ຜົນສໍາເລັດ ກອງປະຊຸມຄົບຄະນະຄັ້ງທີ 4 ຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ສະໄໝທີ XI

ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ໄດ້ໄຂຂຶ້ນ ໃນວັນທີ 18ພຶດສະພາ ແລະ ປິດລົງ ໃນວັນທີ 26 ພຶດສະພາ 2022 ທີ່ສໍານັກງານສູນກາງພັກ ນະຄອນຫລວງວຽງຈັນພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ.

ກອງປະຊຸມໄດ້ກວດກາ ແລະຕີລາຄາການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ໂດຍລົງເລິກຕີລາຄາຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ໃນຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ; ປຶກສາຫາລື ແລະ ໃຫ້ທິດຊີ້ນໍາ ຕໍ່ບັນຫາຍຸດທະສາດສຳຄັນຈໍານວນໜຶ່ງຂອງພັກ, ຂອງຊາດເປັນຕົ້ນແມ່ນການເສີມຂະຫຍາຍທ່າແຮງແລະຄວາມສາມາດບົ່ມຊ້ອນຂອງປະເທດໃຫ້ກາຍເປັນຂະແໜງເສດຖະກິດປາຍແຫຼມ; ຕີລາຄາການຊຸກຍູ້, ສົ່ງເສີມຜູ້ປະກອບການທຸລະກິດຂະໜາດນ້ອຍ-ຂະໜາດກາງ (SME) ແລະ ຈຸນລະວິສະຫະກິດ (MSME) ໃຫ້ມີຄວາມເຂັ້ມແຂງຕາມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ X;ເພີ່ມທະວີການສ້າງຊັບພະຍາກອນມະນຸດ ໃຫ້ມີຄຸນນະພາບສູງ; ການປັບປຸງລະບົບການຈັດຕັ້ງ, ກົງຈັກ ແລະກົນໄກການເຄື່ອນໄຫວຂອງບັນດາອົງການອຳນາດລັດ ໃຫ້ເຂັ້ມແຂງ ແລະມີປະສິດຕິພາບ; ຕີລາຄາຄວາມຄືບໜ້າໃນການຄົ້ນຄວ້າທິດສະດີ ແລະ ສະຫຼຸບພຶດຕິກຳ ຮັບໃຊ້ໃຫ້ແກ່ການສ້າງປະຖົມປັດໄຈເພື່ອກ້າວເດີນສູ່ຈຸດໝາຍສັງຄົມນິຍົມ; ນອກຈາກນັ້ນຍັງໄດ້ໃຫ້ທິດຊີ້ນໍາຕໍ່ການກະກຽມດໍາເນີນກອງປະຊຸມວຽກງານການເມືອງ-ແນວຄິດທົ່ວປະເທດ,ກອງປະຊຸມວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ, ວຽກງານ 3 ສ້າງ, ກອງປະຊຸມວຽກງານແຂ່ງຂັນ-ຍ້ອງຍໍຮັກຊາດ ແລະພັດທະນາທີ່ຈະໄຂຂຶ້ນໃນຕໍ່ໜ້າ

