ນາຍົກລັດຖະມົນຕີ ຮ່ວມປູກຕົ້ນໄມ້ສະຫຼອງວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ

ໃນວັນທີ 31 ພຶດສະພາ 2022 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດກິດຈະກໍາປູກຕົ້ນໄມ້ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ ເພື່ອສະເຫຼີອມສະຫຼອງວັນປູກຕົ້ນໄມ້ແຫ່ງຊາດ ຄົບຮອບ 42 ປີ ແລະ ວັນເດັກນ້ອຍສາກົນ ຄົບຮອບ 97 ປີ ໂດຍມີ ທ່ານ ພັນຄໍາ ວິພາວັນ ນາຍົກລັດຖະມົນຕີ, ພ້ອມດ້ວຍພັນລະຍາ, ມີບັນດາການນຳພັກ-ລັດ, ລັດຖະມົນຕີ, ຮອງລັດຖະມົນຕີຈາກບັນດາກະຊວງທີ່ກ່ຽວຂ້ອງ, ພ້ອມດ້ວຍ ສະມາຊິກພັກ-ພະນັກງານ, ສະມາຊິກຊາວໜຸ່ມພາຍໃນ ຫສນຍ ແລະນ້ອງນ້ອຍເຍົາວະຊົນເຂົ້າຮ່ວມ.

ການຈັດກິດຈະກຳ ສະຫຼອງວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນໃນຄັ້ງນີ້, ຫສນຍ ໄດ້ນຳເອົາຕົ້ນຈຳປາມາປູກ ແລະໄດ້ຈັດໃຫ້ມີຫຼາກຫຼາຍກິດຈະກຳເປັນຕົ້ນແຈກຢາຍເຂົ້າໜົມໃຫ້ນ້ອງນ້ອຍເຍົາວະຊົນ, ສະແດງສິລະປະຈາກນ້ອງນັກຮຽນ, ສະແດງສິລະປະ ແລະກາຍະສິນ ຈາກກອງກາຍຍະສິນແຫ່ງຊາດ, ກິດຈະກຳຖາມ-ຕອບ ຄວາມຮູ້ທົ່ວໄປກ່ຽວກັບເດັກ. ພ້ອມນັ້ນ, ຍັງມີງານຕະຫຼາດນັດ ແລະເທສະການອາຫານຢູ່ພາຍໃນ ຫໍປະຊຸມແຫ່ງຊາດຕື່ມອີກ.   

ໂອກາດດັ່ງກ່າວ, ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າ ຫສນຍ ກ່າວວ່າ: ການຈັດກິດຈະກໍາປູກຕົ້ນເພື່ອສະຫຼອງສອງວັນດັ່ງກ່າວ, ພາຍໃຕ້ຄຳຂວັນ “ການປູກຕົ້ນໄມ້ວັນນີ້ເພື່ອອະນາຄົດລູກຫຼານພວກເຮົາໃນຕໍ່ໜ້າ” ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກກໍຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃນການເພີ່ມເນື້ອທີ່ປົກຫຸ້ມສີຂຽວໃນທົ່ວປະເທດ ໃຫ້ກວມອັດຕາສູງຂຶ້ນ 70%, ທັງເປັນການປູກຈິດສໍານຶກໃຫ້ນ້ອງນ້ອຍເຍົາວະຊົນ ຮຸ່ນສືບທອດ ກໍຄື ສະມາຊິກພັກ-ພະນັກງານ ແລະພໍ່ແມ່ປະຊາຊົນລາວບັນດາເຜົ່າໃນການຟື້ນຟູ ແລະປົກປັກຮັກສາສະພາບແວດລ້ອມທາງທຳມະຊາດໃຫ້ມີຄວາມຂຽວສົດງົດງາມ, ຊຸ່ມຊື່ນ, ອຸດົມສົມບູນ, ທັງເປັນການຊ່ວຍຕ້ານ ແລະຫລຸດຜ່ອນຜົນກະທົບທີ່ເກີດຈາກໄພພິບັດທຳມະຊາດ.

ພ້ອມນີ້, ທ່ານ ອາລຸນໄຊ ສູນນະລາດ ຍັງໄດ້ຮຽກຮ້ອງໃຫ້ສະມາຊິກພັກ-ພະ ນັກງານ, ນ້ອງນ້ອຍເຍົາວະຊົນ ແລະພໍ່ແມ່ປະຊາຊົນຈົ່ງສືບຕໍ່ປຸ້ມລຸມຄວາມສາມັກຄີເປັນປຶກແຜ່ນ, ເສີມຂະຫຍາຍທ່າແຮງທາງດ້ານພູມີປະເທດພ້ອມກັນພັດທະນາຂະແໜງການຕ່າງໆ ໃຫ້ມີຄວາມຍືນຍົງ, ເປັນມິດກັບສະພາບແວດລ້ອມ ແລະສູ້ຊົນປູກຕົ້ນໄມ້ເພື່ອເຮັດໃຫ້ເນື້ອທີ່ປ່າໄມ້ໃນລາວກວມຫລາຍກວ່າ 70% ຂອງເນື້ອທີ່ປ່າໄມ້ໃນທົ່ວປະເທດ.

แชร์