ນາຍົກລັດຖະມົນຕີ ໄດ້ຮັບປະລິນຍາ ດຸສະດີບັນດິດ ກິຕິມະສັກ ສາຂາວິຊາລັດຖະສາດ

ໃນໂອກາດເດີນທາງໄປຢ້ຽມຢາມ ຣາຊະອານາຈັກໄທ ຢ່າງເປັນທາງການໃນລະຫວ່າງວັນທີ 1-2 ມິຖຸນາ 2022, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮັບປະລິນຍາ ດຸສະດີບັນດິດ ກິຕິມະສັກ ສາຂາວິຊາລັດຖະສາດ ຈາກມະຫາວິທະຍາ ໄລແມ່ໂຈ້ ຣາຊະອານາຈັກໄທ ໃນວັນທີ 1 ມິຖຸນາ ເນື່ອງຈາກທ່ານມີຜົນງານດີເດັ່ນໃນການບໍລິຫານ, ການພັດທະນາປະເທດຊາດ ໃນໄລຍະຜ່ານມາ ຊຶ່ງມອບໂດຍ ທ່ານ ວິລະພົນ ທອງມາ ອະທິການບໍດີ ມະຫາວິທະຍາໄລແມ່ໂຈ້ ຣາຊະອານາຈັກໄທ.

ທ່ານ ພັນຄໍາ ວິພາວັນ ກໍໄດ້ຂຶ້ນກ່າວຄໍາຂອບໃຈທີ່ມະຫາວິທະຍາໄລແມ່ໂຈ້ ມອບປະລິນຍາ ດຸສະດີບັນດິດ ກິຕິມະສັກ ສາຂາວິຊາລັດຖະສາດເຊິ່ງປະລິນຍາດັ່ງກ່າວແມ່ນມີຄວາມໝາຍມິດໄມຕີສໍາຄັນຢ່າງຍິ່ງ, ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບຖານບ້ານໃກ້ເຮືອນຄຽງທີ່ດີງາມລະຫວ່າງ ສອງປະເທດ ລາວ ແລະໄທ, ຄຳສະດຸດີ ທີ່ກ່າວເຖິງຂ້າພະເຈົ້າແທ້ຈິງແລ້ວແມ່ນຜົນງານລວມໝູ່ຄະນະເພື່ອນຮ່ວມງານທຸກລະດັບຂອງຂ້າພະເຈົ້າ ແລະ ອັນສຳຄັນຍິ່ງແມ່ນການສະໜັບສະໜູນຂອງປະຊາຊົນ.

ມະຫາວິທະຍາໄລແມ່ໂຈ້ ເປັນມະຫາວິທະຍາໄລ ທີ່ເກົ່າແກ່, ມີຊື່ສຽງ ແລະມີປະຫວັດຄວາມເປັນມາອັນຍາວນານແຫ່ງໜຶ່ງຂອງໄທເຊິ່ງເປັນສະຖາບັນການສຶກສາກໍ່ສ້າງບຸກຄະລາກອນທີ່ມີຄວາມຮູ້ຄວາມສາມາດ ແລະມີວິໄສທັດອັນກວ້າງໄກຫລາຍຮຸ່ນຄົນມາແລ້ວ. ນອກຈາກນີ້, ມະຫາວິທະຍາໄລແມ່ໂຈ້ ຍັງມີການຮ່ວມມືທາງດ້ານວິຊາການ, ໂດຍສະເພາະການແລກປ່ຽນການຮຽນການສອນ ແລະ ການສະໜັບສະໜູນການພັດທະນາບຸກຄະລາກອນ ກັບມະຫາວິທະຍາໄລຂອງລາວ ໃນການກໍ່ສ້າງຊັບພະຍາກອນມະນຸດ ແລະສະແດງຄວາມຫວັງວ່າມະຫາວິທະຍາໄລແມ່ໂຈ້ ຈະສືບຕໍ່ເພີ່ມທະວີໃຫ້ການຮ່ວມມືກັບສະຖາບັນການສຶກສາຂອງ ສປປ ລາວ ເພື່ອຊ່ວຍຍົກສູງຄຸນນະພາບຂອງການຮຽນການສອນ ແລະການຄົ້ນຄວ້າວິໄຈຕ່າງໆ ໃຫ້ໄດ້ຕາມມາດຕະຖານຂອງສາກົນເທື່ອລະກ້າວ.


ຂ່າວ-ພາບ: ອ່າຍຄຳ

แชร์