- ຄະນະບໍລິຫານງານສູນກາງພັກໄດ້ຕີລາຄາສູງຕໍ່ຜົນສໍາເລັດຂອງການພັດທະນາເສດຖະກິດ-ສັງຄົມໃນຕົ້ນປີ 2022. ເຖິງວ່າ ຈະປະເຊີນກັບຄວາມຫຍຸ້ງຍາກອັນເນື່ອງມາຈາກຜົນກະທົບຫຼາຍດ້ານຈາກສະພາບການຜັນແປຂອງເສດຖະກິດໂລກບວກກັບການລະບາດຂອງພະຍາດໂຄວິດ-19 ແຕ່ລັດຖະບານກໍຄືອົງການປົກຄອງທ້ອງຖິ່ນ ແລະປະຊາຊົນລາວບັນດາເຜົ່າໄດ້ມີຄວາມພະຍາຍາມບຸກບືນສູ້ຊົນຈັດຕັ້ງປະຕິບັດແຜນການຜະລິດ, ທຸລະກິດ ແລະບໍລິການ-ຄ້າຂາຍ, ການສ້າງສາພັດທະນາ ສາມາດຍາດໄດ້ຜົນສໍາເລັດທີ່ຕັ້ງໜ້າຫຼາຍດ້ານເຊິ່ງໄດ້ປະກອບສ່ວນສໍາຄັນເຂົ້າໃນການຮັບປະກັນໃຫ້ປະເທດຊາດສືບຕໍ່ມີສະຖຽນລະພາບ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດສືບຕໍ່ໄດ້ຮັບການພັດທະນາຢ່າງຕໍ່ເນື່ອງ; ພ້ອມນັ້ນກໍຍົກໃຫ້ເຫັນບາງດ້ານທີ່ຕ້ອງຮີບຮ້ອນແກ້ໄຂ, ເປັນຕົ້ນແມ່ນແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ, ສະພາບໄພເງິນເຟີ້, ລາຄາສິນຄ້າສູງຂຶ້ນ, ບັນຫາຂາດແຄນນໍ້າມັນ ແລະສະພາບຫຍໍ້ທໍ້ອື່ນໆ... ເຊິ່ງເປັນບັນຫາທ້າທາຍຕໍ່ເສດຖະກິດ-ສັງຄົມ ແລະການດໍາລົງຊີວິດ ຂອງປະຊາຊົນ, ພະນັກງານ, ທະຫານ, ຕໍາຫຼວດ.

ຄະນະບໍລິຫານງານສູນກາງພັກໄດ້ຮຽກຮ້ອງໃຫ້ຄະນະພັກແຕ່ລະຂັ້ນຕ້ອງຍົກລະດັບຄວາມສາມາດແລະຄຸນນະພາບຂອງການນໍາພາເພື່ອຮັບມື, ແກ້ໄຂບັນຫາແລະປັບຕົວໃຫ້ເຂົ້າກັບສະພາບເງື່ອນໄຂຕົວຈິງ; ພະນັກງານ, ສະມາຊິກພັກຍົກສູງຄວາມຮັບຜິດຊອບ, ເພີ່ມທະວີມານະຈິດປະຕິວັດໄປພ້ອມກັບເຊີດຊູຄວາມເປັນເຈົ້າການໃນການເຄື່ອນໄຫວປະຕິບັດໜ້າທີ່ວຽກງານ, ຕິດຕາມ, ກວດກາການຈັດຕັ້ງປະຕິບັດວຽກງານໃຫ້ແຂງແຮງແລະມີປະສິດທິຜົນສູງ; ຕ້ອງເຮັດວຽກງານໂຄສະນາຢ່າງກວhາງຂວາງ, ຮອບດ້ານແລະເລິກເຊິ່ງ, ທັນການແລະແທດເໝາະກັບສະພາບຕົວຈິງເພື່ອເຮັດໃຫ້ທົ່ວສັງຄົມມີຄວາມເຂົ້າໃຈແຈ້ງຕໍ່ແນວທາງຂອງພັກແລະນະໂຍບາຍຂອງລັດ

