ກຸ່ມຫັດຖະກໍາປັ້ນດິນເຜົາ ເມືອງແອດ ໄດ້ຮັບກາໝາຍໂອດັອບສິນຄ້າ ໜຶ່ງເມືອງໜຶ່ງຜະລິດຕະພັນ ແຫ່ງຊາດ

ພິທີເປີດປ້າຍກາໝາຍໂອດັອບ ຫຼືໜຶ່ງເມືອງໜຶ່ງຜະລິດຕະພັນ ແຫ່ງຊາດກຸ່ມຫັດຖະກໍາເຄື່ອງປັ້ນດິນເຜົ່າບ້ານລູ້ ເມືອງແອດ ແຂວງຫົວພັນ ຈັດຂື້ນໃນວັນທີ 18 ພຶດສະພາ 2022 ຢູ່ສະໂມສອນເມືອງແອດ ແຂວງຫົວພັນ, ໂດຍມີ ທ່ານ ທອງສຸກ ສົມພາວັນ ເຈົ້າເມືອງເມືອງແອດ, ພາກສ່ວນທີກ່ຽວຂ້ອງຄະນະກໍາມະການ ມາຈາກບັນດາພະແນກການຂອງແຂວງ, ເມືອງຕະຫຼອດຮອດຄະນະພັກອໍານາດການປົກຄອງບ້ານ, ຫົວໜ້າ, ສະມາຊິກພາຍໃນກຸ່ມຫັດຖະກໍາເຄື່ອງປັ້ນດິນເຜົາບ້ານລູ້ເຂົ້າຮ່ວມ.

ກຸ່ມຫັດຖະກໍາປັ້ນດິນເຜົາ ບ້ານລູ້ ເມືອງແອດ ແຂວງຫົວພັນໄດ້ສ້າງຕັ້ງຂື້ນໃນປີ 2021 ປະກອບມີ 10 ຄອບຄົວມີສະມາຊິກ ທັງໝົດ 20 ກວ່າຄົນ ເຄື່ອງຫັດຖະກໍາທີ່ຜະລິດເປັນຕົ້ນແມ່ນ: ຄົກ, ໄຫ, ໂທປູກດອກໄມ້, ເຕົາໂລ  ແລະອື່ນໆ ຈາກການຜະລິດຮັບໃຊ້ພາຍໃນຄອບຄົວໄດ້ກາຍມາຜະລິດເປັນສິນຄ້າ ແລະໄດ້ນຳຜະລິດຕະພັນດັ່ງກາວເຂົ້າຮ່ວມງານວາງສະແດງສິນຄ້າໃນວັນສໍາຄັນຕ່າງໆ ທັງພາຍໃນເມືອງ ແລະຕ່າງແຂວງຕາມການເຊື້ອເຊີນ ສະເລ່ຍແລ້ວສະມາຊິກໃນກຸ່ມຜູ້ໜຶ່ງສາມາດຜະລິດໄດ້ ປະມານ 15- 20 ໜ່ວຍຕໍ່ມື້, ສາມາດສ້າງລາຍຮັບເຂົ້າກຸ່ມໄດ້ 70 ລ້ານກວ່າກີບຕໍ່ປີ ຕໍ່ກັບຜົນງານ ແລະຄ່ານິຍົມຂອງລູກຄ້າຕໍ່ຜະລິດຕະພັນດັ່ງກ່າວກຸ່ມຫັດຖະກໍາບັ້ານລູ້ຈຶ່ງໄດ້ຮັບປ້າຍກາໂອດັອບ ຫຼື ໜຶ່ງເມືອງ ໜື່ງຜະລິດຕະພັນແຫ່ງຊາດ, ເປັນກຽດກ່າວມອບປ້າຍກາໂອດັອບໂດຍແມ່ນ ທ່ານ ນ. ພອນວັນ ອິນທະວົງ ຮອງຫົວໜ້າພະແນກອຸດສາຫະກໍາ ແລະການຄ້າ ແຂວງຫົວພັນ ແລະກ່າວຮັບໂດຍ ທ່ານ ທອງສຸກ ສົມພາວັນ ເຈົ້າເມືອງ ເມືອງແອດ ແລະມອບຕໍ່ໃຫ້ກຸ່ມຜະລິດຫັດຖະກໍາບ້ານລູ້ເປັນຫົວໜ່ວຍຜະລິດຕະພັນທີ່ 9 ຂອງແຂວງ ແລະທີໜຶ່ງຂອງເມືອງແອດຊຶ່ງເປັນການຍັງຢື້ນຄຸນນະພາບ,ມາດຕະຖານການຜະລິດ ແລະເປັນການໂຄສະນາຜະລິດຕະພັນສິນຄ້າຂອງກຸ່ມຜະລິດສ້າງຄວາມໝັ້ນໃຈໃຫ້ແກ່ລູກຄ້າ ຫຼືຜູ້ຊົມໃຊ້ຜະລິດຕະພາບດັ່ງກ່າວ ແລະທັງເປັນການປະກອບສ່ວນຊຸກຍູ້ສົ່ງເສິມດ້ານປະລິມານ ແລະຄຸນນະພາບຂອງຜະລິດຕະພັນພາຍໃນໃຫ້ດີຂຶ້ນກ້າວເຂົ້າສຸ່ຄຸນນະພາບລະດັບສາກົນເທື່ອລະກ້າວ.

ຂ່າວ: ເລີດ ໄຊຍະເດດ

แชร์