ສ້າງຄວາມເຂັ້ມແຂງ ວຽກຕິດຕາມກວດກາ ແລະ ປະເມີນຜົນ ຂົງເຂດວຽກງານການເງິນ

ກົມນະໂຍບາຍການເງິນ ກະຊວງການເງິນ ຈັດສຳມະນາການຕິດຕາມ ແລະ ປະເມີນຜົນ ການຈັດຕັ້ງປະຕິບັດວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ໃນລະຫວ່າງວັນທີ 25-26 ພຶດສະພາ 2022 ທີ່ແຂວງຫຼວງພະບາງ,  ທັງນີ້ ກໍເພື່ອເປັນການສ້າງຄວາມເຂັ້ມແຂງ ໃນວຽກງານການຕິດຕາມ ແລະ ປະເມີນຜົນໃນຈັດຕັ້ງປະຕິບັດບັນດາເປົ້າໝາຍ ແລະ ບັນດາໜ້າວຽກຈຸດສຸມ ຂອງຍຸດທະສາດພັດທະນາການເງິນແຫ່ງລັດ ທີ່ໄດ້ກຳນົດເປັນໜ້າວຽກລະອຽດ ໃນແຜນປະຕິຮູບຂອງ ຂະແໜງການເງິນບາດ ກ້າວທີ 1, ເພື່ອຮັບຟັງການລາຍງານຄວາມຄືບໜ້າ ຜົນການຈັດຕັ້ງປະຕິບັດຍຸດທະສາດພັດທະນາການເງິນແຫ່ງລັດ ຈາກບັນດາກົມອ້ອມຂ້າງກະຊວງການເງິນ ເພື່ອກະກຽມຈັດກອງປະຊຸມລາຍງານຕໍ່ກັບຄະນະຊີ້ນໍາລະດັບຊາດ ໃນການປະຕິຮູບລະບົບຄຸ້ມຄອງການເງິນແຫ່ງລັດ, ທັງເປັນ ການກະກຽມຄວາມພ້ອມຕ່າງໆ ໃນການຈັດຕັ້ງປະຕິບັດແຜນປະຕິຮູບຂະແໜງການເງິນແຫ່ງລັດໃນບາດກ້າວທີ 2 ແຕ່ປີ 2021-2025 ທີ່ໄດ້ຖືກຮັບຮອງ ໃນເດືອນກຸມພາ 2022 ແລະ ແຜນພັດທະນາການເງິນແຫ່ງລັດ 5 ປີແຕ່ປີ 2021-2025.

ການສຳມະນາຄັ້ງນີ້, ໄດ້ສະຫລຸບຕີລາຄາຄວາມຄືບໜ້າ ການຈັດຕັ້ງປະຕິບັດວິໄສທັດໃນໄລຍະຜ່ານມາ, ຍົກໃຫ້ເຫັນບາງບັນຫາຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້, ທັງເປັນການຍົກສູງຄວາມຮັບຜິດຊອບ ແລະ ຄວາມເປັນເຈົ້າການສຸມສະຕິປັນຍາໃນການຄົ້ນຄວ້າ, ປຶກສາຫາລື ເພື່ອປັບປຸງບັນດາແຜນວຽກຈຸດສຸມ ໃນການປະຕິຮູບການຄຸ້ມຄອງການເງິນແຫ່ງລັດ ແລະ ກົນໄກການຄຸ້ມຄອງການຈັດຕັ້ງປະຕິບັດ ແຜນງົບປະມານແຫ່ງລັດ ໃຫ້ສອດຄ່ອງກັບສະພາບຕົວຈິງໃຫ້ບັນລຸຕາມຈຸດປະສົງ ແລະ ຄາດໝາຍທີ່ກໍານົດໄວ້. ຜ່ານການ ຈັດຕັ້ງປະຕິບັດຍຸດທະສາດດັ່ງກ່າວ ມາເປັນແຜນປະຕິຮູບຂະແໜງການເງິນເປັນບາດກ້າວທີ 1 ແຕ່ປີ 2018-2020 ອອກເປັນ 6 ແຜນງານໜ້າວຽກຕົ້ນຕໍເຊັ່ນ: ການປັບປຸງນະໂຍບາຍການເງິນ, ການສ້າງ ແລະ ປັບປຸງນິຕິກໍາຂະແໜງການເງິນ, ການປະຕິຮູບລະບົບຄຸ້ມຄອງລາຍຮັບ, ການປະຕິຮູບລະບົບຄຸ້ມຄອງລາຍຈ່າຍ, ການພັດທະນາຂະແໜງການເງິນເປັນທັນສະໄໝ ແລະ ການພັດທະນາການຈັດຕັ້ງ ແລະ ບຸຄະລາກອນ ເຊິ່ງການຈັດຕັ້ງປະຕິບັດ ແຕ່ລະໜ້າວຽກ ໃນແຜນຍຸດທະສາດພັດທະນາຂະແໜງການເງິນ ກໍຄື ແຜນປະຕິຮູບການເງິນແຫ່ງລັດ ຢູ່ໃນທາມກາງຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການລະບາດ ພະຍາດໂຄວິດ-19 ເຮັດໃຫ້ມີຫລາຍໜ້າວຽກມີການຫລ້າຊ້າ ແລະ ບາງໜ້າວຽກບໍ່ໄດ້ຮັບການ ຈັດຕັ້ງປະຕິບັດ.

ການສຳມະນາຄັ້ງນີ້, ໄດ້ການສະໜັບສະໜູນຈາກໂຄງການປັບປຸງການຄຸ້ມຄອງການເງິນແຫ່ງລັດ ໂດຍຮັບທຶນຈາກສະຫະພາບເອີຣົບ ຜ່ານທະນາຄານໂລກ ໂດຍມີ ທ່ານນາງ  ພິລານີ ພິດສະໄໝ ຮອງຫົວໜ້າກົມນະໂຍບາຍການເງິນ ກະຊວງການເງິນ, ມີຄະນະພະແນກ,ຄະນະວິຊາການທີ່ຕາງໜ້າບັນດາກົມ ອ້ອມຂ້າງກະຊວງການເງິນ ແລະ ຄະນະຮັບຜິດຊອບໜ່ວຍງານຈັດຕັ້ງປະຕິບັດໂຄງການ ເຂົ້າຮ່ວມ.

ຂ່າວ-ພາບ: ກະຊວງການເງິນ

แชร์