ອົງການຈັດຕັ້ງສາກົນ ຮ່ວມກັນປັບປຸງສຸຂະພາບ-ໂພຊະນາການ ຂອງເດັກຢູ່ແຂວງຜົ້ງສາລີ

ໃນວັນທີ 23 ພຶດສະພາ 2022, ທີ່ກະຊວງສາທາລະນະສຸກ, ອຳນາດການປົກຄອງຂັ້ນແຂວງ, ອົງການອາຫານໂລກ ແລະອົງການອຸຍນິເຊັບໄດ້ເປີດໂຄງການເພື່ອປັບປຸງໂພຊະນາການຂອງເດັກອາຍຸຕໍ່າກວ່າ 5 ປີ ຢູ່ແຂວງຜົ້ງສາລີ ໂດຍໄດ້ຮັບການສະໜັບສະໜູນຈາກລັດຖະບານຝຣັ່ງ. ຈຸດປະສົງເພື່ອສົ່ງເສີມການລ້ຽງດູ, ໃຫ້ອາຫານເດັກອ່ອນ ແລະເດັກນ້ອຍໃຫ້ດີຂຶ້ນ, ເພີ່ມຄວາມຮູ້ດ້ານໂພຊະນາການຂອງແມ່, ປັບປຸງຂະບວນການປະເມີນ ແລະປິ່ນປົວເດັກທີ່ຂາດສານອາຫານແບບຈ່ອຍຜອມ ທັງນີ້ກໍເພື່ອໃຫ້ ສປປ ລາວ ສາມາດບັນລຸເປົ້າໝາຍໂຄງການຄຸ້ມຄອງແບບເຊື່ອມສານຂອງການຂາດສານອາຫານກະທັນຫັນໃນລະດັບປະເທດ.

ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະສົ່ງເສີມສຸຂະພາບ, ກະຊວງສາທາລະນະສຸກ ໄດ້ກ່າວວ່າ: ຜົ້ງສາລີເປັນແຂວງໜຶ່ງທີ່ມີອັດຕາການຂາດສານອາຫານ ໃນເດັກອາຍຸຕໍ່າກວ່າ 5 ປີ ທີ່ສູງທີ່ສຸດໃນ ສປປ ລາວ ແລະ ມີອັດຕາສ່ວນເດັກນ້ອຍ ໜ້ອຍກວ່າເຄິ່ງຂອງຈຳນວນທັງໝົດທີ່ໄດ້ກິນນົມແມ່ພຽງຢ່າງດຽວໃນໄລຍະ 6 ເດືອນທຳອິດ ແລະ ມີພຽງແຕ່ 28% ຂອງເດັກອາຍຸຕໍ່າກວ່າ 5 ປີ ທີ່ໄດ້ກິນອາຫານຄົບໝູ່ຕາມມາດຕະຖານຂັ້ນຕໍ່າສຸດທີ່ອົງການອະນາໄມໂລກໄດ້ແນະນຳ. ບັນຫາໂພຊະນາການຂອງແມ່, ອັດຕາການຖືພາໃນໄວໜຸ່ມທີ່ສູງ, ບັນຫາສິ່ງທ້າທາຍດ້ານນໍ້າ ແລະ ສຸຂະອະນາໄມ, ຄວາມຈຳກັດໃນການເຂົ້າເຖິງການບໍລິການ ດ້ານສຸຂະພາບ ແລະຄວາມບໍ່ໝັ້ນຄົງດ້ານອາຫານ ເນື່ອງຈາກຜົນກະທົບ ຂອງການປ່ຽນແປງທາງດິນຟ້າອາກາດ ແລະ ການລະບາດຂອງພະຍາດໂຄວິດ-19 ແລະ ບັນຫາອື່ນໆ.

