ເອກອັກຄະລັດຖະທູດລາວ ຍືນສານຕາຕັ້ງຕໍ່ ສົມເດັດ ຊຸນຕານ ຮາຈິ ຮາຊານານ ໂບນເກຍ ແຫ່ງ ບຣູໄນ ດາຣູຊາລາມ

ໃນວັນທີ 24 ພຶດສະພາ ຜ່ານມາທີ່ສຳນັກພະລາດຊະວັງອິສະຕານາ (Istana Nurul Iman) ທ່ານ ນາງ ແສງດາວັນ ວົງໄຊ ໄດ້ເຂົ້າຍື່ນສານຕາຕັ້ງຕໍ່ສົມເດັດ ຮາຈິ ຮາຊານານ ໂບນເກຍ, ຊຸນຕານ ແຫ່ງ ບຮູໄນ ດາຣູຊາລາມ (His Majesty Sultan Haji Hassanal Bolkiah, Sultan and Yang Di-Pertuan of Brunei Darussalam), ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ບຣູໄນ ດາຣູຊາລາມ, ໂດຍຊ່ອງໜ້າທ່ານ ດາໂຕະ ອິຣະວັນ (Dato Erywan), ລັດຖະມົນຕີກະຊວງການຕ່າງປະເທດ ຜູ້ທີ II ຂອງບຣູໄນ ດາຣູຊາລາມ, ເຈົ້າໜ້າທີ່ຂອງສຳນັກງານພະລາດຊະວັງ ບຣູໄນ ດາຣູຊາລາມ ແລະພະນັກງານສະຖານທູດລາວທີ່ບັນດາ ເສຣິ ເບກາວັນ ເຂົ້າຮ່ວມຕິດຕາມ.

ພາຍຫຼັງພິທີຍື່ນສານສຳເລັດລົງ, ສົມເດັດ ຊຸນຕານ ຮາຈິ ຮາຊານານ ໂບນເກຍ ໄດ້ໃຫ້ກຽດໂອ້ລົມກັບທ່ານເອກອັກຄະລັດຖະທູດລາວດ້ວຍບັນຍາກາດແຫ່ງໄມຕີຈິດ ມິດຕະພາບອັນອົບອຸ່ນໂດຍສົມເດັດ ຊຸນຕານ ໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະເຊື່ອໝັ້ນວ່າການພົວພັນຮ່ວມມືອັນດີລະຫວ່າງ ສອງປະເທດບຣູໄນ ແລະ ລາວ ຈະນັບມື້ໄດ້ຮັບການເສີມຂະຫຍາຍໃຫ້ດີຍິ່ງຂຶ້ນ. ໃນໂອກາດດັ່ງກ່າວ, ທ່ານເອກອັກຄະລັດຖະທູດ ແສງດາວັນ ວົງໄຊ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະພອນໄຊອັນປະເສີດຈາກພະນະທ່ານ ທອງລຸນ ສີສຸລິດ,ປະທານປະເທດ ແຫ່ງ ສປປ ລາວ ພ້ອມພັນລະຍາ ແລະລັດຖະບານ ແຫ່ງ ສປປ ລາວ ສົ່ງມາຍັງ ສົມເດັດ ຊຸນຕານ, ພະລາຊິນີ, ບໍລົມມະວົງສານຸວົງທຸກພະອົງ, ລັດຖະບານ ແລະປະຊາຊົນບຣູໄນທຸກທົ່ວໜ້າ. ຂະນະດຽວກັນ, ສົມເດັດ ຊຸນຕານ ໄດ້ຝາກຄວາມຢື້ຢາມຖາມຂ່າວເຖິງ ພະນະທ່ານປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ, ລັດ ຖະບານ ແລະ ປະຊາຊົນລາວ ແລະ ຍັງໄດ້ກ່າວເຖິງຄວາມຊົງຈຳອັນດີງາມໃນການມາເຂົ້າຮ່ວມກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບໃນປີ 2016, ພ້ອມກັນນີ້ ກໍ່ເຫັນວ່າ ຄວນສືບຕໍ່ສົ່ງເສີມມູນເຊື້ອການແລກປ່ຽນການຢ້ຽມຢາມຂອງການນຳຂັ້ນສູງລະຫວ່າງ ບຣູໄນ ແລະ ລາວ ໃນອະນາຄົດ. ທ່ານເອກອັກຄະລັດຖະທູດ ໄດ້ໃຫ້ຄຳໝາຍໜັ້ນວ່າ ຈະສຸມທຸກຄວາມພະຍາຍາມເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນທີ່ດີ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ໃຫ້ເກີດດອກອອກຜົນຍິ່ງຂຶ້ນກວ່າເກົ່າ, ໃນນັ້ນລວມທັງການຊຸກຍູ້ການຮ່ວມມືທີ່ສອງຝ່າຍມີທ່າແຮງເປັນຕົ້ນແມ່ນການຄ້າ, ກະສິກໍາ (ເຂົ້າ), ພະລັງງານ, ການສຶກສາ, ຊາວໜຸ່ມ ແລະກິລາ ແລະ ການໄປມາຫາສູ່ກັນ ລະຫວ່າງປະຊາຊົນໃຫ້ນັບມື້ນັບຫຼາຍຂຶ້ນ.

ສປປ ລາວ ແລະ ບຣູໄນ ດາຣູຊາລາມ ໄດ້ສ້າງຕັ້ງສາຍພົວພັນການທູດຮ່ວມກັນນັບແຕ່ວັນທີ 27 ກໍລະກົດ 1993 ເປັນຕົ້ນມາ, ເຊິ່ງທັງສອງຝ່າຍຈະໄດ້ຮ່ວມກັນສະເຫຼີມສະຫຼອງສາຍພົວພັນການທູດ ຄົບຮອບ 30 ປີ ໃນປີ 2023 ທີ່ຈະມາເຖິງນີ້.

แชร์