ຫວນຄືນ 30 ປີ ການພົບປະລະຫວ່າງການນໍາ ສປປ ລາວ ແລະ ສປປ ເກົາຫລີ

ໃນວັນທີ 19 ພຶດສະພາ 2022, ສະຖາບັນການຕ່າງປະເທດກະຊວງການຕ່າງປະເທດ ແລະສະຖານທູດ ສປປ ເກົາຫຼີ ປະຈຳ ສປປ ລາວ ໄດ້ຈັດປາຖະກະຖາເນື່ອງໃນໂອກາດຄົບຮອບ 30 ປີ ຂອງການພົບປະລະຫວ່າງ ທ່ານ ໄກສອນ ພົມວິຫານ ອະດີດເລຂາທິການໃຫຍ່ພັກປະຊາຊົນປະຕິວັດລາວ ແລະ ທ່ານ ກິມ ອິນຊຸງ ແລະ ທ່ານ ກິມ ເຈິງ ອິນ ຜູ້ນຳສູງສຸດ ຂອງ ສປປ ເກົາຫລີ (1992-2022). ໃຫ້ກຽດເປັນປະທານກ່າວເປີດໂດຍ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ແລະໃຫ້ກຽດບັນຍາຍໂດຍທ່ານ ລີ ຢົງ ຊົນ ເອກອັກຄະລັດຖະທູດ ສປປ ເກົາຫຼີ ປະຈຳ ສປປ ລາວ.

ການພົວພັນຮ່ວມມືລະຫວ່າງ ສປປ ລາວ ແລະ ສປປ ເກົາຫຼີ ຖືໄດ້ວ່າເປັນການພົວພັນທີ່ມີມູນເຊື້ອຍາວນານ ແລະເປັນປະຫວັດສາດທີ່ມີຄວາມໝາຍສໍາຄັນ, ທັງສອງປະເທດໄດ້ມີອຸດົມການທາງການເມືອງດຽວກັນທີ່ເດີນຕາມເສັ້ນທາງສັງຄົມນິຍົມ, ຮັກສາໄດ້ລະບອບປະຊາທິປະໄຕອັນຄົບຖ້ວນ, ໃຫ້ກຽດ ແລະໃຫ້ການສະໜັບສະໜູນເຊິ່ງກັນ ແລະ ກັນ ດ້ວຍດີຕະຫລອດມາ. ໃນໄລຍະຕໍ່ສູ້ກູ້ຊາດຂອງ ສປປ ລາວ, ສປປ ເກົາຫຼີ ໄດ້ໃຫ້ການສະໜັບສະໜູນ ພາລະກິດປະຕິວັດຊາດລາວຢ່າງສະເໝີຕົ້ນສະເໝີປາຍ. ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 24 ມິຖຸນາ 1974 ໂດຍ ປະທານໄກສອນ ພົມວິຫານ ອະດີດເລຂາທິການໃຫ່ຍ ຄະນະບໍລິຫານງານສູນກາງພັກປະຊາຊົນປະຕິວັດລາວ ແລະ ທ່ານ ກິມ ອິນຊຸງ ອະດີດຜູ້ນໍາທີ່ຍິ່ງໃຫຍ່ຂອງ ສາທາລະນະລັດ ປະຊາທິປະໄຕ ປະຊາຊົນເກົາຫຼີ. ຈາກນັ້ນເປັນຕົ້ນມາ, ທັງສອງປະເທດ ໄດ້ມີການແລກປ່ຽນຄະນະຜູ້ແທນ ທັງສາຍພັກ ແລະ ສາຍລັດໃນຫລາຍລະດັບ ເຊິ່ງການພົວພັນຮ່ວມມືໃນແຕ່ລະຂັ້ນໄດ້ຮັບຜົນສໍາເລັດຢ່າງຈົບງາມ ແລະ ນັບມື້ນັບໄດ້ຮັບການເສີມຂະຫຍາຍເປັນກ້າວໆມາ. ເຫດການປະຫວັດສາດຂອງການຢ້ຽມຢາມທາງລັດຖະກິດນີ້, ໄດ້ສ້າງເງື່ອນໄຂອັນດີ ແລະ ຂໍ້ສະດວກຫລາຍດ້ານໃຫ້ແກ່ ສປປ ລາວ ແລະ ສປປ ເກົາຫຼີ ໄດ້ມີການແລກປ່ຽນຄະນະຜູ້ແທນນໍາກັນເປັນປະຈໍາ ແລະໄປມາຫາສູ່ກັນຫລາຍຂຶ້ນໂດຍສະເພາະນັບແຕ່ ປີ 2000 ເປັນຕົ້ນມາ.

ການຈັດປາຖະກະຖາໃນຄັ້ງນີ້ດໍາເນີນໄປຢ່າງມີບັນຍາກາດ, ນອກຈາກຜູ້ເຂົ້າຮ່ວມຈະໄດ້ຮັບຟັງການບັນຍາຍອັນມີຄວາມໝາຍຂອງ ທ່ານ ເອກອັກຄະລັດຖະທູດ ແຫ່ງ ສປປ ເກົາຫລີ ປະຈຳ ສປປ ລາວ ແລ້ວ, ຍັງໄດ້ຮັບຊົມການສະແດງສິລະປະອັນເປັນເອກະລັກຈາກ ສະຖານທູດ ສປປ ເກົາຫຼີ ອີກດ້ວຍ. ການຈັດປາຖະກະຖາໃນຄັ້ງນີ້ ມີຜູ້ໃຫ້ຄວາມສົນໃຈເຂົ້າຮ່ວມຮັບຟັງຫຼາຍກວ່າ 100 ທ່ານ ຈາກບັນດາກົມໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະບັນດາກະຊວງທີ່ມີການພົວພັນຮ່ວມມືກັບສະຖານທູດ ສປປ ເກົາຫຼີ ປະຈຳ ສປປ ລາວ.

ການຈັດປາຖະກະຖາໃນຄັ້ງນີ້, ມີຄວາມໝາຍຄວາມສຳຄັນໂດຍສະເພາະກັບນັກການທູດຮຸ່ນໜຸ່ມນ້ອຍໄດ້ເຂົ້າໃຈແຈ້ງກ່ຽວກັບໝາກຜົນຂອງການພົບປະລະຫວ່າງ ການນຳຂອງສອງປະເທດ ໃນ 30 ປີ ກ່ອນໜ້ານີ້ ແລະໄດ້ຮັບຮູ້ເຖິງຄວາມໝາຍອັນເລິກເຊິ່ງຂອງການພົວພັນລະຫວ່າງ ສປປ ລາວ ແລະ ສປປ ເກົາຫລີ ທີ່ມີມູນເຊື້ອອັນດີງາມຮ່ວມກັນຕະຫລອດມາ.

ພາບ: ຂັນໄຊ

แชร์