ກຽມພັດທະນາແຄມຂອງເມືອງຫ້ວຍຊາຍກາຍເປັນເຂດການຄ້າ ແລະການທ່ອງທ່ຽວ

ເມື່ອບໍ່ດົນມານີ້ ເມືອງຫ້ວຍຊາຍ ແຂວງບໍ່ແກ້ວມີພິທີລົງນາມເຊັນບົດບັນທືກຄວາມເຂົ້າໃຈເພື່ອສືກສາຄວາມເປັນໄປໄດ້ໃນການລົງທືນພັດທະນາແຄມແມ່ນໍ້າຂອງເຂດບ້ານຂອນແກ້ວໃຫ້ກາຍເປັນເຂດການຄ້າ-ການທ່ອງທ່ຽວ ແລະໂຄ້ງການຮ່ອນແກ້ວແບບຫັດຖະກຳຕິດພັນກັບການທ່ອງທ່ຽວເຂດບ້ານຫ້ວຍສາລາ ເມືອງຫ້ວຍຊາຍແຂວງບໍ່ແກ້ວ, ໂດຍຈັດຂຶ້ນທີ່ຫ້ອງວ່າການປົກຄອງແຂວງລະຫວ່າງອົງການປົກຄອງແຂວງ, ຕ່າງໜ້າພະແນກແຜນການແລະການລົງທືນແຂວງຮ່ວມກັບສະມາຄົມນັກທຸລະກິດໜຸ່ມແຂວງບໍ່ແກ້ວ, ເປັນກຽດເຂົ້າຮ່ວມຂອງທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ ພ້ອມດ້ວຍການນໍາຂອງແຂວງ, ມີບັນດາຕ່າງໜ້າພະແນກການທີ່ກ່ຽວຂ້ອງ ແລະນັກທຸລະກິດເຂົ້າຮ່ວມ.

ຈຸດປະສົງຂອງການເຊັນບົດບັນທືກຄວາມເຂົ້າໃຈເພື່ອສືກສາຄວາມເປັນໄປໄດ້ໃນການລົງທືນພັດທະນາແຄມແມ່ນໍ້າຂອງເຂດບ້ານຂອນແກ້ວ ແລະໂຄ້ງການຮ່ອນແກ້ວແບບຫັດຖະກຳຕິດພັນກັບການທ່ອງທ່ຽວເຂດບ້ານຫ້ວຍສາລາຄັ້ງນີ້ເປົ້າຫມາຍແມ່ນຕ້ອງການສືກສາຄວາມເປັນໄປໄດ້ໃນການລົງທືນພັດທະນາແຄມແມ່ນໍ້າຂອງເຂດບ້ານຂອນແກ້ວສ້າງໃຫ້ກາຍເປັນເຂດການຄ້າ-ເຂດການແຫຼ່ງທ່ອງທ່ຽວເປັນຈຸດລວມສູນແຫລ່ງລວມຄວາມບັນເທິງຕ່າງໆ ແລະຈັດກິດຈະກຳຕ່າງໆຂອງແຂວງເຮັດໃຫ້ເຂດນີ້ເປັນເຂດການຄ້າທີ່ລຽບຕາມແຄມແມ່ນໍ້າຂອງ ເຊືອມໂຍ້ງກັບປະເທດຂ້າງຄຽງ. ສ່ວນໂຄ້ງການຮ່ອນແກ້ວແບບຫັດຖະກຳຕິດພັນກັບການທ່ອງທ່ຽວເຂດບ້ານຫ້ວຍສາລານີ້ກໍ່ເຊັນກັນເປົ້າຫມາຍແມ່ນຕ້ອງການສືກສາຄວາມເປັນໄປໄດ້ໃນການລົງທືນພັດທະນາຈຳລອງການຮ່ອນແກ້ວແບບທໍາມະຊາດ, ການທ່ອງທຽວເຊິງອານຸລັກທຳມະຊາດ, ການຍ່າງຊົມປ່າ, ເຮັດການກະເສດຕິດພັນກັບການທ່ອງທ່ຽວ ແລະກິດຈະກໍາອື່ນໆ.

ໃນນີ້ສະມາຄົມນັກທຸລະກິດໜຸ່ມໄດ້ມີຄວາມພ້ອມທີ່ຈະຈັດຕັ້ງປະຕິບັດໂຄງການທັງສອງໂຄ້ງການດັ່ງກ່າວໃຫ້ຖືກຕ້ອງສອດຄອງຕາມລະບຽບກົດໝາຍຢ່າງເຂັ້ມງວດ, ໂດຍສະເພາະການປະຕິບັດຕາມເນື້ອໃນບົດບັນທືກສະບັບນີ້,ເພື່ອແນ່ໃສ່ເຮັດໃຫ້ການຈັດຕັ້ງປະຕິບັດໂຄງການໄດ້ດໍາເນີນໄປຢ່າງຖືກຕ້ອງຕາມລະບຽບກົດໝາຍ ແລະ ທັນຕາມກຳນົດເວລາ, ໃນນັ້ນກິດຈະກໍາທັງ 2 ໂຄງການທີ່ຈະໄດ້ຈັດຕັ້ງປະຕິບັດມອບໃຫ້ພະແນກແຜນການແລະການລົງທືນແຂວງຕ່າງໜ້າໃຫ້ອົງການປົກຄອງແຂວງ ໃນການເຈລະຈາ ແລະເຊັນບົດບັນທືກຄວາມເຂົ້າໃຈເພື່ອສຶກສາຄວາມເປັນໄປໄດ້ໃນການລົງທືນຮ່ວມກັບສະມາຄົມນັກທຸລະກິດໜຸ່ມແຂວງບໍ່ແກ້ວ.

ຂ່າວ ບຸນນິກ

• 20/05/2022