ສໍາລັບທິດທາງໃນຕໍ່ໜ້າ, ສູນກາງພັກ ໄດ້ມອບໃຫ້ລັດຖະບານ, ອົງການປົກຄອງແຕ່ລະຂັ້ນສືບຕໍ່ຍູ້ແຮງການປະຕິບັດທິດທາງ, ແຜນການ ໄລຍະທ້າຍປີ 2022 ໃຫ້ບັນລຸຄາດໝາຍທີ່ວາງໄວ້, ຮັບປະກັນສະຖຽນລະພາບເສດຖະກິດມະຫາພາກ, ກໍຄືຊີວິດການເປັນຢູ່ຂອງປະຊາຊົນ; ເອົາໃຈໃສ່ຫັນການຄຸ້ມຄອງເກັບລາຍຮັບງົບປະມານແລະເງິນຕາດ້ວຍເຄື່ອງມື ແລະລະບົບທີ່ທັນສະໄໝ; ແກ້ໄຂຂອດອັດຕັນເພື່ອປັບປຸງສະພາບແວດລ້ອມດຶງດູດເອົາການລົງທຶນຈາກພາຍໃນ ແລະຕ່າງປະເທດໃຫ້ວ່ອງໄວ ແລະມີບາດກ້າວຫັນປ່ຽນໃໝ່; ຊຸກຍູ້ສົ່ງເສີມບັນດາໂຄງການລົງທຶນໃນຂົງເຂດການຜະລິດເພື່ອທົດແທນການນໍາເຂົ້າ, ພ້ອມກັນນັ້ນກໍ່ພະຍາຍາມຈໍາກັດແລະຄຸ້ມຄອງບັນດາສິນຄ້ານຳເຂົ້າທີ່ເຮົາສາມາດຜະລິດຢູ່ພາຍໃນປະເທດໄດ້ຢ່າງຮັດກຸມ ເພື່ອສົ່ງເສີມຫົວໜ່ວຍທຸລະກິດພາຍໃນໃຫ້ມີການຂະຫຍາຍຕົວ; ກວດກາແລະປັບປຸງບັນດານະໂຍບາຍ ກໍຄືນິຕິກໍາຕ່າງໆ ກ່ຽວກັບການສົ່ງເສີມບັນຫົວໜ່ວຍທຸລະກິດຂະໜາດກາງ, ຂະໜາດນ້ອຍ ແລະ ຈຸນລະວິສາຫະກິດ, ຄຸ້ມຄອງຂະແໜງການທີ່ໄດ້ກຳນົດເປັນທ່າແຮງໃຫ້ຖືກຕ້ອງ, ລະອຽດຈະແຈ້ງ ແລະ ຄົບຖ້ວນ; ຄຸ້ມຄອງ ແລະ ສະໜອງພະລັງງານ ຮັບປະກັນໃຫ້ພຽງພໍຕໍ່ຄວາມຕ້ອງການຂອງສັງຄົມ; ສືບຕໍ່ສົ່ງເສີມ ແລະຊຸກຍູ້ການນໍາໃຊ້ພະລັງງານທາງເລືອກເຊັ່ນ: ລົດໄຟຟ້າ, ປັບປຸງການບໍລິການໂດຍສານສາທາລະນະ; ປັບປຸງຍົກລະດັບວຽກງານທ່ອງທ່ຽວຕິດພັນກັບການວາງມາດຕະການຮອງຮັບການເປີດປະເທດໃນເງື່ອນໄຂການແພ່ລະບາດຂອງພະຍາດໂຄວິດ-19 ໃຫ້ມີຄວາມຮັດກຸມ

- ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XIໄດ້ສ້າງຄວາມເປັນເອກະພາບ ແລະໃຫ້ທິດຊີ້ນໍາຕໍ່ການສືບຕໍ່ປັບປຸງ, ຍົກລະດັບບັນດາປະຖົມປັດໄຈ ຂອງການສ້າງຄວາມເຂັ້ມແຂງຂອງລະບອບປະຊາທິປະໄຕປະຊາຊົນ ຢູ່ປະເທດເຮົາໃນຊຸມປີຕໍ່ໜ້າກໍຄືໄລຍະຍາວ ເຊິ່ງຕ້ອງກໍາແໜ້ນກາລະໂອກາດການພັດທະນາທີ່ແທດເໝາະກັບຈຸດພິເສດ, ເງື່ອນໄຂຂອງປະເທດເຮົາ ໂດຍສືບຕໍ່ປັບປຸງ ແລະ ຍົກລະດັບການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນ ໂດຍຖືເອົາບັນດາຂະແໜງການ ທີ່່ເປັນທ່າແຮງບົ່ມຊ້ອນ ໃຫ້ເປັນປາຍແຫຼມ ເພື່ອສ້າງຄວາມເຂັ້ມແຂງ ໃຫ້ແກ່ພື້ນຖານເສດຖະກິດແຫ່ງຊາດ, ສ້າງຊັບພະຍາກອນມະນຸດ, ສ້າງຜູ້ປະກອບການຜະລິດ-ທຸລະກິດ ແລະບໍລິການ ໃຫ້ມີຄຸນນະພາບ ແລະ ມີຈຳນວນເພີ່ມຂຶ້ນກາຍເປັນກໍາລັງຂັບເຄື່ອນທີ່ແຂງແຮງສົມຄູ່ກັບການພັດທະນາ, ມີຄວາມສາມາດແກ່ງແຍ່ງແຂ່ງຂັນ ໃນພາກພື້ນ ແລະສາກົນ; ພ້ອມນັ້ນ ກໍສືບຕໍ່ປັບປຸງອົງການອໍານາດລັດ ກໍຄືລະບົບການເມືອງ ຂອງລະບອບປະຊາທິປະໄຕ ປະຊາຊົນເຮົາ ໃຫ້ໜັກແໜ້ນ, ເຂັ້ມແຂງ, ໂປ່ງໃສ, ຮັບໃຊ້ປະຊາຊົນ ແລະເສີມຂະຫຍາຍສິດເປັນເຈົ້າຂອງປະຊາຊົນຢ່າງແທ້ຈິງຈຶ່ງຈະສ້າງຖ່ວງທ່າ ແລະພື້ນຖານອັນໜັກແໜ້ນ ໃຫ້ປະເທດຊາດກ້າວຂຶ້ນຢ່າງບໍ່ຢຸດຢັ້ງ

