ກະຊວງສຶກສາຫາລືປະຕິບັດຫຼັກສູດການຝຶກເວົ້າພາສາລາວໃຫ້ນັກຮຽນຊົນເຜົ່າ

ໃນວັນທີ 26 ພຶດສະພາ 2022 ຢູ່ສະຖາບັນຄົ້ນຄວ້າວິທະຍາສາດການສຶກສາ (ສວສ), ກະຊວງສຶກສາທິການ ແລະກີລາ ກອງປະຊຸມປືກສາຫາລືຫລັກສູດການຝຶກເວົ້າພາສາລາວໃຫ້ນັກຮຽນຊົນເຜົ່າໃນຊັ້ນ ປ1 ທີ່ໄດ້ທົດລອງປະຕິບັດມາເປັນເວລາ 2 ປີ ໃນ 80 ໂຮງຮຽນຢູ່ເຂດຫ່າງໄກສອກຫຼີກ ແລະຫຼັກສູດດັ່ງກ່າວພວມໄດ້ມີການປັບປຸງເພື່ອນໍາໃຊ້ສິດສອນໃນແຂວງອື່ນໆ ໂດຍການສະໜັບສະໜູນຈາກລັດຖະບານອົດສະຕຣາລີຜ່ານແຜນງານບີຄວາ.

ໃນກອງປະຊຸມໄດ້ຍົກໃຫ້ເຫັນສະພາບຕົວຈິງຂອງ ສປປ ລາວ ເປັນປະເທດທີ່ມີຄວາມຫຼາກຫຼາຍດ້ານວັດທະນະທໍາ, ໂດຍປະກອບມີ 4 ກຸ່ມຊົນເຜົ່າຫລັກ ແລະນໍາໃຊ້ຫຼາຍກວ່າ 50 ພາສາ ແລະ ພາສາແມ່ຂອງປະຊາກອນລາວເກືອບ 40% ແມ່ນພາສາອື່ນທີ່ບໍ່ແມ່ນພາສາລາວ. ສະນັ້ນ ນັກຮຽນສ່ວນໃຫຍ່ໃນເຂດຊົນນະບົດຫ່າງໄກສອກຫຼີກ ມີແນວໂນ້ມທີ່ຈະເລີ່ມເຂົ້າຮຽນຊັ້ນ ປ1 ໂດຍທີ່ບໍ່ຮູ້ພາສາລາວມາກ່ອນຊຶ່ງເປັນພາສາທີ່ນໍາໃຊ້ໃນການຮຽນ-ການສອນໃນໂຮງຮຽນຊຶ່ງບັນຫາກໍຄື ຖ້ານັກຮຽນບໍ່ຄຸ້ນເຄີຍກັບພາສາທີ່ໃຊ້ໃນການສອນນັ້ນເປັນສິ່ງທ້າທາຍສໍາລັບພວກເຂົາທີ່ຈະເຂົ້າໃຈຄູອາຈານ, ເຂົ້າຮ່ວມໃນກິດຈະກໍາ ແລະບັນລຸຜົນການຮຽນຮູ້ທີ່ຄາດໄວ້ໄດ້.

ທ່ານ ອານຸລົມ ວິໄລພອນ ຮອງຫົວໜ້າສະຖາບັນຄົ້ນຄວ້າວິທະຍາສາດການສຶກສາໄດ້ກ່າວວ່າ: ໂຄງການທົດລອງການຝຶກເວົ້າພາສາລາວໄດ້ຮັບການຈັດຕັ້ງປະຕິບັດຢູ່ໃນ  10 ໂຮງຮຽນເປົ້າໝາຍ ແລະ 10 ໂຮງຮຽນສົມທຽບໃນ 4 ແຂວງຄື: ແຂວງຜົ້ງສາລີ, ບໍລິຄໍາໄຊ, ຄໍາມ່ວນ ແລະ ສາລະວັນ. ນັກຮຽນ ຊັ້ນ ປ1 ທີ່ເວົ້າພາສາລາວເປັນພາສາທີສອງຈະໄດ້ຮັບການສອນເພີ່ມປະມານ 1 ຊົ່ວໂມງໃນແຕ່ລະມື້ ເພື່ອພັດທະນາທັກສະການເວົ້າພາສາລາວຂອງພວກເຂົາ ຊຶ່ງການປັບປຸງທັກສະການປາກເວົ້າເປັນການສ້າງພື້ນຖານພາສາທີ່ເຂັ້ມແຂງເພາະມັນຊ່ວຍພັດທະນາທັກສະການອ່ານ ແລະການຂຽນຂອງນັກຮຽນໄປພ້ອມ. ຄູສອນທີ່ເຂົ້າຮ່ວມ ແລະ ຄູນິເທດໄດ້ຮັບປຶ້ມແບບຮຽນສະເພາະ ແລະຄູ່ມືຄູທີ່ພັດທະນາໂດຍ ສວສ ໂດຍໄດ້ຮັບການສະໜັບສະໜູນຈາກແຜນງານບີຄວາ, ພ້ອມທັງຝຶກອົບຮົມວິທີການສອນການຝຶກເວົ້າພາສາລາວ.

ທ່ານນາງ ພອນສິຣິ ອຸໄທວັນ ຫົວໜ້າຂະແໜງຄົ້ນຄວ້າການສອນພາສາລາວສຳລັບຊົນເຜົ່າ ສວສ ໄດ້ສະເໜີຜົນການປະເມີນວ່າ: ຈາກການທົດລອງສອນຜ່ານມາ, ພວກເຮົາເຂົ້າໃຈຫຼາຍຂຶ້ນກ່ຽວກັບປະລິມານ ແລະ ລະດັບຂອງເນື້ອໃນບົດຮຽນທີ່ເໝາະສົມກັບນັກ ຮຽນ ຊັ້ນ ປ1 ຜູ້ທີ່ບໍ່ເວົ້າພາສາລາວມາແຕ່ກໍາເນີດ, ພວກເຮົາຈະໄດ້ປັບປຸງເນື້ອໃນ ແລະລະດັບຂອງການທົດລອງການຝຶກເວົ້າພາສາລາວເພື່ອຕອບຮັບກັບຜົນຂອງການສຶກສາປະເມີນທີ່ໄດ້ຮັບ. ນອກນີ້, ຄູ ແລະນັກຮຽນ ເຫັນວ່າມີຄວາມກະຕືລືລົ້ນທີ່ຈະນໍາໃຊ້ສື່ອຸປະກອນການຮຽນ-ການສອນ ວິຊາພາສາລາວຫຼາຍຂຶ້ນ ເຊັ່ນ: ເຈ້ຍຄຳສັບ, ໂປສເຕີ, ເກມ, ເພງ ແລະ ພວກເຮົາກຳລັງວາງແຜນພັດທະນາ ບັນດາສື່ອຸປະກອນເພີ່ມເຕີມເຫຼົ່ານີ້ເພື່ອຮັບປະກັນວ່າເດັກນ້ອຍຈະໄດ້ຮັບຮູ້ພາສາລາວທີ່ດີເລີດ ແລະມີຄວາມມ່ວນຊື່ນໃນການຮຽນ.

แชร์