ສສກ ປະດັບຫຼຽນໄຊແຮງງານໃຫ້ບຸກຄົນ ແລະກົມກອງສໍານັກພິມຈຳໜ່າຍສຶກສາ ສສ ຫວຽດນາມ

ກະຊວງສຶກສາທິການ ແລະກີລາ ຈັດພິທີປະດັບຫຼຽນໄຊແຮງງານໃຫ້ບຸກຄົນ ແລະກົມກອງສໍານັກພິມຈຳໜ່າຍສຶກສາ ສສ ຫວຽດນາມ ເມື່ອວັນທີ 19 ພຶດສະພາ ຜ່ານມາທີ່ຫ້ອງປະຊຸມ ສສກ, ໂດຍເປັນກຽດປະດັບຫຼຽນຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາ, ມີທ່ານ ຫງວຽນ ດຶກ ທາຍ ປະທານສະພາບໍລິຫານສໍານັກພິມຈໍາໜ່າຍສຶກສາ ສສ ຫວຽດນາມ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ສສກ, ພ້ອມດ້ວຍຫົວໜ້າຫ້ອງການ, ຫົວໜ້າກົມ, ຜູ້ອໍານວຍການສະຖາບັນພາຍໃນກະຊວງ, ທູດສຶກສາ ແລະວັດທະນະທໍາສະຖານທູດຫວຽດນາມ ປະຈໍາ ສປປ ລາວ ແລະ ບັນດາຄະນະສໍານັກພິມທັງສອງຝ່າຍເຂົ້າຮ່ວມເປັນສັກຂີພິຍານ.

ໃນພິທີ, ທ່ານ ນາງ ບົວຄໍາ ດາວສະຫວັນ ຜູ້ອໍານວຍການສໍານັກພິມສຶກສາ ແລະກີລາ ກະຊວງ ສສກ ໄດ້ກ່າວວ່າ: ໃນທ່າມກາງບັນຍາກາດທີ 2 ພັກ, 2 ລັດ ແລະ ປະຊາຊົນ 2 ຊາດລາວ-ຫວຽດນາມ ອ້າຍນ້ອງທີ່ມີມູນເຊື້ອມາແຕ່ດົນນານແລ້ວນັ້ນ ແລະ ກຳລັງກະກຽມຄວາມພ້ອມສະເຫຼີມສະຫຼອງວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 54 ປີ (18 ກໍລະກົດ 1977 ຫາ 18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5 ກັນຍາ 1962 ຫາ 5 ກັນຍາ 2022) ຢ່າງເປັນຂະບວນຟົດຟື້ນບົນຈິດໃຈມິດຕະພາບ ແລະຄວາມສາມັກຄີພິເສດລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະແມ່ນກະກຽມສະເຫຼີມສະຫຼອງການສ້າງຕັ້ງສຳນັກພິມຈໍາໜ່າຍສຶກສາ ສສ ຫວຽດນາມ ຄົບຮອບ 65 ປີທີ່ຈະມາເຖິງນີ້.

ໃນໄລຍະຜ່ານມາ ສຳນັກພິມຈຳໜ່າຍສຶກສາ ສສ ຫວຽດນາມ ໄດ້ມີການພົວພັນຮ່ວມມືຢ່າງສະໜິດແໜ້ນກັບ 2 ບໍລິສັດລັດວິສາຫະກິດອຸປະກອນການສຶກສາ ແລະ ບໍລິສັດລັດວິສາຫະກິດໂຮງພິມສຶກສາຂອງກະຊວງສຶກສາທິການ ແລະ ກິລາ ເປັນຕົ້ນທາງດ້ານການຝຶກອົບຮົມ ສ້າງຄວາມເຂັ້ມແຂງດ້ານເຕັກນິກວິຊາການ, ການຊ່ວຍເຫຼືອດ້ານເຄື່ອງຈັກ ແລະ ເຄື່ອງມືການຜະລິດ. ດັ່ງນັ້ນ, ຄະນະນຳກະຊວງສຶກສາທິການ ແລະກິລາຈຶ່ງໄດ້ຈັດພິທີທີ່ມີຄວາມໝາຍຄວາມສຳຄັນຂຶ້ນເພື່ອສະແດງຄວາມຂອບໃຈ ແລະປະດັບຫຼຽນໄຊ, ຫຼຽນກາ ແລະໃບຍ້ອງຍໍໃຫ້ຄະນະສຳນັກພິມຈໍາໜ່າຍສຶກສາ ສສ ຫວຽດນາມ.

ນອກຈາກນັ້ນ, ທ່ານ ອິນທະວົງ ມະນີທອງ ຮອງກົມຈັດຕັ້ງ ແລະພະນັກງານ ສສກ ໄດ້ຜ່ານດໍາລັດຂອງປະທານປະເທດ ແລະຂໍ້ຕົກລົງຍ້ອງຍໍຂອງກະຊວງສຶກສາທິ ການ ແລະກິລາ, ຊຶ່ງມີການປະດັບຫຼານໄຊແຮງງານຊັ້ນ I ຈໍານວນ 1 ທ່ານ, ຫຼານໄຊແຮງງານຊັ້ນ II ຈໍານວນ 1 ທ່ານ, ຫຼານໄຊແຮງງານຊັ້ນ III ຈໍານວນ 3 ທ່ານ, 1 ກົມກອງ ແລະຫຼຽນກາມິດຕະພາາບ ຈໍານວນ 2 ທ່ານ ທີ່ມີຜົນງານດີເດັ່ນປະກອບໃນການພົວພັນຮ່ວມມືລະຫວ່າງສໍານັກພິມຈໍາໜ່າຍສຶກສາ ສສ ຫວຽດນາມ ກັບບໍລິສັດລັດວິສາຫະກິດອຸປະກອນການສຶກສາຂອງລາວ ທາງດ້ານເຕັກນິກວິຊາການ, ຝຶກອົບຮົມຍົກລະດັບໃຫ້ພະນັກງານ, ຊ່ວຍເຫຼືອດ້ານອຸປະກອນເຄື່ອງຈັກຜະລິດເພື່ອຮັບໃຊ້ວຽກງານສຶກສາໃນໄລຍະເວລາຜ່ານມາ ແລະເນື່ອງໃນໂອກາດສະເຫຼີມສະຫຼອງວັນສ້າງຕັ້ງສຳນັກພິມຈໍາໜ່າຍສຶກສາ ສສ ຫວຽດນາມ ຄົບຮອບ 65 ປີ (1 ມິຖຸນາ 1957-1 ມິຖຸນາ 2022). ຜົນງານດັ່ງກ່າວ, ເປັນການປະກອບສ່ວນອັນສໍາຄັນໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ລາວ-ຫວຽດນາມ.

ນອກຈາກນີ້, ໃນພິທີ ທ່ານ ຫງວຽນ ດຶກ ທາຍ ຍັງໄດ້ມອບປຶ້ມວັດຈະນານຸກົມ ລາວ-ຫວຽດ, ຫວຽດ-ລາວໃຫ້ກະຊວງ ສສກ ຕື່ມອີກ.

 ໂດຍ ແສງດາວວີ

แชร์