍາລຸງສ້າງພະນັກງານ ລາວ-ຈີນ ແລະກົນໄກການຮ່ວມມືອື່ນໆ ກໍລ້ວນແຕ່ໄດ້ຮັບການຈັດຕັ້ງປະຕິບັດເປັນຢ່າງດີ.

ສອງຝ່າຍຍັງໄດ້ລົງເລິກແລກປ່ຽນຄໍາຄິດເຫັນ ແລະເປັນເອກະພາບກັນກ່ຽວກັບທິດທາງການຮ່ວມມືລະຫວ່າງສອງຄະນະພົວພັນຕ່າງປະເທດສູນກາງພັກ ລາວ-ຈີນ ໃນການເປັນເສນາທິການໃຫ້ແກ່ການພົວພັນຮ່ວມມືລະຫວ່າງ ສອງພັກ ລາວ-ຈີນ ໃນຕໍ່ໜ້າໂດຍສະເພາະແມ່ນການຈັດຕັ້ງຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ, ການຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ, ໂດຍສະເພາະແຜນການຮ່ວມມືບຳລຸງສ້າງພະນັກງານລະຫວ່າງສອງພັກ ປະຈໍາປີ ໃຫ້ສໍາເລັດຕາມແຜນ; ສືບຕໍ່ຮັກສາກົນໄກການປະສານງານຢ່າງໃກ້ຊິດໃນຂອບຫລາຍຝ່າຍ ແລະສືບຕໍ່ປະສານສົມທົບກັນໃນການຊຸກຍູ້ເສີມຂະຫຍາຍການແລກປ່ຽນລະຫວ່າງອົງການກ່ຽວຂ້ອງຂອງສອງສູນກາງພັກ ລາວ-ຈີນ ໃນຕໍ່ໜ້າ.

ໃນການພົບປະຄັ້ງນີ້, ສອງຝ່າຍຍັງໄດ້ລົງເລິກແລກປ່ຽນຄວາມຄິດເຫັນກ່ຽວກັບບັນຫາພົ້ນເດັ່ນໃນພາກພື້ນ ແລະສາກົນທີ່ສອງຝ່າຍໃຫ້ຄວາມສົນໃຈຮ່ວມກັນ.

ຂ່າວ-ພາບ: ຄຕພ

แชร์