ທາບທາມຮ່າງກົດໝາຍ ວ່າດ້ວຍການປະມົງ (ສະບັບປັບປຸງ)

ໃນລະຫວ່າງວັນທີ 19-20 ພຶດສະພາ 2022 ກະຊວງກະສິກຳ ແລະ ປ່າໄມ້ຈັດກອງປະຊຸມທາບທາມຮ່າງກົດຫມາຍວ່າດ້ວຍການປະມົງ (ສະບັບປັບປຸງ) ຢູ່ຫ້ອງປະຊຸມກະສິກຳ ແລະປ່າໄມ້ ແຂວງຫລວງພະບາງ ໂດຍການເປັນປະທານຂອງ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະປ່າໄມ້, ທ່ານ ນາງ ສິລິພອນ ສຸພັນທອງ, ຮອງເຈົ້າແຂວງຫຼວງພະບາງ ມີຜູ້ຕາງໜ້າຈາກພະແນກກະສິກຳ ແລະ ປ່າໄມ້ແຂວງ, ຈາກຂະແໜງລ້ຽງສັດ ແລະ ການປະມົງແຂວງ ແລະສະມະຊິກສະພາແຫ່ງຊາດປະຈໍາເຂດເລືອກຕັ້ງຂອງ 7 ແຂວງພາກເໜືອ (ແຂວງຫຼວງພະບາງ, ໄຊຍະບູລີ, ຫົວພັນ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະຜົ້ງສາລີ) ກໍ່ໄດ້ໃຫ້ກຽດເຂົ້າຮ່ວມທັງໝົດ 72 ທ່ານ, ຍິງ 22 ທ່ານ.

ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະປ່າໄມ້ ໄດ້ກ່າວວ່າ: ຈຸດປະສົງໃນຄັ້ງນີມີ 3 ຈຸດປະສົງຫລັກຄື:  1. ເພື່ອເປັນການລາຍງານຄວາມຄືບໜ້າຂອງການປັບປຸງຮ່າງກົດໝາຍວ່າດ້ວຍການປະມົງໃນໄລຍະຜ່ານມາ ແລະທາບທາມຂໍຄຳຄິດຄຳເຫັນປະກອບໃສ່ໂຄງຮ່າງ,ເນື້ອໃນເພື່ອເຮັດໃຫ້ເນື້ອໃນຂອງກົດໝາຍວ່າດ້ວຍການປະມົງ (ສະບັບປັບປຸງ) ບໍ່ມີການຊໍ້າຊ້ອນກັບກົດໝາຍວ່າດ້ວຍສັດນໍ້າ ແລະສັດປ່າ ແລະມີຄວາມເປັນເອກະພາບກັນລະຫວ່າງສູນກາງ ແລະ ທ້ອງຖິ່ນ, 2. ເພື່ອໃຫ້ມີເນື້ອໃນທີ່ສອດຄ່ອງກັບສະພາບຕົວຈິງໃນປະຈຸບັນ ແລະໃຫ້ຖືກຕ້ອງສອດຄ່ອງຕາມຫຼັກການ ແລະຂັ້ນຕອນທີ່ໄດ້ກໍານົດໄວ້ໃນກົດໝາຍວ່າດ້ວຍການສ້າງນິຕິກຳ ເລກທີ 19/ສພຊ, ລົງວັນທີ 12 ກໍລິກົດ 2012; 3. ເພື່ອປັບປຸງຮ່າງເນື້ອໃນຂອງກົດໝາຍໃຫ້ສອດຄ່ອງກັບຫຼັກການຂອງອົງການສຸຂະພາບສັດສາກົນ (OIE) ແລະສອດຄ່ອງກັບສັນຍາວ່າດ້ວຍສຸຂານາໄມ ແລະສຸຂານາໄມພືດ (SPS); ສໍາລັບກົດໝາຍວ່າດ້ວຍການປະມົງ ສະບັບເລກທີ 03/ສພຊ, ລົງວັນທີ 9 ກໍລະກົດ 2009 ປະກອບດ້ວຍ10 ພາກ, 0 ໝວດ 72 ມາດຕາ ຜ່ານການຈັດຕັ້ງປະຕິບັດມາໄດ້ກວ່າ 13 ປີຜ່ານມານີ້ ເຫັນວ່າ : ກົດໝາຍດັ່ງກ່າວໄດ້ເປັນເຄື່ອງມືທີ່ສຳຄັນໃນການຄຸ້ມຄອງວຽກງານປະມົງເວົ້າລວມ, ເວົ້າສະເພາະແມ່ນໄດ້ປະກອບສ່ວນເຂົ້າໃນການ ຄວບຄຸມ ການເຄື່ອນໄຫວ ກ່ຽວກັບການລ້ຽງ, ການຫາ, ການປຸງແຕ່ງ ລວມທັງການຄວບຄຸມພະຍາດສັດນໍ້າ, ການຄ້າຂາຍສັດນໍ້າ ແລະການເຄື່ອນໄຫວຄ້າຂາຍຜະລິດຕະພັນສິນຄ້າກ່ຽວກັບການປະມົງຢູ່ພາຍໃນປະເທດ ແລະການຄ້າລະຫວ່າງປະເທດ ຂອງ ສປປ ລາວ ໃຫ້ຫັນເຂົ້າສູ່ລະບົບ, ລະບຽບສູງຂຶ້ນໃນລະດັບໜຶ່ງ, ພ້ອມດຽວກັນນັ້ນກໍຍັງເປັນຜົນດີໃຫ້ແກ່ການພັດທະນາພື້ນຖານໂຄງລ່າງດ້ານວິຊາການ ແລະການພົວພັນ, ຮ່ວມມື, ເຊື່ອມໂຍງ ກັບສາກົນນັບມື້ນັບດີຂຶ້ນ ແລະສາມາດປະກອບສ່ວນເຂົ້າໃນການພັດທະນາ,ເອື້ອຍອຳນວຍ, ຊຸກຍູ້ສົ່ງເສີມການຜະລິດສັດນໍ້າຂອງ ສປປ ລາວ ໃຫ້ມີການເຕີບໃຫຍ່ຂະຫຍາຍຕົວ ແລະໄດ້ຜົນຜະລິດຕາມແຜນທີ່ວາງໄວ້.

ມາຮອດປະຈຸບັນກົດໝາຍວ່າດ້ວຍການປະມົງ (ສະບັບປັບປຸງ) ນີ້ແມ່ນປະກອບດ້ວຍ 10 ພາກ 7 ໝວດ 80 ມາດຕາ ( 49 ສ້າງໃໝ່ 39 ປັບປຸງ ແລະຮັກສາເດີມ 1 ມາດຕາ) ກອງປະຊຸມທາບທາມຮ່າງກົດຫມາຍວ່າດ້ວຍການປະມົງ (ສະບັບປັບປຸງ) ໃນຄັ້ງນີ້ຈະດໍາເນີນໄປເປັນ ເວລາ 2 ວັນຈຶ່ງສໍາເລັດ.

แชร์