ກົມງົບປະມານແຫ່ງລັດ ລົງຊຸກຍູ້ການປະຕິບັດຫັນຫົວໜ່ວຍກຸ້ມຕົນເອງດ້ານງົບປະມານ

ໃນວັນທີ 24 ພຶດສະພາ ທີ່ຜ່ານມາກົມງົບປະມານແຫ່ງລັດ ກະຊວງການເງິນ ແລະຄະນະຮັບຜິດຊອບນໍາໂດຍ ທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດກະຊວງການເງິນລົງຊຸກຍູ້, ຕິດຕາມການຈັດຕັ້ງປະຕິບັດເຮັດທົດລອງຫັນຫົວໜ່ວຍກຸ້ມຕົນເອງທາງດ້ານງົບປະມານຂອງມະຫາວິທະຍາໄລແຫ່ງຊາດເພື່ອຮ່ວມກັນຕີລາຄາ, ແລກປ່ຽນບົດຮຽນ, ຂໍ້ສະດວກ-ຂໍ້ຫຍຸ້ງຍາກ ແລະ ຂໍ້ສະເໜີຕ່າງໆຂອງການເຮັດທົດລອງ ເພື່ອຜັນຂະຫຍາຍໄປສູ່ຫົວໜ່ວຍອື່ນ ແລະຍົກລະດັບຂອງການເຮັດທົດລອງໃຫ້ກວ້າງຂວາງ, ເລິກຊຶ່ງຂຶ້ນຕາມທິດຊີ້ນໍາຂອງລັດຖະບານໂດຍມີ ທ່ານ ຄໍາເຜີຍ ພົມມະຈັນ ຫົວໜ້າຫ້ອງການແຜນການ-ການເງິນ ມະຫາວິທະຍາໄລແຫ່ງຊາດ, ທ່ານ ທອງສະຫວັນ ປັນຍາວິຈິດ ຫົວໜ້າກົມຄຸ້ມຄອງຫົວໜ່ວຍວິຊາການ ແລະພາລະກອນກະຊວງພາຍໃນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ພູວົງ ກິດຕະວົງ ໄດ້ໃຫ້ຮູ້ວ່າ: ການຈັດຕັ້ງປະຕິບັດເຮັດທົດລອງຫັນຫົວໜ່ວຍກຸ້ມຕົນເອງທາງດ້ານງົບປະມານ, ເປັນວຽກງານທີ່ມີຄວາມສໍາຄັນເພື່ອຜັນຂະຫຍາຍມະຕິຂອງກົມການເມືອງສູນກາງພັກ, ມະຕິຂອງສະພາແຫ່ງຊາດ ແລະ ເປັນການຜັນຂະຫຍາຍທິດຊີ້ນໍາຂອງ ລັດຖະບານຕາມແຈ້ງການຂອງຫ້ອງວ່າການສໍານັກງານນາຍົກ ສະບັບເລກທີ 593/ຫສນຍ, ລົງວັນທີ 4 ພຶດສະພາ 2022, ໄດ້ມີການສືບຕໍ່ຈັດຕັ້ງປະຕິບັດການເຮັດທົດລອງຕາມຄໍາແນະນໍາຂອງກະຊວງການເງິນ ແລະໃຫ້ມີການສືບຕໍ່ຜັນຂະຫຍາຍໄປຍັງຫົວໜ່ວຍອື່ນໆທີ່ມີເງື່ອນໄຂເພື່ອໃຫ້ສາມາດຕີລາຄາ ແລະ ຖອດຖອນບົດຮຽນໄດ້ໂດຍພື້ນຖານ.

ສໍາລັບການເຮັດທົດລອງຫັນກຸ້ມຕົນເອງຂອງມະຫາວິທະຍາໄລແຫ່ງຊາດ ກ່ອນຈະມາເປັນຫົວໜ່ວຍທົດລອງ ກໍໄດ້ມີການຈັດກອງປະຊຸມກັນຫລາຍຄັ້ງເພື່ອແລກປ່ຽນ ແລະເອກະພາບກັນໂດຍສະເພາະການຈັດສັນແຜນຄືນໃໝ່ຈາກໃນເມື່ອກ່ອນມີການໃຊ້ແຜນງົບປະມານທີ່ຊ້ອນກັນທັງລາຍຈ່າຍປົກກະຕິ ແລະ ວິຊາການແຕ່ພາຍຫລັງທີ່ເຮັດທົດລອງຈະໄດ້ແຍກແຜນອອກເພື່ອແບ່ງຄວາມຮັບຜິດຊອບເປັນອັນສະເພາະຄື: ລາຍຈ່າຍເງິນເດືອນ ແລະເງິນນະໂຍບາຍແມ່ນລັດຖະບານເປັນຜູ້ຮັບຜິດຊອບທັງໝົດ. ສ່ວນລາຍຈ່າຍເງິນບໍລິຫານ, ດັດສົມ-ສົ່ງເສີມ ແລະ ລາຍຈ່າຍຊື້ໃໝ່(ພາກ 62-66) ແມ່ນມະຫາວິທະຍາໄລແຫ່ງຊາດຮັບຜິດຊອບເອງທັງໝົດໂດຍນໍາໃຊ້ລາຍຮັບພາຍໃນຂອງຕົນທີ່ເກັບໄດ້ຕາມລັດຖະບັນຍັດຂອງປະທານປະເທດ ເພື່ອມາປະຕິບັດລາຍຈ່າຍຂອງຕົນຕາມລະບຽບການ ແລະດ້ວຍຄວາມຮັບຜິດຊອບສູງ.

ສຳລັບການເຮັດທົດລອງຫັນຫົວໜ່ວຍກຸ້ມຕົນເອງໃນໄລຍະຜ່ານມາກະຊວງການເງິນໄດ້ສົມທົບພາກສ່ວນກ່ຽວຂ້ອງດໍາເນີນມາແຕ່ປີ 2020 ເຊິ່ງໄລຍະນັ້ນແມ່ນການເກັບກໍາຂໍ້ມູນຫົວໜ່ວຍເປົ້າໝາຍ ແລະສ້າງນິຕິກໍາຕ່າງໆ ໃນການເຮັດທົດລອງ, ປັດຈຸບັນໄດ້ສໍາເລັດໂດຍພື້ນຖານ, ການອອກຄໍາແນະນໍາສະບັບເລກທີ 2258/ກງ, ວັນທີ 21/5/2021 ແລະສໍາເລັດການຄົ້ນຄ້ວາຕົກລົງເອົາ 5 ຫົວໜ່ວຍເປັນຫົວໜ່ວຍທົດລອງຫັນກຸ້ມຕົນເອງປະກອບມີ: ໂຮງໝໍມະໂຫສົດ, ໂຮງໝໍມິດຕະພາບ, ໂຮງໝໍເຊດຖາທິລາດ, ມະຫາໄລແຫ່ງຊາດ ແລະວິທະຍາໄລເຕັກນິກປາກປ່າສັກ.

ຂ່າວ-ພາບ: ກະຊວງການເງິນ

แชร์