ສປປ ລາວ ຫາລືລະດັບຊາດ ກ່ຽວກັບອະນາຄົດຂອງການສຶກສາ ໃນ ສປປ ລາວ

ໃນວັນທີ 31 ພຶດສະພາ 2022 ຢູ່ນະຄອນຫລວງວຽງຈັນ, ກະຊວງສຶກສາທິການ ແລະກີລາ ແລະ ອົງການອຸຍນີເຊບຈັດກອງປະຊຸມປຶກສາຫາລືລະດັບຊາດກ່ຽວກັບອະນາຄົດຂອງການສຶກສາໃນ ສປປ ລາວ ເພື່ອກະກຽມໃຫ້ແກ່ກອງປະຊຸມສຸດຍອດກ່ຽວກັບການຫັນປ່ຽນການສຶກສາໂລກຂອງອົງການສະຫະປະຊາຊາດທີ່ຈະຈັດຂຶ້ນ ໃນເດືອນກັນຍາ 2022 ໂດຍການເປັນປະທານຂອງ ທ່ານ ນາງ ສີສຸກ ວົງວິຈິດ ຮອງລັດ ຖະມົນຕີກະຊວງສຶກສາທິການ ແລະກີລາ, ທ່ານ ນາງ ຊາຣາ ເຊກເຄນ (Sara Sekkenes) ຜູ້ປະສານງານອົງການສະຫະປະຊາຊາດປະຈໍາລາວ ແລະທ່ານ ນາງ ບີອາເຕ້ ດັດສ໌ເຕວ ຮັກສາການຜູ້ຕາງຫນ້າອົງການອຸຍນີເຊບ ປະຈໍາລາວ, ມີຜູ້ຕາງໜ້າຈາກສະຖານທູດອົດສະຕຣາລີ ແລະ ສະຫະພາບເອີລົບ, ພ້ອມດ້ວຍຄູ່ຮ່ວມພັດທະນາການສຶກສາຈາກພາກສ່ວນຕ່າງໆເຂົ້າຮ່ວມ.

ໂອກາດນີ້ ທ່ານ ສີສຸກ ວົງວິຈິດ ໄດ້ມີຄໍາເຫັນວ່າ: ການສຶກສາທີ່ມີຄຸນນະພາບ ແມ່ນຕິດພັນກັບຄວາມຈະເລີນຮຸ່ງເຮືອງດ້ານເສດຖະກິດ ແລະ ສັງຄົມ ແລະການພັດທະນາຊັບພະຍາ ກອນມະນຸດ. ການປຶກສາຫາລືນີ້ໄດ້ທົບທວນວິທີການຕ່າງໆ ເພື່ອຫລຸດຜ່ອນຜົນກະທົບຈາກການລະບາດຂອງພະຍາດໂຄວິດ-19 ຕໍ່ການສຶກສາ.

ໃນກອງປະຊຸມ, ໄດ້ຟັງການບັນບາຍຈາກຜູ້ຕາງໜ້າອົງການອຸຍນີເຊບ ແລະ ອຸຍແນັດສະໂກ ກ່ຽວກັບກອງປະຊຸມສຸດຍອດທີ່ຈະມາເຖິງກ່ຽວກັບການຫັນປ່ຽນການສຶກສາ ແລະ ໄດ້ຮັບຟັງຄໍາແນະນໍາກ່ຽວກັບອົງປະກອບ 4 ດ້ານເພື່ອປຶກສາຫາລືຄື: ການຟື້ນຟູການສຶກສາທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ຟື້ນຄືນພາບພົດການສຶກສາສໍາລັບສະຕະວັດທີ 21, ການສະໜອງເງິນທຶນແບບຍືນຍົງເພື່ອການສຶກສາ ແລະຍົກສູງລະດັບງຄວາມມຸ້ງຫວັງຂອງເປົ້າໝາຍການສຶກສາແຫ່ງຊາດ.

ທ່ານ ນາງ ເບດ ດາສເທນ ຜູ້ຕາງໜ້າອົງການອຸຍນີເຊບປະຈໍາ ສປປ ລາວ ກ່າວວ່າ: ຜົນກະທົບຂອງພະຍາດໂຄວິດ-19 ໄດ້ສ້າງຄວາມເສຍຫາຍຮ້າຍແຮງຕໍ່ການສຶກສາ ແລະອະນາຄົດຂອງເດັກນ້ອຍ ແລະໄວໜຸ່ມໂດຍບໍ່ສາມາດປະຕິເສດໄດ້. ບັນຫານີ້ຈຶ່ງເປັນໜ້າທີ່ຮັບຜິດຊອບລວມຂອງພວກເຮົາທັງໝົດເພື່ອຫັນວິກິດການນີ້ມາເປັນໂອກາດ ແລະສ້າງວິໄສທັດໃໝ່ທີ່ເຕັມໄປດ້ວຍພະລັງແຮງສູງເພື່ອຫັນປ່ຽນການສຶກສາ.

แชร์