ເດັກນ້ອຍທີ່ຂາດສານອາຫານແບບຈ່ອຍຜອມແມ່ນມີຄວາມສ່ຽງສູງຕໍ່ການເສຍຊີວິດເຖິງ 12 ເທົ່າຂອງເດັກນ້ອຍທີ່ມີສຸຂະພາບດີ, ດັ່ງນັ້ນຈຶ່ງມີຄວາມຈຳເປັນທີ່ຕ້ອງໃຫ້ຄວາມສຳຄັນ ໃຫ້ພວກເຂົາຕ້ອງໄດ້ຮັບການປິ່ນປົວ. ການປ້ອງກັນ ແລະ ປິ່ນປົວພະຍາດດັ່ງກ່າວ ເປັນເປົ້າໝາຍຂອງໂຄງການນີ້ ຊຶ່ງສອດຄ່ອງກັບແຜນປະຕິບັດງານແຫ່ງຊາດ ດ້ານໂພຊະນາການຂອງ ສປປ ລາວ ສົກປີ 2021-2025 ແລະ ຈະຊ່ວຍສ້າງຂີດຄວາມສາມາດ ຂອງບັນດາພະນັກງານສາທາລະນະສຸກໃນການປະເມີນ ແລະປິ່ນປົວເດັກນ້ອຍທີ່ຂາດສານອາຫານກ່ອນຈະຊ້າເກີນໄປ; ພ້ອມກັນນີ້, ຍັງຈະສົມທົບເຂົ້າໃນຄວາມພະຍາຍາມຂອງພວກເຮົາໃນການສ້າງລະບົບຄຸ້ມຄອງການຂາດສານອາຫານກະທັນຫັນ.

ໂຄງການນີ້ຈະຊ່ວຍປູກຈິດສຳນຶກ ໃຫ້ແກ່ປະຊາຊົນປະມານ 23.000 ຄົນ ກ່ຽວກັບບັນຫາການຂາດສານອາຫານແບບກະທັນຫັນ ແລະເດັກນ້ອຍຈຳນວນ 5.000 ຄົນ ຈະໄດ້ຮັບການປະເມີນສະພາບໂພຊະນາການ. ພ້ອມນັ້ນ, ເດັກນ້ອຍທີ່ຂາດສານອາຫານແບບກະທັນຫັນ ຈຳນວນ 500 ຄົນ ໃນ 6 ເມືອງເປົ້າໝາຍຂອງແຂວງຜົ້ງສາລີ ຄື: ເມືອງຂວາ, ສຳພັນ, ໃໝ່, ບູນໃຕ້, ຍອດອູ ແລະເມືອງຜົ້ງສາລີ ຈະໄດ້ຮັບການປິ່ນປົວ ແລະອາຫານເສີມສຳລັບປິ່ນປົວພາວະການຂາດສານອາຫານ.

ທ່ານ ນາງ ຊີບແລງ ຊົວຣ໌ ເອກອັກຄະລັດຖະທູດຝຣັ່ງ ປະຈຳ ສປປ ລາວ ໄດ້ກ່າວວ່າ: ລັດຖະບານຝຣັ່ງ ກຳລັງໃຫ້ການສະໜັບສະໜູນຄວາມພະຍາຍາມຂອງລັດຖະບານລາວໃນການບັນລຸເປົ້າໝາຍການພັດທະນາແບບຍືນຍົງທີ 2 ກໍຄືລຶບລ້າງຄວາມອຶດຫິວ, ບັນລຸການປັບປຸງການຄໍ້າປະກັນດ້ານສະບຽງອາຫານ ແລະໂພຊະນາການຕິດພັນກັບການສົ່ງເສີມກະສິກຳແບບຍືນຍົງ. ໂຄງການໃໝ່ນີ້ຈະເປັນການສົມທົບເຂົ້າໃນວຽກງານອື່ນໆທີ່ອົງການອາຫານໂລກ ເເລະອົງການອຸຍນິເຊັບ ພວມຈັດຕັ້ງປະຕິບັດຢູ່ໃນແຂວງຜົ້ງສາລີ ແລະທົ່ວປະເທດ.

แชร์