ຄະນະບໍລິຫານງານສູນກາງພັກຮຽກຮ້ອງມາຍັງຄະນະພັກແຕ່ລະຂັ້ນ, ສະມາຊິກພັກ-ພະນັກງານ ຈົ່ງຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າໃນການຈັດຕັ້ງຜັນຂະຫຍາຍມະຕິ, ຄໍາສັ່ງຂອງສູນກາງພັກ ເຂົ້າສູ່ຊີວິດຕົວຈິງໃນຂົງເຂດວຽກງານຂອງຕົນເພື່ອສ້າງການຫັນປ່ຽນທີ່ແຂງແຮງແລະເລິກເຊິ່ງຢູ່ແຕ່ລະຂົງເຂດວຽກງານກໍຄືໃນທົ່ວສັງຄົມ;

ພ້ອມນັ້ນກໍສະແດງຄວາມຍ້ອງຍໍຊົມເຊີຍ ມາຍັງປະຊາຊົນລາວບັນດາເຜົ່າ, ທຸກເພດໄວ, ທຸກຊັ້ນຄົນທີ່ໄດ້ພ້ອມກັນເສີມຂະຫຍາຍຈິດໃຈຮັກຊາດ, ຄວາມສາມັກຄີເປັນປຶກແຜ່ນແໜ້ນໜາ, ເປັນເຈົ້າການເຂົ້າຮ່ວມໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນການສຸມໃສ່ຜະລິດສິນຄ້າພາຍໃນ, ກຸ້ມຕົນເອງ, ເພິ່ງຕົນເອງ, ຍົກສູງນໍ້າໃຈປະຢັດມັດທະຍັດ, ຕັ້ງໜ້າປະຕິບັດມາດຕະການສະກັດກັ້ນ, ປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງໂຄວິດ-19 ຈົນສາມາດເປີດປະເທດ ແລະເຄື່ອນໄຫວດໍາລົງຊີວິດປົກກະຕິແບບໃໝ່ໄດ້ເປັນຢ່າງດີ; ຄະນະບໍລິຫານງານສູນກາງພັກມີຄວາມເຊື່ອໝັ້ນຢ່າງໜັກແໜ້ນວ່າທົ່ວພັກ, ທົ່ວລັດ ແລະປວງຊົນລາວທັງຊາດຈະສືບຕໍ່ເສີມຂະຫຍາຍມູນເຊື້ອອັນດີງາມຂອງຊາດ, ຍົກສູງນໍ້າໃຈຮັກຊາດ, ຈິດໃຈເອກະລາດເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງດ້ວຍຄວາມຫ້າວຫັນຟົດຟື້ນເພື່ອພ້ອມກັນຜ່ານຜ່າທຸກອຸປະສັກຄວາມຫຍຸ້ງຍາກຕ່າງໆ, ສ້າງສາພັດທະນາປະເທດຊາດໃຫ້ສືບຕໍ່ກ້າວຂຶ້ນຢ່າງມີໄຊ.

แชร์